Funsionariu Ministeriu Saude Uza ona ekipamentu jinastiku ne'ebe apoiu husi Organizasaun Mundial Saude.Imajen/Midia MS.

DILI, 15 setembru 2020 (TATOLI)-Organizasaun Saúde Mundiál (OMS), segunda (14/09), entrega ona ekipamentu jinástiku ba Ministériu Saúde atu funsionáriu sira bele uza hodi halo ezersísiu ba prevene  moras la hadae’t hanesan kurasaun.

Reprezentante OMS iha TL, Rajesh Pandav, maka entrega ekipamentu ne’e ba Vise Ministru-Saúde, Bonifácio Maucoli dos Reis iha Caicoli Dili, no ekipamentu ne’e instala ona iha edifísiu antigu Ministériu Saúde.

Fasilidade jinástiku hirak ne’e maka hanesan double sit-up boards, double air walker, seated chest press, tai chi spinners, hip twister, seatede leg press, elliptical cross trainer.

Notísia Relevante :OMS Apoiu Ekipamentu Prevensaun Coronavirus ba MS

Vise Ministru, Bonifácio Maucoli dos Reis, agredese ba apoiu ne’e tanba bele ajuda ona funsionáriu sira atu halo ezersísiu.

“Ita hatene moras ida ne’ebé mak agora aas liu iha Timor-Leste mak moras la hada’et,” katak Maucoli.

Governante ne’e husu ba profisionál saúde no funsionáriu MS nian atu uza fasilidade ne’e ho koidadu. “Seguransa sira toma konta para uza to’o tempu naruk,” tenik Vise Ministru.

Iha biban hanesan Diretóra Prestasaun Saúde, Odete da silva Viegas, hateten moras la hada’et mós kontribui númeru mortalidade a’as iha Timor-Leste.

”Meius ne’ebé mak atu fasilita ita mak hanesan hala’o ezersísiu entaun ida ne’e fasilita ona ita-nia profisionál saúde sira atu uza materiál ne’ebé mak iha uza ho kuidadu,” nia dehan.

Ikusliu, Reprezentante OMS, Rajesh Pandav, promete ba futuru sei fó mós apoiu ekipamentu jinástiku ne’e ba Servisu Saúde iha Munisípiu inklui Rejiaun Administrativa Espesiál Oé-Cusse Ambeno (RAEOA).

“Ha’u kontente haree ekipamentu sira ne’ebé mak tau iha fatin públiku sira ba maluk sira husi liur bele uza halo ezersísiu husi dader to’o lokoraik no husi lokoraik to’o oras 11 kalan ida ne’e importante tebes bainhira ita uza ho didi’ak tanba ita uza ne’e atu asegura ita-nia ijiéne ba moras la hada’et nian ne’ebé mak aas liu iha Timor laran tomak,”katak Rajesh Pandav.

Entretantu, oras ne’e OMS mós instala ona ekipamentu jinástiku iha fatin públiku hanesan Largo Lecidere, Jardim 05 de Maiu, Jardim iha Mandarin Dili, atu públiku bele asesu hodi halo jinástiku.

Notísia Relevante :OMS konsidera sistema saúde iha família importante

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here