Prezidente Repúblika, Francisco Guterres ‘Lú-Olo’ halo enkontru Governu hodi diskute kona-ba movimentasaun iha porta entrada, kinta (10/09) iha Palásiu Prezidensiál Nicolau Lobato, Bairro Pite, Imajen Tatoli/Egas Cristovão

DILI, 10 setembru 2020 (TATOLI)-Prezidente Repúblika, Francisco Guterres ‘Lú Olo’, preokupa ba movimentasaun grupu arte-marsiál iha fronteira terrestre.

Xefe Estadu hato’o asuntu ne’e bainhira enkontru ho Primeiru-Ministru no Ministru Interiór, Taur Matan Ruak, ne’ebé akompaña hosi Vise Primeiru-Ministru no Ministru Planu no Ordenamentu, José Maria dos Reis, Ministru Defeza, Filomeno da Paixão de Jesus no Ministra Negósiu Estranjeiru no Kooperasaun, Adaljiza Magno iha Palásiu Prezidensiál Nicolau Lobato, Bairro Pité.

“Ita-nia prezidente preokupa espesífiku ba arte-marisiál sira ba hasa’e sabuk ka sintu tama-sai, tanba ne’e defísil ita atu kontrola entaun tenke hola medida ne’ebé forte atu prevene transmisaun COVID-19 ne’e,” tenik Xefe Kasa Sivíl Prezidénsia Repúblika, Francisco Maria de Vasconcelos, kinta ne’e. 

Notísia relevante: UPF, EUP ho F-FDTL detein membru PSHT na’in-43

Iha enkontru ne’e, Prezidente Repúblika husu ba Governu atu kontinua asegura fronteira terrestre ho medida rigór atu prevene kontájiu COVID-19.

Antes ne’e, Operasaun Konjunta Unidade Patrullamentu Fronteira (UPF), Unidade Espesiál Polísia (UEP) munisípiu Bobonaro ho FALINTIL-Forsa Defeza Timor-Leste (F-FDTL) iha loron 05 to’o 09 setembru 2020, detein membru organizasaun arte-marsiál husi Persaudaraan Setia Hati Terrate (PSHT) na’in-43 iha liña fronteira terrestre, kompostu hosi feto na’in-hitu no mane na’in-36, ne’ebé ilegálmente hakuur liu fronteira terrestre hodi ba sa’e sabuk (pengesahan) iha Atambua, Indonézia.

Membru arte-marsiál hirak ne’e maihosisi munisípiu Baucau, Viqueque, Dili, Bobonaro, Suai no munisípiu seluk tan. 

Komandu operasaun konjunta sei kontinua halo operasaun hodi implementa regra Estadu Emerjénsia dalimak hodi evita abitante nasaun rua halo atividade ilegál iha liña fronteira terrestre no tasi laran.

Jornalista: Florêncio Miranda Ximenes

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here