Membru F-FDTL sira hiit mate isin Faustino dos Santos ‘Renan Selak’, iha seremónia funebre, iha osuáriu no semitériu espesiál Lautém, tersa (15/09). Imajen Tatoli/Eugênio Pereira

LAUTÉM, 15 setembru 2020 (TATOLI)-Prezidente Konsellu Kombatente Libertasaun Nasionál (CCLN, sigla portugés), Vidal de Jesus ‘Riak Leman’, konsidera saudozu Faustino dos Santos ‘Renan Selak’ husik hela todan ba estrutura CCLN.

“Nia husik tristeza boot ba Konsellu Kombatente Libertasaun Nasionál no kompañeiru husik hela todan ida mai ami,” dehan Riak Leman iha seremónia funebre saudozu, iha osuáriu no semitériu espesiál Lautém, tersa ne’e.

Iha 20 dezembru 2019, kongresu nasionál dahuluk Veteranu Kombatente Libertasaun Nasionál iha Dili, ne’ebé hala’o durante loron rua, hosi loron 19 to’o loron 20 dezembru 2019, hili ona estrutura ba períodu 2019 to’o 2024 no Renan Selak eleitu nu’udar Vise CCLN, hamutuk ho Mario Nicolau dos Reis no Inês de Almeida.

Notísia Relevante: Riak Leman, Prezidente Konsellu Nasionál Veteranu

“Ita harii CCLN no tuur iha estrutura hodi tau hanoin hamutuk no lori veteranu sira nia hanoin atu rezolve veteranu sira nia problema iha munisípiu 13,” tenik veteranu ne’e.

Reprezenta veteranu no kombatente konsellu nasionál, nia fó onra ikus ba ninia amigu di’ak.

“Ami fó onra boot ba kompañeiru Renan Selak ne’ebé husik hela ita. Nia laiha ona maibé istória saida mak ita halo hodi liberta rai ne’e to’o ukun-an sei la lakon iha povu no veteranu hotu nia kakutak,” hateten Prezidente Konsellu.

Antes lori saudozu haloot iha nia fatin ikus, família matebian realiza uluk seremónia kulturál ‘oho kuda aman’, ho objetivu ida matebian sa’e iha kuda ne’e hodi bá nia fatin deskansa ikus.

Hafoin seremónia ne’e, família entrega saudozu ba CCLN, iha ninia rezidénsia aldeia Ira-ara.

Renan Selak hakotu i’is iha kinta (10/09), iha Hospital Nacional Guido Valadares (HNGV) tanba sofre moras kurasaun, pulmaun no i’is boot, hafoin halo internamentu durante semana ida.

Saudozu moris iha 01 maiu 1957, iha aldeia Ira-ara, auku Fuiloro, postu administrativu Lospalos, munisípiu Lautém.

Nia luta durante tinan 24 ba Timor-Leste nia ukun rasik-an no sai hanesan Sekretáriu Rejiaun I, Ponta Leste nian no sai nu’udar Vise-Prezidente partidu UNDERTIM no membru Parlamentu Nasionál durante lejizlatura daruak, tinan 2007 to’o 2012.

Iha tinan 2017 simu nomeasaun hanesan Prezidente Konsellu Kombatente Libertasaun Nasionál ba munisípiu Lautém.

Iha tinan 2018 hetan kondekorasaun husi Prezidente Repúblika, Francisco Guterres Lú Olo, ho Medalla Orden Timor-Leste , hanesan rekoñesimentu ba méritu no kontribuisaun hosi buat hirak ne’ebé nia halo ona ba povu no nasaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here