Prezidente Konsellu Administrasaun BNCTL, Brígido de Sousa. Imajen Tatoli/Egas Cristovão

DILI, 21 setembru 202 (TATOLI)-Banku Nasionál Timor-Leste (BNCTL, sigla Portugés) prontu ezekuta no asegura fundu $480.000 ne’ebé Governu liuhosi Ministériu Turizmu, Komérsiu no Indústria (MTKI) ho apoia Programa Nasaun Unida ba Dezenvolvimentu (PNUD) aloka ba programa fasilidade garantia kréditu (soft-loan) ba empreza sosiál.

“BNCTL hanesan banku komérsiu, banku Estadu Timor-Leste no ita hotu nia banku, sente onradu hetan fiar no hosi parte ami-nia hanesan direjente sira hotu, ami komprometidu no  esforsu-an atubele implementa no asegura fundu ne’e ho di’ak,” tenik Diretór Ezekutivu Konsellu Administrasaun BNCTL, Brígido de Sousa, iha diskursu lansamentu programa kréditu iha edifísiu Fomento, segunda ne’e.

Dirijente banku komérsiu ne’e apresia MTKI tanba konsege selebra akordu hamutuk ho BNCTL atu implementa programa ne’e.

Notísia Relevante: Governu lansa garantia kréditu ba empreza sosiál ho funan porsentu tolu

Tuir nia, akordu ne’e importante tebes atu mobiliza negósiu sosiál atu aselera lalais kresimentu ekonómiku hodi atinje Objetivu Dezenvolvimentu Sustentavel (OMS).

Nia konsidera, programa  ne’e bele ajuda negósiu sira ne’ebé  foin hahú negósiu liuliu apoia joven sira ne’ebé iha abilidade ba negósiu, maibé laiha kapitál atu investe.

“Programa ne’e fó porsentu tolu ne’e funan ki’ik liu iha banku hotu iha Timor-Leste. Funan ne’ebé k’ik, ita-nia joven sira iha micro pequena no médiu empreza bele foti osan hahú hosi $1.000 to’o $25,000 ba kada kréditu,” nia akresenta.

BNCTL fó períodu ba benefisiáriu hetan rendimentu maka selu obrigasaun

BNCTL sei fó períodu fulan-tolu no fulan-neen ba benefisiáriu sira bainhira seidauk iha rendimentu sufisiente, maka seidauk selu obrigasaun ba banku, maibé  hetan ona rendimentu maka hahú selu osan prisipál no funan.

Maski nia dehan BNCTL sei hasoru risku barak tanba ambiente negósiu seidauk amigável ho empreza sira no banku sira maibé sei tenta avalia proposta aplikante sira, molok asesu ba kréditu.

“Ami mós hanoin katak gradualmente ita presiza hasa’e kapasidade joven sira, liuliu empreza hotu no sira ne’ebé hakarak moris ho vida emprezariál atu kria serbisu ba an rasik no ema seluk liuhosi área produtivu sira,” nia informa.

Ho nune’e, Jerente BNCTL husu ba Governu, iha 2021 bele aumenta tan fundu balun atubele empreza sira ne’ebé iha inisiativa bele asesu hotu.

Iha biban hanesan, Diretór Ezekutivu Institutu Apoia Dezenvolvimentu Emprezariál (IADE), Filomeno Belo, hateten IADE prontu koopera ho MTKI no Kámara Komérsiu Indústria Timor-Leste (CCI-TL) atu fó formasaun ba emprezáriu sira iha Timor-Leste.

“Ami orgullu no kontente tebes atu hala’o kooperasaun ho MTKI iha área formasaun no kapasitasaun, inklui promove emprezariál hodi garante programa fasilidade garantia kréditu ne’e bele la’o ho susesu,” nia dehan.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here