Kampaña Nasionál kombate HOAX no Promove Internet Saudável. Imajen/SEKOMS

DILI, 17 setembru 2020 (TATOLI)-Governu liuhosi Sekertaria Estadu Komunikasaun Sosiál (SEKOMS), aban (18/09) sei realiza kampaña nasionál hoax no promove internet saudavél atu fó edukasaun sívika ba sidadaun atu hapara sirkulasaun informasaun ne’ebé iha tendénsia provokativu no falsu liuhosi rede sosiál hanesan Facebook.

Tuir oráriu, kompaña sei hahú iha tuku 15:00, hodi halo marsa dame husi Palásiu Governu ba Largo Lecidere ho abertura direita husi Sekretáriu Estadu Komunikasaun Sosiál, Merício Juvinal dos Reis ‘Akara’.

Portavós ba Kampañia Nasionál no Kooodenadora Gabinete Asesoria, Eugênia Maria Ribeiro, hataten SEKOMS iha programa prioridade 13 ne’ebé aprova ona iha Parlamentu Nasionál, liuliu programa insitiva no promove kampaña sira hodi fó edukasaun sívika sidadania.

“Kampaña ne’e nu’udar meiu edukasaun sívika ba komunidade ho intensaun atu eduka no hasa’e konsiénsia komunidade uza internet ho saudável no labele halo hoax ho tendénsia provokativu iha rede sosiál no iha tempu hanesan bele ajuda komunidade ninia pensamentu krítiku entre informasaun falsu no loloos,” tenik portavós ne’e ba Agência Tatoli iha Pálasiu Governu, kinta ne’e.

Eugênia konsidera ema ne’ebé uza rede sosiál hodi hato’o lia falsu, nu’udar ‘endemia’ ne’ebé espalla maka’as iha sosiedade nia le’et no fó impaktu negativu ba ema ninia hanoin no atitude.

“Impaktu negativu hosi hoax afeta ba komunidade hosi nível estudante, joven no sosiedade ein jerál tantu liuhosi forma verbál, eskrita, imajen karikatura no seluk tan. Iha era dijitál ne’e, hoax maioria espalla iha mídia online ne’ebé fahe iha rede Facebook (kontestu Timor),” nia nota.

Kampaña nasionál ne’e hakarak hamutuk ho sosiedade hodi foti asaun ida hodi hakat liu kustumu ne’ebé gosta fahe tutan informasaun falsu ka hoax ba ema hotu iha rede sosiál.

Ba inisiativa ne’e SEKOMS hanesan promotór hamutuk ho parseiru sira hanesa sosiedade sivíl, TIC-Timor, Autoridade Reguladór Komunikasaun (ANC, sigla protugés), no youtuber sira atu fahe esperiénsia kona-ba identifika no aprezenta informasaun falsu sira liuhosi verbál no eskrita ne’ebé barak liu sirkula iha rede sosiál.

“Ita koko atu muda pensamentu no hahalok, tanba dala barak problema mosu no Governu hanoin atu kria lei mak barak maibé SEKOMS liuhosi kampaña efetivu bele redús kria lei, tanba bainhira kria lei barak mós bele limita fali ita-nia liberdade impresa no espresaun,” nia fó hanoin.

Meta SEKOMS liuhosi kampañia nasionál ne’e maka bele muda hahalok no pensamentu atu labele sirkula ka fahe tutan informasau falsu, hasa’e komunidade niniaa pensamentu krítiku liuhosi  informasaun loloos.

Sekretaria Estadu ne’e ho vizaun ida katak komunidade Timor-Leste bele muda ona hahalok hodi rejeita sirkula no konsumu lia-falsu no bele simu informasaun loloos hosi fontes kredível no ofisiál sira.

Atividade iha Largo Lecidere sei iha aprezentasaun husi juvetude kreativu liuliu youtuber Timor-Leste, ANC, TIC-Timor, Operadór Telekomunikasaun hanesan Timor Telecom, Telemor no Telekomcel no Polísia Sentífiku Investigasaun Kriminál (PCIC, sigla portugés).

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here