Xefe Bankada CNRT, Duarte Nunes. Imajen/Egas Cristovão

DILI, 17 setembru 2020 (TATOLI)—Bankada Congresso Nacional de Reconstrução Timorense (CNRT) iha Parlamentu Nasionál hakarak haree vizaun polítika Frente Revolucionária Timor-Leste (FRETILIN) ne’ebé atu “muda” Planu Estratéjiku Dezenvolvimentu Nasionál (PEDN).

Notísia Relavante: Bankada Frente-Mudança: “Avalia PEDN tenke ho konsensu nasionál”

“Kona-ba meta iha PEDN ne’e balun la atinje no ultrapasadu, maibé sira aprezenta ba mak ita hakarak haree took sira-nia vizaun polítika ne’e. Sira atu hotu ka atu hadi’a ka maibé tenke aprezenta ba povu,” Xefe Bankada Congresso Nacional de Reconstrução Timorense (CNRT), Deputadu Duarte Nunes, informa ba jornalista sira iha resintu Parlamentu Nasionál, kinta ne’e.

Xefe Bankada CNRT ne’e akompaña deklarasaun hosi Sekretáriu Jerál FRETILIN Marí Alkatiri iha  Radio Televizaun Maubere (RTM) dehan la konkorda ho sistema ne’ebé ke durante ne’e implementa ona kuaze ita atu ba tinan 15.

“Se nia (Marí Alkatiri) la konkorda signifika nia sei muda hotu (PEDN), prontu, ne’e ninia direitu. Ita haree saida mak nia hakarak. Se muda tenke públika para ita hotu hatene depois mak implementa la’ós nonook de’it depois implementa. Ita atu tuir ba iha-ne’ebé,” nia dehan. 

Nia hateten, se Alkatiri hakarak muda, bele muda ba maibé nia tenke aprezenta ba públiku nune’e povu tenke hatene kona-ba saida mak nia hakarak.

“Katak ke’e mak vizaun polítika ne’e, hakarak ukun mós ho vizaun ida ke sira-nian, hakarak muda sistema, sistema ne’e ita muda para ita hetan vizaun ne’ebé ke ita iha. Se vizaun ne’e mak muda signifika orsamentu mós tenke halai tuir vizaun ne’e entaun PEDN ne’ebé durante ne’e atu muda hotu bele muda ba. Programa ne’e tenke muda no programa ne’e tenke lori mai iha Parlamentu Nasionál mak aprova,” Xefe Bankada CNRT ne’e hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here