Prezidente CNE, Alcino Barris. Imajen/TATOLI Egas Cristovao.

DILI, 17 setembru 2020 (TATOLI)–Prezidente Komisaun Nasionál Eleisaun (CNE), Alcino Baris, hateten komunidade maioria mak ladún iha koñesimentu sufisiente kona-ba sistema eleitorál iha Timor Leste.

Notísia Relevante: Partidu Polítiku sira labele taka-aan maibé tenke Evolui

“Ha’u refere ida-ne’e tanba ami halo edukasaun sívika kuaze iha territóriu tomak no ami mós halo peskiza, no hosi rezultadu ne’e hatudu katak komunidade barak ladún intende ka  ladún iha koñesimentu kona-ba sistema eleitorál,”  dehan Preidente Komisaun Nasionál Eleisaun (CNE), Alcino Baris, sai panelista iha diskusaun meza kabuar ne’ebé Kdadalak Institute of Public Policy (KDA’I) realiza kona-ba demokrásia, reprezentasaun no sistema akuntabilidade polítika iha TL, iha salaun CVTL, Bairu Formoza, Dili, kinta ne’e.

Tanba, nia hateten, polítika ne’ebé mak oras ne’e aplika iha nasaun ne’e kamada kiik hirak ne’ebé mak domina tanba dinámika polítika ka sistema sira opta maibé maioria haree liubá prosesu eleitorál no haree liu ba figura no emosionál partidu nian.

Ida-ne’e akontese, Prezidente CNE ne’e hateten,  tanba seidauk iha partisipasaun polítiku ho destinsaun ne’ebé mak di’ak no seidauk haree partidu polítiku ho nia programa ne’ebé mak bele garante ukun di’ak, ne’e sei iha faze maioria.

“Ita-nia eleitór sira seidauk halo destinsaun. Agora, fanatizmu ida iha ne’ebé mai kedas espiritu emosionál bainhira haree figura. Maibé, seidauk halo destinsaun ida kona-ba partidu ne’ebé mak preparadu atu ukun,” nia informa. 

Nia hatetetn, konstituisaun fó dalan atu garante partisipasaun sidaudaun hotu-hotu iha partidu polítiku sira maibé seidauk iha rigorozidade tanba haree partisipasaun ne’e seidauk regula ho rigór.

Nia dehan, sira partisipa de’it maibé laiha meta ida ne’ebé klaru bainhira atu konkorre iha eleisaun para kontribui ba dezenvolvimentu ruma. Dala ruma partidu polítiku barak maibé nia objetivu atu garante governasaun ne’e laiha.

“Tanba ne’e ita haree partidu polítiku barak mak kontinua la liu barreira no konkorre nafatin maibé votu sira ne’e soe ka la vale. Maibé ita la fó todan ba partidu polítiku sira maibé problema mak ita-nia eleitór sira seidauk iha kapasidade atu destinsaun, presiza osan entaun fatór sira sai hanesan sasukat para ita haree sistema ida ne’ebé mak ita opta”, tenik nia.

Prezidente CNE, Alcino Baris, afirma tanba buat hira ne’e la’ós konta de’it eleitór sira maibé konta mós ho sosíu kulturál rai ida-ne’e nian, tanba buat hirak ne’e la’o ho nia tempu maibé bele halo alterasaun ba sistema balun.

Ho ida ne’e, nia dehan, CNE tenta halo peskiza no tenta komprende partisipasaun atu garante kualidade partisipasaun eleitór iha eleisaun hodi halo aprosimasaun liuhosi edukasuan sívika.

“Ami hatene edukasuan sívika bele halo, tanba ami hatene mandatu ukun ne’e tinan 5 de’it, nune’e laiha partidu ida manan permanente. Maibé ita haree fali sosíu kulturál nian rasik, kapasidade sei baixa tanba ne’e ita hotu-hotu fó konsiderasaun,” nia dehan. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here