Diretór Nasionál PCIC, Vicente Fernandes Brito . Imajen Tatoli/Egas Cristovão

DILI, 18 setembru 2020 (TATOLI)-Diretór Nasionál Polísia Sientífika Investigasaun Kriminal (PCIC, sigla portugés),Vicente Fernandes Brito hateten, PCIC presiza iha laboratóriu ba area biolojia ho toksikolojia hodi halo teste forénsika.

Notísia Relevante : Xefe Governu konsidera PCIC iha papél importante kombate krime organizadu

Vicente Brito hateten, durante ne’e laboratóriu PCIC bele halo ezame presial 100%  ba de’it teste balístiku, falsifikasaun dokumentu. Maibé maioria amostra sira hanesan oinsá deskobre ema nia teste  DNA ba raan, droga, identifikasaun determina paternidade, asinatura manual hanesan faslu ka la’e  no seluk tan ba laboratóriu iha area biolojia no toksikolojia  seidauk bele teste permanente hala’o iha  Timor-Leste.

“Ita hasai amostra  ka sampel sira ne’e haruka ba hodi hala’o teste konfirmasaun iha Portugal hodi hatene rezultadu permanente hodi fornese ba Ministériu Públiku (MP) no Tribunál,”  hateten Diretór Nasionál PCIC, Vicente Brito, ba Agência Tatoli, ohin, iha nia kna’ar fatin, Caicoli, Dili.

PCIC hala’o kooperasaun bilateral ho Polísia  Judisiáriu Portugal  durante ne’e haruka amostra sira iha area biolojia no toksikolojia hodi halo teste.

Diretor Vicente Brito, hateten, presiza ekipamentu adekuadu mezmu nune’e ho fazeadamente tanba  dezenvolvimentu  ne’ebé la’o Estadu mós iha nesesidade sira seluk, tanba laboratóriu ba teste iha area sira ne’e ho kustu boot.

“Ita hanoin ba futuru oinsá iha ekipamentu  nune’e kompleta iha area laboratorial ho neineik-neinek, maibé agora  ita presiza uluk ho investimentu báziku,” hateten Vicente Brito.

Tuir orgánika PCIC no ninia kompeténsia jenériku ba investigasaun kriminalidade kompleksu, organizadu no transnasional, hanesan mós nia kriasaun nu’udar órgaun polísia kriminál koadjuvasaun husi Ministériu Públiku iha ezersísiu ba asaun penal, konsagra instituisaun ida ne’e nu’udar polísia judisiária husi Timor-Leste.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here