Ministru Asuntu Parlamentár Komunikasaun Sosiál (MAPKOMS), Francisco Jerónimo no Vise-Ministra Finansa, Sara Lobo Brites Entrega OGE 2020 ba Prezidente Parlamentu Nasionál, Aniceto Guterres iha PN. tersa (15/09). Imajen Tatoli/ Egas Cristóvão

DILI, 15 setembru 2020 (TATOLI)—Governu liuhosi Ministériu Finansa (MF) submete proposta Orsamentu Jerál Estadu (OJE) 2020 ba Parlamentu Nasionál no husu atu debate ho karáter urjénsia.

Notísia RelevantePR Lú Olo loke ona sesaun lejislativa foun ba lejislatura dalima  

Proposta OJE 2020 ne’e submete hosi Ministru Finansa no Vise-Ministra Finansa, Fernando Hanjam no Sara Lobo, no Ministru Asuntu Parlamentár no Komunikasaun Sosiál, Francisco Jerónimo ba Prezidente Parlamentu Nasionál Deputadu Aniceto Longuinhos Guterres Lopes.

Governu aprezenta dokumentasaun kona-ba proposta OJE 2020 inklui lei orsamentu no apoiu ho livru orsamentál mak hanesan livru 1 (panorama orsamentál), livru 2 (planu anuál), livru 3A (fundu infraestrutura), livru 3B (munisipál), livru 3C (RAEOA-ZESSM), livru 4Bb (rúbrika orsamentál), livru 5 (parseiru dezenvolvimentu) no livru 6 (fundu espesiál-FDCH).

“Iha proposta ne’e Governu husu ho karáter urjénsia nune’e Parlamentu Nasionál ohin kedas ekipa tékniku sira sei prepara nota téknika hodi halo plenária estraordinária ida, atu envia pedidu urjénsia ne’e hodi hetan apresiasaun hosi Komisaun C (Finansa Públika),” Prezidente Parlamentu Nasionál, Aniceto Longuinhos Guterres Lopes informa liuhosi Konferénsia Imprensa hamutuk ho Governu iha salaun Konferénsia Parlamentu Nasionál, tersa ne’e.

Aniceto Guterres hateten, tuir Rejimentu Parlamentu Nasionál Komisaun C sei halo apresiasaun 24 oras sura hosi simu proposta-lei ne’e.

“Tanba ne’e bainrua mós sei iha plenária estraordinária, atu apresia no deside pedidu ho karáter urjénsia ne’e hosi proposta OJE 2020 ninian. Se plenária deside karáter urjénsia ida-ne’e, bainrua kedas prosesu sira hanesan orsamentu ninian hahú kedas,” nia dehan. 

Maibé, nia dehan, bainhira PN aprova pedidu karáter urjénsia ne’e entaun prazu audiénsia, prazu diskusaun sei inkurta (hadadak) hotu no projesaun iha loron ualu (08) outubru sei halo aprovasaun iha finál globál ba proposta OJE 2020 nian.

Nune’e, nia dehan, iha loron 09 outubru dadeersan sei halo redasaun finál no lorokraik sei haruka diploma OJE 2020 ba Prezidente Repúblika halo promulgasaun.

Proposta OJE 2020 ne’e, Governu aprezenta ba Parlamentu Nasionál biliaun ida-resin.

Tuir Rejimentu Parlamentu Nasionál (RPN) artigu 55 (Prioridade ba solisitasaun hosi Governu) alína 1, Governu bele husu prioridade ba diskusaun kona-ba asuntu ba interese nasionál ne’ebé tenke rezolve urjente.

Alínea 2 hosi artigu ne’e hateten, Prezidente Parlamentu mak deside atu fó prioridade ka lae, haofoin rona tiha Konferénsia.

Entretantu RPN artigu 56 (debate urjente) alínea 1 dehan, bainhira bele justifika, bankada parlamentár no Governu bele hussu ba Prezidente atu halo debate urjente.

Alínea 2 hosi artigu 56 ne’e fundamenta, debate urjente sei hala’o iha loron hitu nia laran, liutiha Konferénsia aprova ninia realizasaun.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here