Vidal de Jesus “Riak Leman". Imajen/Espesiál

DILI, 20 dezembru 2019 (TATOLI)-Primeiru kongresu Nasionál Veteranu Kombatente Libertasaun Nasionál iha Dili, ne’ebé hala’o durante loron rua; husi loron 19 to’o loron 20 dezembru 2019, hili ona veteranu Vidal de Jesus “Riak Leman” nu’udar primeiru prezidente Konsellu Veteranu Kombatente Libertasaun Nasionál ba periodu 2019-2024.

Notísia Relevante : Veteranu, “Nain ba Ukun-Aan no Riin ba Nasaun”

Iha ámbitu kongresu nasionál ne’e, kongresista sira avansa ho kandidatu prezidente pakote rua, pakote primeiru (A) maka Vidal de Jesus “Riak Leman” ho nia Vise nain tolu hanesan Faustino dos Santos ‘Renan Selak”, Mario Nicolau dos Reis no Ines de Almeida, no pakote segundu (B), kompostu husi Aquelino Guterres “Eteuko”, ho nia vise nain tolu Paulo dos Santos, José António Samalarua, Gregoria de Sousa.

Husi rezultadu votasaun pakote A ho votu afavór maioria absoluta 145 no pakote B 14, portantu  ho votante  159 mak ezerse nia votu  lejítimu, tanba ne’e kandidatu ho númeru primeiru (A) mak sai vensedór.

Prezidente Eleitu Vidal de Jesus ‘Riak Leman’ deklara prontu atu servisu ho veteranu iha territóriu laran hodi luta ba moris di’ak veteranu nian, tanba iha tempu ukun-an veteranu barak la hetan atensaun ida di’ak.

“Atu mantén komunikasaun ida di’ak ho estrutura veteranu iha munisípiu hotu hodi identifika problema sira ne’ebé veteranu sira enfrenta,” hateten Riak Leman iha nia diskursu iha Centro Convenção Dili (CDD).

Durante nia mandatu, Riak Leman ho nia estrutura sei ko’alia ho governu atu tau atensaun hodi fó tratamentu saúde espesiál ba veteranu sira no halo planu atu konserva sítiu istóriku rezisténsia nian, inklui  dezenvolve area turizmu istóriku.

Jornalista : Nelson de Sousa

Editór       : Francisco Simões

1 KOMENTÁRIU

  1. Sai ona presidebte veteranu halo favor tun ba base hodi haree took veteranu balun ate agora sei dauk hetan sira nia direti ate agora sei parado hela

HAKEREK NO HATÁN

Please enter your comment!
Please enter your name here