Aniceto Guterres, Prezidente Parlamentu Nasional. Imajen/Antonio Goncalves

DILI, 16 setembru 2020 (TATOLI)—Prezidente Parlamentu Nasionál, Aniceto Longuinhos Guterres Lopes hateten, ohin, baixa ona proposta-lei Orsamentu Jerál Estadu (OJE) 2020 ba Komisaun C (Finansa Públika) hodi halo apresiasaun durante 24 oras.

Notísia Relevante: PR Lú Olo husu PN debate OJE 2020-2021 ho krítiku no konstrutiva

Anúnsia admisun no baixa ba Komisaun C (Finansa Públika) kona-ba proposta-lei  númeru 22/V (3a)-Orsamentu Jerál Estadu (OJE) 2020 entrega diretamente hosi Prezidente Parlamentu Nasionál, Aniceto Longuinhos Guterres Lopes ba Prezidente Komisaun C, Deputadu Maria Angélica Rangel.

Prezidente Parlamentu Nasionál informa ba deputadu sira katak proposta OJE 2020 ne’e Governu husu debate ho karáter urjénsia.

“Meza admite proposta-lei orsamentu ne’e atribui kedas kopia ba bankada parlamentár sira no baixa ba Komisaun C para halo apresiasaun ba períodu urjénsia ho prazu 24 oras tuir rejimentu, nune’e mós baixa ba komisaun espesializada permanente sira hotu, ohin kedas ita baixa kedas ba Komisaun C,” Aniceto Guterres informa liuhosi plenária Parlamentu Nasionál hodi entrega kedas ba Komisaun C, kuarta ne’e.

Tanba ne’e, Prezidente Parlamentu Nasionál marka plenária estraordinária ba aban lorokraik nune’e Komisaun C bele apezenta relatóriu no pareser ba plenária.

Rejimentu Parlamentu Nasionál artigu 97 (Prosesu urjente) alínea 1 hateten, ba kualkér projetu ka proposta-lei ka rezolusaun bele uza prosesu urjente.

Alínea 2 hosi artigu ne’e hatutan, inisiativa ba prosesu urjente kompete ba Deputadu sira, ba bankada parlamentár sira ka ba Governu.

Alínea 3 hosi artigu ne’e esplika, pedidu ba urjénsia ne’e haruka ba komisaun kompetente, ne’ebé sei apresia iha prazu oras 24 nia laran, no tenke elabora pareser fundamentada.

Alínea 3 hosi artigu 97 ne’e subliña, pareser ne’e elabora tiha, Plenáriu sei delibera kona-ba urjénsia, no debate organiza hosi Konferénsia Reprezentante Bankada Parlamentár sira-nian.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here