destruisaun ba matéria prima droga ho kuantidade tonelada 160 iha Aldei Gisu-Loes, Postu Administrativu Maubara, Munisípiu Liquiça, 10 setembru 2020. Imajen Tatoli/António Gonçalves

LOES, 10 setembru 2020 (TATOLI)- Desizaun Estadu Timor-Leste hodi halo destruisaun ba matéria prima droga ho kuantidade tonelada 160 tama kategoria boot iha rejiaun ASEAN (Association of Southeast Asian Nations).

Notísia Relevante : PGR-PNTL destroi matéria báziku droga tonelada 160

Prosesu destruisaun matéria prima droga ne’e hala’o ohin, iha Aldei Gisu-Loes, Postu Administrativu Maubara, Munisípiu Liquiça, ne’ebé lidera husi Prokuradór Jerál Repúblika, José Ximenes no Komandante Jerál PNTL, Komisáriu Faustino da Costa, inklui asiste husi ofisiál justisa sira.

Destruisaun ba matéria prima droga ho kuantidade tonelada 160 iha Aldei Gisu-Loes, Postu Administrativu Maubara, Munisípiu Liquiça, 10 setembru 2020. Imajen Tatoli/António Gonçalves

Destruisaun matéria prima droga  ho kuantidade tonelada 160 ne’e, nu’udar pasu ida hodi hatudu ba nasaun seluk katak, mezmu Estadu Timor-Leste ninia ekipa seguransa kompostu, PNTL, F-FDTL, Autoridade Aduaneira (AA) Timor-Leste liu husi Diresaun Intelijénsia no Anti-Fraude Alfándega, Polícia Científica de Investigação Criminal (PCIC) menus rekursu umanu no ekipamentu, maibé Timor-Leste iha kometimentu atu kombate krime tráfiku droga hodi lori nasaun no sosiedade  labele sai vítima no salva Timor-Leste labele sai fatin  tránzitu ba droga,

Koordenadór Ekipa Konjunta ba Prosesu Destruisaun Matéria Prima Droga, Prokuradora Lidia Soares hateten, matéria prima droga ne’e ho tipu oin-oin ne’ebé autór sira haruka husi Xina ho ninia destinasaun ikus mai Timor-Leste atu haruka fali ba nasaun viziñu hanesan Indonézia.

“Prosesu destruisaun ba totál objetu prendidu ba material báziku droga ninia kuantidade 160 tonelada ita halo destruisaun primeira faze too remata. Ha’u hakarak hateten katak, ita Timor-Leste ne’e foin primeira vés halo destruisaun ho kuantidade boot hanesan ne’e, tanba tuir informasaun ne’ebé ha’u rona ida ne’e boot liu iha ASEAN, tanba interese ema nian boot tebes atu hatama ai-moruk ne’e mai Timor-Leste,” informa Lidia Soares ba jornalista iha fatin destruisaun.

Destruisaun ba matéria prima droga ho kuantidade tonelada 160. Luiquiça, 10 setembru 2020. Imajen Tatoli/António Gonçalves

Iha fatin hanesan, Prokuradór Jerál Repúblika, José Ximenes hateten, matéria  prima droga tonelada 160 ne’e halo destruisaun tuir desizaun Tribunál nian hodi lori nasaun Timor-Leste labele sai fatin ba krime droga no fatin tránzitu ba droga.

“Ita lakohi Timor-Leste sai fatin tránzitu ba droga no materiál kímiku sira seluk tan,” tenik nia.

Prokuradór hato’o parabéns ba ekipa konjunta ne’ebé halo servisu di’ak hodi konsege deteta no halo apreensaun ba sasán hirak ne’e iha loron 14 janeiru 2018 iha Portu Dili.

“Sasán sira ne’e mai hosi Xina ho distinsaun final mai too Dili no sasán sira ne’e mai la’ós dala ida de’it, maibé fazeadamente, balun tama uluk iha 19 agostu 2017, segundu faze tama iha 20 setembru 2017, terseiru faze tama iha loron 7 novembru 2017. Tanba ne’e too iha Dili, nain ba sasán sira ne’e tenta halo deskolokasaun ba Indonézia, maibé ekipa konjunta konsege prende to’o lori prosesu ba tribunal,” José Ximenes hateten.

