Jogador Lalenok United FC sira kontente bainhira manan klube Santa Cruz Fc, iha Estadiu Munisipal Dili. Imajen/ Midia FFTL.

DILI, 16 setembru 2020 (TATOLI)-Klube zigante Lalenok United FC ho susesu dere ninia adversáriu Santa Cruz FC ho golu 4-0 iha Estádiu Munisipál Di,li, kuarta ne’e durante jogu kontinuasaun kopa Federasaun Futeból Timor-Leste (FFTL).

Durante jogu ne’e hahú ekipa promovidu terseiru divizaun époka 2020 Santa Cruz FC la tauk atu joga hasoru klube Lalenok ne’ebé sai kampiaun ba Liga Futeból Amadora, tasa 12 novembru no super tasa 2019 ne’e.

Notísia Relevante :Lalenok halakon Assalam ho 2-0

No iha minutu 20 nia laran Klube Lalenok liuhosi ninia jogadór Elias Mesquita, konsege hetan oportunidade hodi fura uluk  rede klube Santa Cruz FC.

Ho golu dahuluk ne’e halo klube Santa Cruz esforsu atu hatama filafali golu ba ninia adversáriu Lalenok  maibé la konsege susesu tanba hetan atake maka’as husi jogadór defeza Lalenok United FC.

Nune’e iha minutu 34, sorte daruak monu tan ba klube Lalenok liuhosi jogadór Paulo Gally hatama tan golu hodi muda eskoru 2-0.

Jogu komesa manas liután, klube rua kontinua lansa kontra no atake malu ho sira-nia tékniku idaidak, maibé oportunidade monu tan ba Klube Lalenok tanba jogadór Hermenio de Sousa, ho nia sutu ida hatama golu da toluk hodi muda eskoru ba 3-0.

Iha segunda parte, Jogadór Elias Mesquita, kontribui tan golu ida ba rede Santa Cruz FC hodi muda eskoru ba 4-0, ho golu ne’e maka halo Lalenok manán ninia adversáriu Santa Cruz.

Jogu ne’e dirije husi árbitru Francisco Pereira, Juiz liña Joviano Reis, Duarte Soares no árbitru rezerva Vicente Tilman.

Notísia Relevante :Lalenok Dere Ultramar 4-1

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here