iklan

NASIONÁL, HEADLINE

Veterana Meta Beloi: “Mane luta ho kilat, feto luta rai segredu”

Veterana Meta Beloi: “Mane luta ho kilat, feto luta rai segredu”

Veterana Maria Odete dos Anjos Amaral “Meta Beloi”. Imajen TATOLI/Osória Marques.

DILI, 09 setembru 2020 (TATOLI)–Veterana Maria Odete dos Anjos Amaral “Meta Beloi”, husu ba Governu liuhosi Centro Nasionál Cegha (CNC) hodi dignifika feto sira-nia kontribuisaun ba luta indepedénsia, tanba feto barak mak sai vítima iha funu ba libertasaun nian maibé to’o agora barak mak Estadu seidauk dignifika sira-nia istória funu nian.

Notísia Relevante: Veteranu Ikun entrega dokumentu klandestina ba CNC

Veterana ne’e hateten, feto lubuk ida-ne’ebé involve iha funu presiza mós dignifika feto-nia istória funu nian hanesan ho luta-na’in mane sira, tanba iha tempu ba libertasaun ne’e mane sira  luta ho kilat no feto sira-nia kontribuisaun mak luta ho segredu hanesan bainhira lori liafuan ka surat ruma ba maluk luta-na’in mane sira iha ai-laran.

“Ha’u-nia rekomendasaun ba iha Governu, liuhosi  Centro Nasionál Chega katak  Timor-Leste nia  funu la’ós mak mane de’it maibé feto mós involve hotu. Tanba, ami feto lubuk ida-ne’ebé involve iha funu presiza mós dignifika ami-nia istória funu nian hanesan ho luta-na’in mane sira. Tanba iha tempu luta ba libertasaun nasionál, mane luta ho kilat, ami feto nia kontribuisaun maka luta ho segredu. Segredu ne’e hanesan bainhira lori liafuan ka surat ruma ba maluk luta-na’in mane sira iha ai-laran no fila-fali mai vila-laran rai segredu. Entaun, ida-ne’e mak ami-nia luta,” dehan Veterana Maria Odete dos Anjos Amaral ba Agência TATOLI bainhira partisipa Semináriu Nasionál kona-aba komemorasaun Loron Levantamentu Armada no Masakre Kraras 1983 ba dala-37 iha Antigu Komarka, Balide, Dili, tersa (08/9/2020).

Meta Beloi hatutan, durante ne’e mane sira-nia istória funu nian kuaze istória iha hotu ona maibé feto nia istória lubuk ida seidauk. Tanba ne’e, nia husu ba Governu liuliu CNC ba oin bele haree ba feto lubuk ida-ne’ebé luta kontribui ba Timor-Leste nia independénsia.

“Ba funu nia istória ami feto sai saseluk Mane nian fó ami-nia kontribuisaun luta liuhosi dalan oin-oin. Ita bele dehan katak rai surat iha ropa laran (ropa internál) mós mak ne’e hotu ona, tanba de’it objetivu ida hakarak ka lakohi ukuk-rasik an. Ne’ebé, ha’u husu ba Governu atu tau atensaun mós ba ida-ne’e tanba feto mós hetan sofrimentu makaas durante luta ba Timor-Leste nia independénsia,” nia dehan.

Tanba ne’e, veterana ne’e husu ba jerasaun foun sira katak uluk luta-na’in sira luta laiha ida mak matenek liuliu inan feto sira barak ne’ebé kontribui sira-nia moris ba luta to’o barak maka mate. Nia dehan, ko’alia loloos katak laiha ida maka matenek konta beik hotu maibé feto nia hakarak luta  maka imi foinsa’e tenke moris iha livre nia-laran. Tanba ne’e, nasaun livre ona imi mós tenke kontribui fali ba dezenvolvimentu nasaun nian.

“Ha’u husu ba oan sira. Imi mak futuru nasaun ida-ne’e nian. Estuda makaas, buka esperiénsia barak no liuliu rai didi’ak istória ne’ebé ohin loron ita sei konta ba imi ne’e, tau iha imi-nia ulun hanesan lisaun ida ba imi, atu nune’e imi bele sai ema ne’ebé forte hodi dezenvolve ita-nia rai. Tanba, nasaun Timor-Leste ne’e iha imi joven sira-nia liman,” nia fó hanoin.

Jornalista: Ósoria Marques

Editór: Cancio Ximenes

iklan
iklan

Leave a Reply

iklan
error: Content is protected !!