Prokuradór Jerál Repúblika, José da Costa Ximenes. Imajen Tatoli/Egas Cristovão

DILI, 18 agostu 2020 (TATOLI)-Prokuradia Jerál Repúblika (PGR, sigla portugés) hamutuk ho instituisaun relevante sei halo destruisaun ba matéria prima droga ho kuantidade tonelada 160, ne’ebé halo apreensaun iha Portu Dili iha tinan hirak liubá.

“Destruisaun matéria prima ba produsaun droga sei hala’o tuir medida ambientál no saúde ninian,” tenik Prokuradór Jerál Repúblika, José da Costa Ximenes, hafoin hasoru malu ho Prezidente Repúblika, Francisco Guterres ‘Lú Olo’ iha Pálasiu Prezidensiál, Bairru Pité, tersa ne’e.

Tanba ne’e, Prokuradória sei serbisu hamutuk ho Polísia Nasionál Timor-Leste (PNTL), Sekretáriu Estadu Ambiente (SEA) no Ministériu Saúde (MS) kona-ba tékniku destruisaun ne’ebé la fó impaktu negativu ba ambiente no saúde públika.

Prokuradoria sei utiliza fasilidade Hospital Nacional Guida Valadares (HNGV) hodi halo destruisaun liuhosi sunu matéria prima droga.

Iha enkontru ne’e, José da Costa mós informa ba Xefe Estadu kona-ba servisu Prokuradória ne’ebé hala’o durante féria judisiál.

Tuir nia, durante feriadu judisiál husi 1 agostu to’o 15 setembru, Prokuradória hamutuk ho Gabinete Sentrál Kombate Korrupsaun no Kriminalidade, hala’o serbisu turnu hodi tau-matan ba kazu omisídiu iha Vemasse, omisídiu iha Same, sona ema iha Vila-Nova, Baucau no kazu sunu uma inklui estraga veíkulu, ne’ebé akontese iha 13 agostu, iha Nunira, Laga.

Entretantu, Ba apreensaun motorizada husi PNTL, to’o ohin loron laiha reklamasaun husi na’in sira, tamba ne’e iha tempu badak Diresaun Patrimóniu Estadu sei halo leilaun públiku ba motorizada ne’ebé sei iha kondisaun di’ak.

Prokuradór ne’e agradese mós ba Prezidente Repúblika ne’ebé hakerek prefásiu ba livru husi Ministériu Públiku, ne’ebé sei lansa iha fulan-outubru hodi komemora tinan-20 konstrusaun instituisaun Estadu ne’e.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here