Destruisaun ba matéria prima droga ho kuantidade tonelada 160 iha Aldei Gisu-Loes, Postu Administrativu Maubara, Munisípiu Liquiça, 10 setembru 2020. Imajen Tatoli/António Gonçalves

DILI, 11 setembru 2020 (TATOLI)-Prokuradór Jerál  Repúblika (PGR, sigla portugés), José Ximenes, prefere halo atualizasaun ba lei droga nian  hodi prevee tan matéria balun.

Notísia Relevante : Destruisaun matéria prima droga iha TL tama kategoria boot iha ASEAN

José Ximenes hateten, matéria prima droga sira nian ne’ebé konsta husi artigu 8, Lei Droga nian, númeru 2/2017, ne’ebé remete ba aneksu sira A-C daudaun ne’e ladún apár ona, presiza alarga tan para bele prevee tan matéria balun kona-ba droga ninian.

Prokuradór Jerál Repúblika, José da Costa Ximenes. Imajen Tatoli/Dok

“Baze legal lei númeru 2/2017 kona-ba droga la kontein iha artigu 8 aneksu A to’o C matéria droga sira, tanba ne’e arguidu sira la hetan kondenadu no hetan livre. Nune’e presiza atualiza lalais  matéria báziku ba droga aneksa A to’o C , ita bele haree iha nivel mundiál oinsá hodi atualiza tau naran ai-moruk droga sira hodi bele  kriminaliza,” afirma PGR José Ximenes, ohin, ba jornalista iha Komandu Jerál PNTL, Caicoli, Dili,

Nia hateten, matéria prima ba droga agora Tribunál la prevee iha lei atuál entaun Tribunál deside absolve kazu sira ne’ebé durante ne’e akontese, maibé matéria hirak ne’e Tribunál deside afavór ba Estadu hodi halo destruisaun.

PGR José Ximenes nia parte hato’o ona Primeiru-Ministru, Taur Matan Ruak ho Parlamentu Nasionál, atu haree ba kestaun ne’e bele halo atualizasaun.

 José Ximenes hatutan, ho frajilidade  ohin loron Timor-Leste hasoru  presiza  iha rekursu kontrolu maka’as iha pontu entrada aeroportu, portu no parte fronteira terrestre nian. Se lae, Timor-Leste  la’ós sai de’it fatin tránzitu ba droga, maibé sai mós tránzitu matéria prima droga.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here