Prezidente Konsellu Veteranu, Vidal de Jesus 'Riak Leman'. Imajen Tatoli/ Egas Cristóvão

DILI, 16 setembru 2020 (TATOLI)–Prezidente Konsellu Veteranu, Vidal de Jesus “Riak Leman” informa, tebes duni katak daudaun ne’e feto-faluk no oan-ki’ak sira moris susar maibé to’o agora Estadu no Governu seidauk hakat ba iha família veteranu sira ne’ebé matebian ona ne’e nia hela fatin hodi haree direta sira-nia kondisaun real.

Notísia Relevante: Lere konsidera Saudozu Renan Selak hanesan biblioteka ba istória TL

“Tuir loloos membru Governu sira-ne’e tenke ba haree direta feto-faluk no oan-ki’ak sira nia hela fatin inkui horisehik ami ba haloot matebian Renan Selak iha Lospalos no família sira husu Governu atu tau-matan ba feto-faluk no oan-ki’ak sira,” Prezidente Konsellu Veteranu, Vidal de Jesus “Riak Leman” ba ba Agência TATOLI iha nia knaar fatin SERVE, Obrigado Barack, Matadoru, Dili, kuarta ne’e.

Nia dehan, veteranu tinan 24 barak mate tiha ona hanesan Samba, Ular Rihik, Oli Lemorai, Renan Selak no antes ne’e veteranu barak mate uluk ona, tanba ne’e mak Estadu no Governu Timor-Leste tenke tau-matan no ajuda sira hodi hetan bolsu estudu no harii uma ba sira.

“Ita-nia maluk veteranu tinan 24 barak mate tiha ona maibé Estadu no Governu seidauk ba haree feto-faluk no oan-kiak sira hosi matebian ne’e rasik. Tanba ne’e, Estadu no Governu presiza tau atensaun hodi fó sira bolsu estudu ba oan-ki’ak no halo uma ba sira atu sira bele hela ba. Tanba realidade veteranu matebian sira-ne’e nia oan no ferik-oan sira moris ho kondisaun ne’ebé difisil tebes,” nia dehan. 

Maibé, tuir Riak Leman hateten, realidade ne’ebé mak Governu infrenta daudaun ne’e mak la’o ho osan duodésimu no pandemia COVID-19, entaun instituisaun relevante labele halo buat ida ka resposta ba preokupasaun hosi feto-faluk no oan-ki’ak sira-nian.

Riak Leman hateten, orsamentu ne’ebé mak atu aloka ba veteranu sira inklui ba feto-faluk, oan-kiak no bolsu estudu nian seidauk iha. Osan ne’ebé mak iha ne’e, nia dehan, hodi asegura no funsiona de’it ba mákina estadu hodi hala’o servisu

Maibé, tuir nia, iha Orsamentu Jerál Estadu (OJE) ba 2020-2021 mak pasa, Estadu no Governu bele realiza planu hirak ne’ebé mak ita trasa tiha ona antes ne’e.

“Maibé hein katak orsamentu mai ne’e bele pasa hodi ita bele atende preokupasaun hirak ne’e. Ita nafatin tau prioridade ba planu sira-ne’e tanba konsellu veteranu harii hodi tau-matan ba veteranu no família veteranu sira inklui dezenvolvimentu sira,” Riak Leman hateten.

Jornalista : Osória Marques

Editór : Cancio Ximenes

HAKEREK NO HATÁN

Please enter your comment!
Please enter your name here