Mákina perfurasaun mina-matan Drilling Rig to’o iha Suai husi EUA. Imajen/Timor Resources Pty.Ltd.

DILI, 20 abríl 2020 (TATOLI) – Diretór Operasaun Kompañia Timor Resources Pty.Ltd, Luís Pereira, informa mákina perfurasaun mina-matan ho naran Drilling Rig to’o ona iha Munisípiu Kovalima, Postu Administrativu Suai, husi Estadu Unidu Amérika (EUA) iha semana rua liubá.

“Ami Empreza Timor Resources mak hanesan na’in ba projetu ne’e, maibé kontrata fali sub-kontratór husi Company Eastern Drilling husi EUA hodi lori nia mákina Drilling Rig ho ró no daudaun ne’e iha ona Suai”, tenik Diretór Luís ba Tatoli via telefónika, segunda ne’e.

Nia dehan, maski mákina iha ona Suai maibé presiza hein tékniku no enjiñeiru sira mai halo instalasaun hafoin halo perfurasaun.

“Ita-nia situasaun daudaun iha Estadu Emerjénsia, ne’ebé fronteira sira taka hotu. Tanba ne’e tékniku sira seidauk bele mai halo instalasaun ne’ebé ita hein de’it Estadu Emerjénsia ramata lai”, Dirijente Empreza ne’e akresenta.

Nia adianta, tékniku sira ne’e husi nasaun Amérika, Indonézia, Austrália no Nova Zelándia, ne’ebé sei hamutuk ho tékniku timor-oan, maibé tékniku timor-oan halo iha área balun de’it, enkuantu área seluk sei presiza espesialista husi rai-li’ur.

“Daudaun ne’e ami monta de’it seguransa sira iha fatin ne’ebé sasán ka mákina sira tau ona hodi hein to’o tékniku no enjeñeiru sira to’o mai”, nia salienta.

Timor GAP no empreza Timor Resources atu hahú iha tinan ne’e nia rohan hodi halo perfurasaun dahuluk iha fatin tolu to’o lima hosi bloku ida ne’ebé maka iha lisensa ona hodi halo’o atividade esplorasaun ho produsaun petróleu nian iha Timor-Leste.

Tékniku sira identifika ona fatin tolu iha Bloku A hanesan fatin ne’ebé potensiál ba perfurasaun, tanba ne’e hein hodi hahú iha tinan ne’e.

Entretantu, bloku A iha Munisípiu Kovalima no Bloku C iha Munisípiu Manufahi ho Ainaru ne’ebé hola parte ona iha rejime hosi kontratu partilla produsaun nian ba Timor Resources, ne’ebé hanesan empreza Australiana ida ne’ebé halo parte hosi Nepean Group.

Enkuantu, bloku B haruka ona ba Timor GAP Onshore Block, ne’ebé hanesan subsidiáriu ida hosi empreza públika petrolífera Timor-Leste nian (Timor GAP).

Planu inisiál ho tinan hitu ba esplorasaun prévia hosi peskiza tinan-rua, hosi tinan daruak ba tinan datoluk hahú ho perfurasaun to’o tama tinan-haat maka kompleta estudu no hosi tinan-lima ba oin iha posibilidade hahú esplorasaun.

Jornalista: Florencio Miranda Ximenes

Editora: Julia Chatarina

1 KOMENTÁRIU

  1. Espera katak Timor Resources no liu husi programa perfura mina iha TL, Hodi bele hamenus PENGANGGURAN iha ita rain.

HAKEREK NO HATÁN

Please enter your comment!
Please enter your name here