Diretór Diresaun Nasionál Organizasaun Urbana, Hermínio Moniz Ribeiro. Imajen Tatoli/Julia Chatarina

DILI, 22 setembru 2020 (TATOLI)–Diretór Nasionál Organizasaun Urbana, Ministériu Adminsitrasaun Estatál (DNOU-MAE), Hermínio Moniz Ribeiro, hateten DNOU implementa ona programa pilotu resiklajén iha suku tolu (3) hanesan Suku Colmera, Motael no Suku Kampung-Alor, Munisípiu Dili.

“Ami foin mak implementa programa  pilotu iha suku tolu hanesan Colmera no Motael Postu Administrativu Vera-Crus no Suku Kampung-Alor iha Postu Adminsistrativu Dom Aleixo, Munisípiu Dili,” Diretór DNOU-MAE, Hermínio Moniz Ribeiro, ba Agência TATOLI iha nia knaar fatin MAE, Colmera, Dili, tersa ne’e.

Diretór ne’e akresenta katak Governu deside hili uluk suku tolu refere tanba komunidade sira iha suku hirak ne’e iha konsiénsia soe lixu iha nia fatin loloos maske sira prodús lixu boot.

“Ami hili suku tolu sai programa pilotu ba programa resiklajen nian tanba ami haree konsiénsia komunidade nian bainhira prodús lixu barak maibé bele tau iha nia fatin maibé sira seidauk iha konsiénsia atu halo separasaun ba lixu,” nia hateten.

Ho ida-ne’e, nia dehan, planu atu halo tan iha suku seluk maibé seidauk bele tanba orsamentu ba 2021 seidauk iha, entaun hein bainhira osan iha ona mak bele implementa programa ne’e iha suku seluk iha Munisípiu Dili nian.

Molok implementa programa resiklajen ne’e, nia dehan, parte relevante sira halo ona sensibilizasaun ba suku sira hotu no foin mak implementa iha suku tolu de’it tanba orsamentu laiha.

Tuir nia, dirasaun urbana prepara material hanesan lixu fatin no sepra tiha kedas hodi tau iha suku laran ka área ne’ebé mak soe lixu ba, para komunidade bainhira soe lixu karik tenke hatene tau iha idak-idak nia fatin. Purezemplu lixu verde ketak, botir ka água fatin ketan inklui ho sura-tahan mós tau ketak.

“Ita implementa programa refere ne’e involve mós ho ita-nia juventude sira iha suku laran tanba ita hakarak hatene ema-nia konsiénsia ne’e soe lixu no halo separasaun lixu iha nia fatin,” nia dehan.

Maibé, nia dehan, seidauk iha polítika estratéjia ida atu halo resiklajen ba lixu sira iha sidade Dili ne’ebé mak kolleta hamutuk hodi soe iha Tibar. Tanba ne’e mak to’o agora lixu hotu-hotu iha Tibar tau hamutuk iha fatin ida de’it.

“Nune’e ita bele hetan reseita hosi lixu tanba lixu hotu la’ós atu soe hotu maibé hanesan lixu verde ka matak bele halo adubu no kalen aat sira ita bele esporta ba rai liur no botir mamuk ka plástiku bele halo fali ba artezanatu (kerajinan tangan),” nia hateten. 

Nia dehan, tanba de’it seidauk iha estratéjia resiklajen hodi bele halo separasaun lixu hetan mós resieta hosi lixu ne’e no osan laiha hodi implementa.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here