Prezidente Repúblika, Francisco Guterres Lú Olo. Imajen/ António Gonçalves

DILI, 15 setembru 2020 (TATOLI)—Prezidente Repúblika (PR), Francisco Guterres “Lú Olo”, ohin, loke ona sesaun lejislativa datoluk ba lejislatura dalima liuhosi sesaun solene ne’ebé hala’o iha Parlamentu Nasionál. 

“Hanesan Prezidente Repúblika mai halo abertura, susesu ba deputadu sira-ne’ebé ohin hahú fali sira-nia kna’ar hanesan deputadu. Prezidente mai iha órgaun soberania Parlamentu Nasionál loke sesaun lejizlativa. Hosi  tribuna ida-ne’e ha’u dirije saudasaun espesiál ba Povu Timor-Leste no mós ba Ilustre Deputada no Deputadu sira ne’ebé mak reprezenta ita-nia Povu iha Uma-Fukun ida-ne’e,” Prezidente-Repúblika, Francisco Guterres “Lú Olo”, ko’alia iha Parlamentu Nasionál, tersa ne’e.

Xefe Estadu haktuir, iha loron 17 setembru 2018, katak tinan rua liubá, nia hakaat ba iha Uma Demokrasia ida-ne’e, hodi hato’o liafuan ruma ba Povu Timor-Leste, ba Deputadu no Membru Governu sira, iha okaziaun Sesaun Solene hahú Sesaun Lejislativa Dahuluk ba V Lejislatura Parlamentu Nasionál nian.

Iha duni tinan 2018 mak VIII Governu Konstitusionál hahú ukun ho rezultadu eleisaun ne’ebé aliansa pré-eleitoral–Aliansa Maioria ba Progresu–manán iha eleisaun lejislativa antesipada iha loron 12 fulan-Maiu.

“Importante hateten iha-ne’e katak Parlamentu Nasionál mak fó lejitimidade no sustentabilidade ba Governu ne’ebé de’it. Maioria parlamentar ne’ebé tane Governu bele harii tuir rezultadu eleisaun no bele mosu mós, iha momentu ne’ebé de’it, durante períodu Lejislatura,” nia hateten. 

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here