Majór Jenerál Lere Anan Timur. Imajen/António Gonçalves

LAUTÉM, 15 Juñu 2020 (TATOLI)-Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, konsidera Saúdozu Faustino dos Santos “Renan Selak” nu’udar biblioteka boot ida hosi prosesu funu ba libertasaun nasionál (Timor-Leste) ne’ebé nia rasik dedika hodi dokumenta istoria furak oin-oin.

Notísia Relevante: Governu fó atensaun nafatin ba saudozu Renan Selak nia oan sira

Lere hateten, saudozu Renan Selak nia mate hanesan lakon boot ida ba Estadu Timor-Leste, tanba saúdozu mós nu’udar autór prinsipál hatene istoria ba prosesu funu ne’ebé FALINTIL sira hakat ho dezafiu oin-oin.

“Ami veteranu sira lakon belun boot ida hanesan Saudozu Renan Selak. Ninia mate hanesan, ita hanesan lakon bilioteka boot ida, istoria ida ne’ebé seidauk konta hotu maibé nia husik ona ita. Ita hotu ne’ebé sei moris, ita mak sei hatutan, ita maka sei sai testamuña ba istoria ne’ebé nia husik hela ba ita,” dehan Lere Anan Timur liuhosi deskursu iha serimónia funebre Saudozu Renan Selak nian iha Jardim dos Herrois e Martires da Patria Assalainu-Lautém.

Lere apela ba veteranu Lautém-oan sira ne’ebé sei moris, atu idak-idak hahú konta sira-nia istória hodi hakerek iha livru boot ida nu’udar dokumentu ba istória iha futuru. Tanba istória funu naruk kada veteranu iha Timor-Leste mak sei haforsa nasaun Timor-Leste atu moris metin liután.

“Ita-nia istória sei konta ho loloos hodi prezerva ba futuru,” Lere Anan Timur hateten. 

Komandante F-FDTL ne’e hatutan, nia koñese didiak saudozu Renan Selak nu’udar lider FALINTIL abut iha ninia luta no defende ninia prinisipiu no vizaun, luta tinan naruk sei sai di’ak ba futuru Timor-Leste.

“Ba maluk veteranu sira, ita-nia alin Renan Selak ita la’o hamutuk iha dalan ida naruk tebes. Dalan ida ne’ebé defisil iha tinan naruk nia laran, hakat liu maluk barak ninia isin-mate ho raan fakar ba ita-nia rain,” nia dehan. 

Lere hatutan, nia rasik ho Primeiru-Ministru, Taur Matan Ruak no veteranu barak bainhira tuur hamutuk sempre ko’alia ba malu katak funu naruk ne’e sorte tebes ba sira ne’ebé sei moris, maibé funu ne’e sai tristeza mós ba feto faluk no oan-ki’ak sira ne’ebé sira-nia laen mate tiha ona maibé too ohin loron Estadu Timor-Leste seidauk tau matan atu hadia faluk no oan-ki’ak sira-nia moris.

Tuir Lere, durante ne’e nia akompaña veteranu barak ne’ebé mate ona, hanesan Saudozu Ular Rihuk ninia oan no família sira agora moris mukit tebes, tanba estadu la tau matan atu hadia sira-nia moris hanesan halo netik uma ruma no fó bolsu estudu ba oan sira.

“Ami rua Primeiru-Ministru Taur ko’alia, ita sorte depois tinan 20, ita-nia maluk rihun ba rihun mate iha ita-nia kotuk, ita sei bele hakat. Maibé ohin loron, ita forma tiha estadu, ita husik ita-nia feen faluk, ita-nia oan-ki’ak, lahatene ita Estadu tau matan ba sira ne’e ka lae. Hanesan ita-nia kamarada Saudozu Ular Rihik ninia feen no oan moris halerik, moris ho matan-been nafatin,” Lere lamenta.

Nu’udar veteranu rezistensia tinan 24, Jenerál Lere reprezenta veteranu ne’ebé laiha lian no laiha forsa, husu ba Estadu Timor-Leste atu rekoñese no dignifika veteranu nia luta hanesan pensaun vitalisia ne’ebé eis titulares sira simu iha Parlamentu Nasionál.

Iha parte seluk, Lere preokupa, nasaun ne’e ukun hosi lider rezistensia sira hanesan Prezidente Repúblika, Fransisco Guterres Lú Olo no Primeiru-Ministru, Taur Matan Ruak no Maun Boot, Kay Rala Xanana Gusmão mós veteranu nian boot, maibé too ohin loron sira seidauk hamutuk hodi halo impase politika iha rai laran sai naruk liután.

“Balun preokupa nusa maka sira labele rezolve problema. Maibé ha’u husu ba sira atu tau preokupasaun ne’e hamutuk para bele rezolve problema sira-ne’e,” nia dehan. 

Jenerál Lere hatutan, ohin loron lider sira-ne’e sei fahe malu, tanba ema sira-ne’ebé servisu ho maun boot sira maka tau aas sira-nia interese hodi halo maun boot sira mós haluha tiha atu tau matan no rezolve problema veteranu iha Timor-Leste.

Jornalista: Eugénio Pereira

Editór: Cancio Ximenes

HAKEREK NO HATÁN

Please enter your comment!
Please enter your name here