Uniaun Europeia no Camões, IP liuhusi Projetu PFMO “Osan Povu Nian, Jere ho Di’ak’’, fó apoiu komputadór lima ba Polísia Sientífika Investigasaun Kriminál (PCIC, sigla portugés). Imajen Tatoli/Nelson de Sousa

DILI, 18 setembru 2020 (TATOLI)- Uniaun Europeia no Camões, IP  liuhusi Projetu PFMO “Osan Povu Nian, Jere ho Di’ak’’, fó apoiu komputadór lima  ba Polísia Sientífika Investigasaun Kriminál (PCIC, sigla portugés).

Notísia Relevante :  PCIC presiza laboratóriu biolojia ho toksikolojia

Apoiu ida ne’e atu kapasita PCIC no mós nia investigadór sira kona-ba sira-nia kompeténsia , liu-liu iha área informasaun no kooperasaun ho polísia internasionál, husi laboratóriu Polísia Sientífika no Investigasaun ba kriminalidade ekonómiku no finanseiru, krime informátiku no brankamentu ba kapitál.

PCIC parseiru fundamental ba PFMO. Nia orgánika no ninia kompeténsia jenériku ba investigasaun kriminalidade kompleksu, organizadu no transnasional, hanesan mós nia kriasaun nu’udar órgaun polísia kriminál koadjuvasaun husi Ministériu Públiku iha ezersísiu ba asaun penal, konsagra instituisaun ida ne’e nu’udar polísia judisiária husi Timor-Leste.

Ninia kriasaun ne’e foun, harii iha tinan 2014, apoiu ba konsolidasaun formasaun ba ninia kuadru no investigadór sira, konstitui objetivu ida no prioridade ba projetu ida ne’e.

Serimónia ba apoiu doasaun ne’e entrega direita husi Embaixadór Uniaun Europeia iha Timor-Leste, Adrew Jacobs, Embaixadór Portugal iha  Timor-Leste, José Pedro Machado Viera, Diretór Nasionál PCIC, Vicente Fernandes Brito  ne’ebé akompaña mós husi ekipa projetu osan povu nian hodi entrega direita ba espesialista superior estaziadu PCIC nian iha edifísiu PCIC, Caicoli, Dili, ohin.

Vicente Brito, hatete komputadór hirak ne’e espesialista superior estaziadu  PCIC iha area biolojia, toksikolojia, ekonomia finanseira no atestadu forensik sei utiliza iha tempu oin mai permite  hosi viabilidade formasaun profisionál online ho polísia judisiáriu Portugal.

Nia hateten, espesialista superior sei hala’o faze estájiu durante tinan ida ne’ebé  dezenvolve kapasidade bainhira iha tempu determinadu asume kargu hanesan espesialista superior loloos.

“Ho apoiu ne’e importante no estratéjiku tebes ba PCIC liu-liu formasaun espesialista superior estaziadu sira to’o tempu sira bele sai espesialista hodi kontribui ba servisu judisiál ho di’ak liu tan,”  hateten Vicente Brito.

Nia hato’o agradese ba apoiu sira durante ne’e husi parseiru liuhusi projetu  implementasaun komponente rua  “ Parseria ba  melloria prestasaun servisu através reforsu ba  jestaun   no  Supervizaun Finansa Públika  Timor-Leste” (PFMO),  ne’ebé kontribui maka’as ba PCIC  iha area  formasaun no apoiu ekipamentu ba PCIC Timor-Leste ba  dezenvolvimentu instituisaun ne’e nian.

Tuir planu projetu ne’e sei fó formasaun téknika ba lian portugés ba espesialista superior estajiáriu hodi adapta servisu.

Embaixadór Portugal iha Dili, José Pedro Machado Viera  hateten, objetivu husi entrega ekipamentu oinsá fasilita formasaun ba investigadór estaziadu  PCIC liuhusi virtual (online) no labele realiza hanesan baibain tanba formadór husi Portugal labele dezloka mai TL ho situasaun COVID-19.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here