Deputado FRETILIN, Joaquim dos Santos. Imajen Tatoli/Egas Cristóvão

DILI, 17 setembru 2020 (TATOLI)—Bankada Frente Revolussionária de Timor-Leste Independente (FRETILIN) husu re-avalia Planu Estratéjiku Dezenvolvimentu Nasionál (PEDN) tanba meta sira iha planu refere labele atinje no ultrapasada.

Reprezentante Bankada FRETILIN, Deputadu Joaquim dos Santos, fundamenta situasaun globál ho pandemia COVID-19, Timor-Leste konsege halo prevensaun ba ita-nia povu ho implementasaun Estadu Emerjénsia, nune’e COVID-19 iha Timor-Leste sai de’it surtu no laiha transmisaun lokál ba komunidade. Situasaun ne’e fó biban ba Timor-Leste hodi halo reflesaun hodi haree ba frajilidade sira.

“Liuliu atu hahú hanoin, oinsá bele minimiza ita-nia dependénsia ba rai-li’ur kuaze iha setór hotu hahú hosi ekonomia, agrikultura no peska, saúde, edukasaun nomós seluk tan. Ita presiza re-avalia PEDN liuliu tanba meta sira labele atinje ona no ultrapasadu. Katak tenke revitaliza fali planu sira, prioritiza ba diversifikasaun ekonómika hodi investe ba área poténsial sira seluk, hodi la depende deit ba minarai,” Reprezentante Bankada FRETILIN, Deputadu Joaquim dos Santos, Jlevanta liuhosi sesaun solene abertura lejislativa Datoluk ba Lejizlatura Dalima, iha Parlamentu Nasionál, tersa ne’e.

Deklarasaun polítika hosi Bankada FRETILIN ne’e akompaña direitamente hosi Prezidente-Repúblika, Francisco Guterres “Lú Olo”, ne’ebé loke sesaun lejizlativa datoluk ba lejizlatura dalima nian iha uma fukun, tersa ne’e.

Bankada FRETILIN fundamenta liután, Timor-Leste nia rai-bokur ba agrikultura ho luan ektare rihun ba rihun iha kosta-súl no iha parte balun iha kosta-norte.

Tanba ne’e Bankada FRETILIN sente katak, tempu atu Timor-Leste investe seriamente iha setór agríkola, governu tenke harii irrigasaun ho nia sistema ne’ebé bele asegura dezenvolvimentu setór importante ida-nee.

Nune’e mós harii barrajen sira ho dimensaun natoon ne’ebé bele rekolla bee iha tempu udan atu la husik bee suli hotu ba tasi. Governu mós tenke insentiva setór bankáriu halo injesaun kapitál ho jurus atrativu atu dada no dudu setór privadu ba investe iha agrikultura.

“Tempu atu Timor-Leste afirma nia-aan hanesan Estadu soberanu hodi kore-aan hosi dependénsia totál no eskluziva hosi rai-li’ur. Tanba laiha estratéjia polítika ida-ne’ebé mosu atu reforsa ita-nia independénsia maibé hametin liután ita-nia dependénsia ba rai-li’ur. Karik tanba ida-ne’e mak iha tinan 12 nia laran Estadu gasta biliaun $14 maibé setór produtivu sira hanesan agrikultura no turizmu sei hakdasak hela hamutuk ho edukasaun no saúde,” Bankada FRETILIN kestiona.

Bankada FRETILIN fó hanoin, estratéjia dezenvolvimentu nasionál bá-oin labele de’it haree ba infraestrutura fízika no labele tau sees dezenvolvimentu naun-fíziku, mentalidade nu’udar povu ne’ebé iha istória sekulár presiza hametin.

“Ami komunga hanoin hanesan, ne’ebé rekomenda estratéjia desenvolvimentu ba oin sentradu ba ema. Dezenvolvimentu ne’ebé ba ema nia kabun, ba ema-nia isin no ema nia kakutak,” Bankada FRETILIN hateten.

Deklarasaun Bankada FRETILIN n’ebé leitura hosi Deputadu Joaquim dos Santos, subliña Timor-Leste iha merkadoria ida importante ne’ebé hetan apresiasaun mundiál mak kafé tanba ne’e Estadu Timor-Leste  tenke investe iha kafé.

Tanba tuir estudu ida halo hosi Universidade Monash Austrália, hatete karik Timor-Leste investe iha kafé millaun $ 154 mak sei hetan retornu billaun 11 no loke kampu serbisu ba ema rihun 77.

“Ita mós iha merkadoria seluk hanesan baunilla, ne’ebé sai ona familiár tebes iha ita-nia agrikultór sira-nia let, tanba nia folin di’ak iha merkadu mundiál ho presu kilo ida (1) ho folin $400 no mós iha merkadu internu iha 2019 hetan folin kilo ida (1) $50 ba klase A no klase B dolar $45. Tanba ne’e presiza hetan atensaun hosi polítika Governu nian atu dezenvolve liután merkadoria ida-ne’e ho apoiu tékniku no karik bele fó akompañamentu ba sira hetan merkadu internu,” Bankada FRETILIN fó hanoin ba Governu.

Bankada FRETILIN akresenta, Timor-Leste iha poténsia boot ida-ne’ebé durante ne’e husik hela tasi ho área kosteira hamutuk kilometru atus-hitu-tolu-nulu ho nia superfísie tasi hamutuk kilómetru 2 75.000, Timor-Leste laiha formasaun adekuada ba peskadór sira atu hala’o peska ho di’ak.

“Ita laiha ró peska, ita laiha ró atu asegura ema labele mai na’ok ita-nia rikusoin iha tasi. Kada tinan ita lakon osan millaun $300, tuir rezultadu peskiza iha tinan 2011 hatudu por km2 bele kaer ikan 1,6 tonelada,” dehan Bankada FRETILIN.

Nune’e mós Timor-Leste halo parte Triángulu Korál hamutuk ho nasaun 6 hanesan Papua Nova-Guiné, Salomaun, Indonézia, Malázia no Filipina. Iha área ida-ne’e mak eziste aprosimadamente 76% espésie korál sira, iha mós 52% especies de recifes Indo Pasifico, no mós iha área ida-ne’e maka moris floresta boot Mangrove iha mundu.

“Iha ne’e maka sientista sira dehan fuan no pulmaun ekosistema marinho mundu nian. Infelizmente biodiversidade ida-ne’e amesadu tanba peska dezkontrolada sira no mós mudansa klimátika,” nia dehan.

Bankada FRETILIN akresenta, triángulu Korál ne’e dala barak hanaran ‘Amazonia dos Mares’ tanba ho ekosistema ida folin boot liu iha mundu. Governante hosi nasaun hirak-ne’e no organizasaun internasionál sira ba ambiente konsidera hanesan prioridade urjente ba halo konservasaun.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here