Prezidente Repúblika,Francisco Guterres Lú Olo. Imajen Tatoli/António Gonçalves

DILI, 15 setembru 2020 (TATOLI)—Prezidente Repúblika (PR), Francisco Guterres “Lú Olo”, atu debate Orsamentu Jerál Estadu (OJE) 2020 ho krítiku, nakloke, onestu, responsável no kontrutiva.

Notísia RelevanteGovernu submete proposta OJE 2020 ba PN no husu debate ho karatér urjénsia

Prezidente hateten, ohin, Governu hatama  fali Proposta Lei Orsamentu Jerál Estadu 2020 iha Parlamentu Nasionál, to’o  15 outubru, Governu sei submete tan Proposta Lei Orsamentu Jerál Estadu ba 2021.

“Prezidente Repúblika no Povu Timor-Leste hein katak Ita-Boot sira bele halo debate ida-ne’ebé krítiku, nakloke, onestu, responsável no konstrutivu. Debate ida ne’ebé reflete, reprezenta no hatán ba nesesidades no hakarak Povu nian, Povu ne’ebé hili Ita-boot sira atu reprezenta sira iha Uma-Fukun ida-ne’e,”  Prezidente Repúblika, Francisco Guterres “Lú Olo”, hato’o mensajen ne’e iha ámbitu abertura ba sesaun lejizlativa datoluk ba lejislatura dalima iha plenária Parlamentu Nasionál, tersa ne’e.

Prezidente Repúblika hein katak Deputadu sira sei tetu no deside kona-ba  proposta orsamentál sira-ne’e, ho konsiénsia nu’udar reprezentante Povu nian.

“Hanesan Reprezentante Povu nian, Ita-Boot sira tenke asegura mós katak rekursu finanseiru sira-ne’ebé tau ona iha orsamentu, tuir kritériu sira-ne’ebé hatuur iha lei, sei aprova iha tempu badak atu nune’e bele aloka rekursu sira-ne’e ba atividade hirak ne’ebé sei lori benefísiu ba ita-nia Povu no sosiedade en-jerál.

Prezidente Repúblika, Francisco Guterres “Lú Olo hato’o votu katak Sesaun Lejizlativa ne’e sai produtivu tebes.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here