Xefe Bankada Partidu Demokrátiku (PD), António da Conceição ‘Kalohan'. Imajen TATOLI/António Gonçalves

DILI, 18 setembru 2020 (TATOLI)—Bankada Partido Democrático (PD) iha uma fukun Parlamentu Nasionál la konkorda ideia Frente Revolussionária de Timor-Leste Independente (FRETILIN) atu re-avalia Planu Estratéjiku Dezenvolvimentu Nasionál (PEDN).

Notísia Relevante: CNRT hakarak haree vizaun polítika FRETILIN “muda” PEDN

“La presiza re-avalia Planu Estratéjiku Dezenvolvimentu Nasionál tanba hakarak ka lakohi laiha ema ke diskorda. Ita-nia dezenvolvimentu sei konsentra maka’as hela mós ba setór petrolíferu maka hanesan dudu ita-nia dezenvolvimentu ne’e rasik ,maibé ema ida mós sei labele dehan setór edukasaun, saúde, agrikultura maka sai prioridade nasionál ninian. Se re-avalia atu re-avalia saida ka atu muda saida. Ida-ne’e mak ba PD dehan laiha esénsia atu ema ko’alia polítika sira hanesan ne’e,” Xefe Bankada Partido Democrático, Deputadu António da Conceição “Kalohan” informa ba Agência TATOLI iha Parlamentu Nasionál, sesta ne’e.

Nia dehan, se FRETILIN ko’alia atu re-avalia fila-fali PEDN, ba ida PD mak ida-ne’e viabilizasaun tenke bazeia ba prinsípiu programa Governu nian mós tenke halo no FRETILIN la vota a-favór ba programa VIII Governu Konstitusionál nian.

“Baze fundamentál ne’ebé FRETILIN tenke haree mak re-avalia ho sentidu atu haree fila-fali progama governasaun nian rasik para depois FRETILIN bele halo. Se lae, FRETILIN la apoia tiha programa no viabiliza, saida mak ida-ne’e, baze laiha,” nia dehan. 

Sekretáriu PD ne’e hateten, meta balun iha PEDN ne’ebé la atinje ne’e kestaun tempu tanba refere konsensu iha tinan 2011.

“Se dehan buat ruma mak la realiza signifika ita re-avalia fila-fali ba kotuk, se ita-nia hakarak atu atinje dehan katak até 2030 ne’e ita hakarak Timor-Leste ne’e sai país ho rendimentu médiu-altu bele realiza ka lae. Saida mak sei presiza. Ne’e laiha problema. Entaun, ne’e bele re-avalia,” nia hateten. 

Nune’e hodi haree esforsu ekstra tán hodi bele alkansa objetivu ne’ebé mak ita hotu hakarak maibé muda totál sei lori tempu.

Nia haktuir, PD partisipa governasaun hahú hosi 2007 no envolve aprovasaun Planu Estratéjiku Dezenvolvimentu Nasionál (PEDN) iha 2011.

Tuir nia, agora se meta hotu-hotu ita atinje ona ka seidauk atinje no defaktu buat balu ita seidauk konsege tanba situasaun inserteza polítiku ne’ebé ita hasoru dezde 2017 mai to’o fali agora. 

“Ha’u tenke dehan katak la’ós tanba planu ne’e mak la halo maibé ida situasaun polítiku iha 2017 nian sa’e maka infelismente prezudika no atraza dezenvolvimentu nasionál. Atrazu ne’e la’ós tanba ema ida ka rua nia hakarak maibé tanba jogu polítiku ne’ebé halo maka la favorese duni implementasaun PEDN ne’e,” Xefe Bankada PD ne’e hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here