PGR José Ximenes observa lokál destruisaun matéria droga tonelada 160 iha Suku Gisu, Loes, Liquiça, 10 setembru 2020. Imajen Tatoli/António Gonçalves

LOES, 10 setembru 2020 (TATOLI) – Prokuradór Jerál Repúblika (PGR, sigla portugés) no Komandu Polísia Nasionál Timor-Leste (PNTL), ohin, halo destruisaun ba matéria báziku droga nian hamutuk tonelada 160.

Notísia Relevante : PGR-instituisaun relevante sei destrui matéria prima droga tonelada 160

Molok hala’o destruisaun ne’e, PGR José Ximenes no Komandante Jerál PNTL, Komisáriu Faustino da Costa no ekipa hala’o uluk identifikasaun ba materiál hamutuk kontentór sia (9) ne’ebé rai iha Kampu Kuartél Jerál PNTL, Caicoli, Dili no kontinua tula kedas ba área Suku Gisu-Loes, Postu Administrativu Maubara, Munisípiu Liquiça hodi halo destruisaun.

PGR José Ximenes hateten, iha loron 28 agostu 2019, bainhira Tribunál Distritál Dili deside katak arguidu sira absolve husi krime ne’ebé mak Ministériu Públiku akuza, no Tribunál Distritál Dili mós fó  ordena para restutui ka entrega fila fali objetu sira ne’e ba nain. Maibé, Ministériu Públiku la konkorda ho desizaun ida ne’e, tanba ne’e halo rekursu ba iha Tribunál Rekursu iha loron 20 fevereiru 2020, no Tribunal Rekursu deside katak objetu hamutuk tonelada 160 ne’e substánsia kímiku sira ne’e ordena para destrui, desizaun ba arguidu sira nian nia mantein nafatin ho desizaun primeira instánsia absolve, no objetu sira ne’e destroi .

“PGR hamutuk  ho Komandante Jerál PNTL organiza ho entidade hotu -hotu oin nusa halo prosesu destruisaun, basá  matéria ne’e barak tebes 160 tonelada. Tribunal deside ida ne’e fila ba estadu para destruisaun,”  hateten PGR Jose Ximenes.

Nia hateten, Timor-Leste laiha merkadu, laiha  indústria, maibé tanba saida mak ema sira uza Timor-Leste  sai fatin tránzitu ba droga tenke kuidadu hodi evita  sasán droga labele tama mai Timor-Leste.

PGR rekoñese, Timor-Leste sei falta ekipamentu no rekursu atu deteta ema sira ne’ebé tenta lori ai moruk droga tama mai Timor-Leste.

“Ita iha frajilidade iha parte rua, primeiru kontrolu, presiza investe iha integridade ba ema sira ne’ebé servisu iha fronteira sira ne’e. Tanba ema barak mak la ultra pasa husi aviaun semo leten ne’ebá, ultra pasa iha fronteira, hanesan kazu kazál Timoroan ne’ebé autoridade Indonézia sira kaer hodi submete ona ba Lei Indonézia nian,” nia hatete.

Iha fatin hanesan, Komandante Jerál PNTL, Faustino da Costa dehan, sira-nia parte koopera ho PGR atu segura seguransa hodi tula materiál droga ne’e ba halo destruisaun iha área Loes nian.

Nia hatuan, PNTL sei fó seguransa másimu ba prosesu destruisaun sei halo too remata maka ekipa PNTL sei retira hodi fatin destruisaun.

Tuir observasaun Agência Tatoli nota, iha fatin destruisaun iha Suku Gisu, Loes hetan seguransa maka’as husi PNTL Liquiça no Batallaun Orden Públiku (BOP) no ekipa PGR.

Jornalista   : Eugénio Pereira /Jogerjo Guterres

Editór        : Francisco Simões

HAKEREK NO HATÁN

Please enter your comment!
Please enter your name here