Ministru do Ministério Para Os Assunto dos Combantentes da Libertação Nacional, Julio da Costa Sarmento “Meta Malik”. Imajen TATOLI/Eugenio Pereira.

LAUTÉM, 15 setembru 2020 (TATOLI)—Governu liuhosi Ministru do Ministério Para Os Assunto dos Combantentes da Libertação Nacional, Julio da Costa Sarmento “Meta Malik”,  preokupa ba Ossuáriu sira ne’ebé iha fatin-fatin (iha territóriu nasionál) lahó kondisaun di’ak tanba bainhira tempu udan, bee bele tama hodi habokon mate-ruin sira ne’ebé hatuur iha laran.

Notísia Relevante: Xanana Gusmão: “Renan Selak eroi boot ba libertasaun nasionál”

“Mate-ruin sira iha Ossuáriu laran maibé bee sulin tama ba laran. Ita preokupa kondisaun fatin haloot mate ruin. Ha’u seidauk halo planu di’ak atu hadi’a tanba Governu monu-hadeer. Ita-nia interese mak dudu malu de’it, rasta malu de’it, maibé ita la tau interese hodi valoriza ba ita-nia saudozu sira,” dehan Julio da Costa Sarmento “Meta Malik”, ba Agência TATOLI hafoin haloot saudozu, Faustino dos Santos “Renan Selak” nia mate-isin iha Ossuáriu Munisípiu Lautém, tersa ne’e.

Governante ne’e preokupa ba mate-ruin sira ne’ebé hada hela iha Ossuáriu laran maibé Estadu seidauk finaliza hodi haloot didi’ak, tanba Timor-Leste la moris iha pás no estabilidade maibé ho polítika halo polítiku sira hadau malu poder iha nasaun laran.

“Ita hatene katak mate ruin hada hela maibe ita la finaliza sira-nia ruin sira hodi haloot atu ita bele halo dezenvolvimentu ba rai no povu ida-ne’e ho di’ak. Ita la moris iha pás no estabilidade maibé ita moris maka ida tun ida sa’e,” nia dehan.

Governante ne’e espera katak Orsamentu Jerál Estadu (OJE) tinan oin bele fasilita atu haloot di’ak liután mate-ruin sira iha Ossuáriu laran.

Ministru ne’e informa, ohin loron ne’e mate-ruin hamutuk 14 mil iha fatin-fatin iha jardin erói maibé depois la konsege haloot hotu tanba remodelasaun ne’ebé akontese ba ha’u (Meta Malik) iha 2012.

“Maibé, ohin, ha’u sai ministru sei hola responsabilidade atu kontribui ba Estadu hodi solusiona problema hirak ne’e,” nia hateten.

Jornalista: Zezito Silva

Editór: Cancio Ximenes

HAKEREK NO HATÁN

Please enter your comment!
Please enter your name here