Governu Timor-Leste liuhosi Ministériu Asuntu Kombatentes Libertasaun Nasionál (MAKLN) hamutuk no familia sira hala’o serimónia funebre ba Saúdozu Veteranu Rezistensia Faustino dos Santos “Renan Selac” iha Jardin dos Herrois e Martires da Patria Lautem.  Imajen TATOLI/Eugénio Pereira.

LAUTÉM, 15 setembru 2020 (TATOLI)–Lider Rezisténsia no Komandante En-Xefe das FALINTIL, Kay Rala Xanana Gusmão, konsidera Saúdozu Veteranu Rezistensia Faustino dos Santos “Renan Selak” nu’udar eroi boot ida iha prosesu luta ba libertasaun nasionál Timor-Leste.

Notísia Relevante: Prezidente CCLN: “Renan Selak husik todan ida mai ami”

Xanana hateten, nia parte koñese di’ak aaudozu nu’udar aaswa’in ida ne’ebé brani tebes hamutuk ho nia gerrileiru sira seluk luta ba Timor-Leste nian independénsia durante tinan 24 nia laran.

“Ha’u hakruuk ba familia tomak hosi Saudozu Renan Selak ne’ebé husik ona ita. Ho respeitu tomak mós ba maluk sira hotu ne’ebé hamutuk ho familia Saudozu Renan Selak nian atu haloot nia isin-mate iha fatin ida-ne’e. Nu’udar maun ida ba Renan Selak, iha tempu naruk iha ai-laran, ha’u so bele dehan katak ho triste tebes mak ha’u rona nia husik tiha ona ita. Hafodak liu, tanba iha semana ida-nia laran, ami na’in-rua (2) sei hasoru malu iha Assailanu-Lautem iha loron 30 Agostu 2020,” dehan Xanana Gusmão liuhosi nia mensajen ikus ne’ebé lee hosi Veteranu Rezisténsia Rejiaun I, Eurico Rosario dos Santos “Ikuzunik”, tersa ne’e.  

Lider Rezistensia ne’e dehan, mezmu Renan Selak mate ona maibé ninia luta sai nafatin sai memória ba Estadu Timor-Leste no timoroan hotu katak luta ne’ebé nia hamutuk ho eroi sira seluk halo kontribuisaun boot hodi libertasaun patria Timor-Leste.

“Renan Selak ba hamutuk ho eroi martires sira ne’ebé fo isin-lolon tomak hodi funu hodi ita hetan ukun rasik aan. Ne’e duni, Renan Selak iha Timor-Leste nia istoria libertasuan nia na’in. Ohin, ha’u hatene, família ho amigu sira triste. Loos duni, maibé ha’u husu ba maluk hotu atu sente orgulllu boot tanba Renan Selak ita-nia eroi libertasaun ida,” Xanana hateten.

Xanaan haktuir, nia nunka bele haluha ho memória luta ne’ebé nia iha hamutuk ho saudozu no eroi sira seluk hodi hahú organiza funu hosi Ponta Leste ba loromonu, hodi hetan ukun aan sosa ho mate no terus durante tinan 24 too hetan Liberdade liu hosi festa konsulta populár 30 Agostu 1999.

“Renan, ó husik tiha ona ami! Ami husu ba Maromak atu fó nafatin tulun ne’ebé ó merese iha ninia Kadunan Santo! Adeus, irmaun! Ho eroi no martires sira hotu, ami husu tau matan netik ba povu ne’e nia moris no rai ne’ebé imi halo sakrifisiu tomak, ninia destinu. Tulun ami ne’ebé sei moris atu hatene serbi povu ne’e no rai doben Timor-Leste,” Xanana hateten.

Entretantu Sauduzu Renan Selak haloot iha Jardin dos Herrois e Martires da Patria Lautém ho serimónia parade militár F-FDTL no hetan partisipasaun másimu hosi familia, reprezentante veteranu regiaun I, II, III no IV, membru Governu, deputadu no konvidadu sira seluk tan.

Jornalista: Eugénio Pereira

Editór: Cancio Ximenes

HAKEREK NO HATÁN

Please enter your comment!
Please enter your name here