Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos. Imajen Tatoli/Egas Cristovão

DILI, 06 agostu 2020 (TATOLI)-Vise Primeiru-Ministru no Ministra Solidariedade Sosiál no Inkluzaun (MSSI), Armanda Berta dos Santos, halo aprezentasaun  ba Konsellu Ministru (KM), kona-ba opsaun polítika lejislativa ba fundu rezerva seguransa sosiál no modelu jestaun.

Ministru Prezidénsia Konsellu Ministru, Fidelis Manuel Leite Magalhães, esplika objetivu hosi fundu ne’ebé kria liuhosi lei númeru 12/2016, loron 14 novembru ne’e ho intensaun garante bainhira iha kazu ema oituan maka halo kontribuisaun no ema barak maka simu.

“Konsellu Ministru  rona no haree oinsá fundu seguransa sosiál ne’e iha futuru bele jere osan ho di’ak, nune’e fundu ne’e bele boot liután. Tanba dala ruma iha situasaun balun kontribuente ne’ebé kontribui ba seguransa sosiál ne’e oituan liu do que ema ne’ebé maka simu, entaun iha situasaun hanesan ne’e Governu presiza buka dalan,” dehan Ministru Fidelis, hafoin ramata  reuniaun KM estraordinária iha Palásiu Governu, kinta ne’e.

Haree ba populasaun ne’ebé ho idade avansadu no aumentu esperansa moris, maka rejime siguransa sosiál presiza kontinua iha rezerva osan atu selu benefisiáriu sira, sein nesesidade atu husu ba jerasaun foun hodi halo esforsu boot ida (kontribuisaun), atu garante ba sira-nia benefísiu iha futuru.

Sistema ne’e bazeia ba prinsípiu igualdade, ekidade, solidariedade entre jerasaun sira no iha jerasaun hanesan no responsabilidade públiku, ne’ebé prevee iha Konstituisaun Repúblika.

Iha biban reuniaun ezekutivu, aprezenta mós opsaun sira ba konstituisaun no estrutura ba fundu, nune’e mós opsaun ba jestaun masimizasaun iha valór ativu sira, maibé opsaun hirak ne’e MSSI sei aprezenta no sei ko’alia filafali ho ezekutivu sira iha sorumutuk KM tuirmai.

“Ita tenke halo planu ne’ebé di’ak iha tempu naruk, nune’e bainhira situasaun akontese karik  fundu rezerva ne’e iha nafatin osan atu sai hanesan opsaun balun atu loke dalan ba investimentu fundu ne’e rasik no bele iha retornu ba investimentu ne’e rasik,” nia subliña.

Governante ne’e haktuir, iha diskusaun ámbitu KM rona opsaun sira no iha tempu tuirmai sei aprezenta dekretu lei ka proposta lei sira atu bele implementa ho di’ak.

Fidelis refere, daudaun ne’e uza métodu bainhira inisiativa sira ne’e iha, proposta sira antes mai KM membru Governu sira ho sira-nia ekipa tenke aprezenta opsaun polítika lejizlativa.

“Se lae bainhira aprezenta lei iha Konsellu Ministru, ita ko’alia direitamente lei de’it, entaun ita la diskute ho kle’an kona-ba intensaun hosi lei ne’e saida. Agora importante iha métodu ne’e atu ita bele halo diskusaun kle’an kona-ba intensaun lei loloos, ninia impaktu polítiku ne’e saida no benefísiu ba nasaun ne’e saida,” Ministru realsa.

Jornalista: Natalino Costa

Editora: Julia Chatarina

 

HAKEREK NO HATÁN

Please enter your comment!
Please enter your name here