Transportasaun mákina pezadu hosi Dili-Suai ho karga hamutuk 38, ba preparasaun perfurasaun mina-matan iha Kosta Sul. Imajen/Timor Resources

DILI, 16 setembru 2020 (TATOLI)-Relasiona ho situasaun pandemia COVID-19 ne’ebé afeta ba nasaun tomak inklui Timor Leste, Kompañia Timor Resources Pty.Ltd hatama ona pedidu ba Governu atu fó autorizasaun tékniku estranjeiru sira bele mai Timor-Leste hodi bele kontinua serbisu instala mákina fura mina-matan lima iha rai-maran Kosta Súl, área Suai no Manufahi.

“Atividade perfurasaun mina-matan seidauk la’o tanba situasaun COVID-19 no Estadu Emerjénsia, ne’ebé la permite traballadór estranjeiru mai, maibé Timor Resources hatama ona pedidu ba Governu atu autoriza kompañia nia tékniku estranjeiru bele mai hodi halo instalasaun halo perfurasaun,”  tenik Diretór Operasaun Timor Resources, Luís Pereira ba Agência Tatoli via telefónika, kuarta ne’e.

Nia dehan, empreza australiana ne’e submete pedidu autorizasaun ba Primeiru-Ministru no Ministériu Interiór inklui Ministériu Saúde, maibé seidauk iha resposta.

Tuir planu bainhira hetan aprovasaun hosi Governu, traballadór estranjeiru sira sei mai hosi Indonézia iha outobru no novembru 2020.

Notísia Relevante: Mákina Drilling Rig ba Perfurasaun Mina-Matan To’o Ona Suai

Ekipa tékniku empreza ne’e  atu halo project commissioning ba mákina ne’ebé to’o ona iha Suai, tanba serbisu instalasaun ne’e presiza fulan-tolu no hetan verfikasaun hosi Autoridade Nasionál Petróleu no Minerál (ANPM) hafoin komesa halo perfurasaun.

Maski nune’e, Dirijente ne’e garante empreza kontinua hatudu kompromisu no prontu atu halo perfurasaun mina-matan.

Daudaun ne’e, empreza  monta hela ekipa seguransa no manutesaun iha terrenu atu kontinua hein mákina sira to’o  hotu no enjeñeiru sira hosi Indonézia, Amérika, Nova Zelándia no Austrália maka atu halo instalasaun no perfurasaun.

Tuir planu, Timor Recourses hakarak  foku uluk ba posu dahuluk ho naran Karau ne’ebé lokaliza iha suku Matai, postu administrativu Maucatar, munisípiu Covalima, hafoin mak muda fali ba posu daruak lokaliza iha aldeia Sanfuc, suku Camenaça, postu Administrativu Suai Villa, munisípiu Covalima.

Parte autoridade kontinua akompaña nafatin atividade kompañia sira iha terrenu tanba antes halo perfurasaun ona peskiza jeofízika ho sistema sízmiku no magnétiku ne’ebé ekonomikamente no téknikamente viável atu halo perfurasaun.

Timor Resources sei halo perfurasaun ba mina-matan iha rai-maran área Betano no Manufahi iha bloku lima.

Atividade iha bloku hirak ne’e hahú ona iha tinan-2017, ho peskiza jeolójiku no estudu sira seluk no iha outubru 2018 hala’o ona teste sízmiku sira iha Bloku A.

Empreza uza ona sistema vibroseis, ne’ebé hanesan alternativu ida kontroladu hosi teste sízmiku sira.

Sistema ne’e rasik hanesan alternativu ida kontroladu hosi teste sízmiku, enkuantu bloku C hala’o ona teste vibroseis iha zona Betano, entre postu administrativu Alas.

Planu atuál haree ba perfurasaun tolu to’o lima iha bloku A, ne’ebé bloku idaidak to’o metru 2.000 no ho totál kustu millaun $35.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here