Mezmu Timor-Leste seidauk iha fatin fabrika ba ai-moruk droga, maibé ema sira ne’ebé tenta lori sasán mai Timor-Leste, tanba sira konsidera Timor-Leste frajil iha rekursu no ekipamentu.

“Sasán sira ne’e tama mai, tanba sira hatene katak, primeiru ita la iha fabrika no indústria no ita la iha merkadu atu prodús tan no atu halo. Mais tanba saida maka sira tenke halo? Iha razaun rua de’it, primeiru tanba Timor-Leste ninia frajilidade ba sistema  kontrolu, agora frajilidade ba sistema kontrola ne’e ha’u define ba buat rua, buat ida rekursu umanu no ida rekursu materiais,” nia hateten.

José Ximenes mós husu ba Parlamentu Nasionál tau konsiderasaun servisu ne’ebé ekipa konjunta enfrenta, nune’e oinsá halo investimentu maka’as ba rekursu no ekipamentu.

Matéria prima  ba produsaun droga ne’e rasik autoridade ekipa seguransa halo apreensaun iha tinan 2018, iha Portu Dili hamutuk tonelada 160, no prosesu justisa desizaun tribunál nian iha tinan 2019 tribunál absolve arguidu na’in-tolu, tanba konsidera artigu 8 iha lei númeru 02/2017 la prienxe.

Iha loron 14 janeiru 2018, ekipa seguransa Timor-Leste hamutuk ho  Badan Narkotika Nasional (BNN) Indonézia halo teste laboratóriu ba matéria prima hirak ne’e iha Indonézia no rezultadu hatudu katak husi ai-moruk hirak ne’e hanesan Acetaminopen, Caffeine, Carisprodol, Tramadol, Miconazole, Meloxicam, Simethicone, Allopurinol, Ausinofilia, Dapoxetine, Aminopyridine,Dexamethasone, Subtramine, Piroxicam fó indikasaun hanesan analjéziku ne’ebé bele hamosu reasaun alerjia, tee ben, ulun moras, isin manas, kabun moras, isin mean, zombi, matan dukur, la hakmatek, bilan, delirium kaman, muta, irritasaun gástrika, katar, ibun maran, laran la hakmatek, hamrook, sente kolen, irritasaun matan, dezmaia no halo kakorok no inus moras.

Efeitu husi ai-moruk hirak ne’e identifika katak, matéria prima ho naran Carisprodol,  nu’udar substánsia ida husi droga tanba ninia efeitu fó reasaun maka’as hasoru ema nia isin lolon, bele hamosu depresaun, no bainhira matéria prima Paracetamol, Carisprodol no Caffein kahur hamutuk bele prodús ai-moruk ho naran PCC, bainhira konsumu bele efeitu imajinasaun aas, alusinasaun, kontente hela de’it no halo konsumidór dependénsia ba ai-moruk ne’e.

Haree ba impaktu hirak ne’e hotu maka, prosesu destruisaun ne’e halo iha foho leten tenke dook husi abitante sira hela ne’ebé hetan aprovasaun husi Governu Timor-Leste liu hosi Diresaun Nasionál Ambiente no Ministériu Saúde.

Destruisaun matéria prima droga ne’e halo iha rai kuak naruk metru neen (6) no luan lu’an metru hitu (7) hodi kumpre prosesu destruisaun atu ahi tenke lakan maka’as ho temperature manas 4000C para hamate kímiku husi ai-moruk ne’e rasik.

Tuir observasaun Agência Tatoli nota, prosesu sobu no tula materiál prima husi kontentór sia (9) iha Kuartél Jerál PNTL hodi tula ba karreta lori ba área Loes hetan seguransa másimu husi ekipa PNTL no F-FDTL.

Jornalista   : Eugénio Pereira/Jorgerjo Guterres

Editór        : Francisco Simões

 

1 KOMENTÁRIU

  1. aimoruk sira kahur ba kahur mai nia informasaun klaru los iha jornal sira nee ,ita timor nee lahatene buat sira kahur nee,diak liu lalika hanorin no fosai ba publiku tamba bainhira ema hatene ema bele halo tuir no kahur tun no kahur sae no fim ladiak ba ita nia rain,no estraga ema barak nia futuru,nee semak sala belun sira

HAKEREK NO HATÁN

Please enter your comment!
Please enter your name here