Panelista hosi Universidade Nacional Timor Lorosa'e (UNTL), Camilio Ximenes Almeida (tuur iha liman-karuk uza maskara), Imajen TATOLI/Osória Marques.

DILI, 17 setembru 2020 (TATOLI)–Panelista hosi Universidade Nacional Timor Lorosa’e (UNTL), Camilio Ximenes Almeida, alerta ba partidu polítiku sira atu labele taka-aan maibé tenke evolui tuir mundu modernu.

“Ba oin presiza hadi’a, tanba partidu sira mak hanesan instrumentu ida nune’e liuhosi partidu polítiku sira mak ita bele garente polítika no governasaun. Tanba ne’e mak tenke hadi’a-aan no tenke loke-aan no evolui nafatin tuir mundu modernu ne’ebé mak iha,” dehan Panelista hosi UNTL, Camilio Ximenes Almeida, ba jornalista sira hafoin partisipa iha diskusaun meza redonda iha salaun CVTL, Bairu Formoza, Dili, kinta ne’e

Tuir akadémika ne’e nia haree katak membru Governu barak mak hakruuk ba partidu sira maibé nafatin tenke iha objetivu no ho prinsípiu ida katak tuur iha membru Governu ne’e atu defende povu maibé realidade la akontese. 

Nia dehan, dala barak partidu sira ladún hala’o nia funsaun ho di’ak tanba sira hanesan rekrutamentu polítiku no edukasaun polítika.

“Ha’u hanesan estuda polítika ne’e haree katak hatudu fenomena foun ida ne’ebé foin ukun-aan tenke buka identidade (jati diri) para oinsá forma ninia identidade importante ba partidu sira atu labele taka-aan maibé tenke aberta,” Camilio hateten.

Tuir nia, tenke antesipa no loke espasu ba ema seluk atu bele tama ho di’ak tanba nasaun adota multipartidarizmu ne’ebé hanoin ema bele harii partidu barak-barak importante mak iha forsa no iha posibilidade atu halo kontaktu ho partidu sira seluk.

“Karik manan ba mak fó buat ne’ebé paridu kiik ne’e bele, Mezmu deputadu bá, maibé naran katak fó servisu seluk ne’ebé nia sente nia bele halo. Tanba ita foin iha independensia tinan 18. Ita sei iha frajibilidade ne’ebé mak barak liuliu sira falta rekursu umanu,” nia dehan.

Jornalista: OSória Marques

Editór: Cancio Ximenes

HAKEREK NO HATÁN

Please enter your comment!
Please enter your name here