Operasaun iha liña fronteira terrestre hodi evita atividade ilegál tama-sai fronteira terrestre TL-RI. Imajen/Dok.Tatoli

DILI, 24 agostu 2020 (TATOLI)- Liuhusi Operasaun Konjunta, Unidade Patrullamentu Fronteira (UPF) no FALINTIL-Forsa Defeza Timor-Leste (F-FDTL), foin lalais ne’e, kaptura negosiante Timor-oan balun ne’ebé tenta halo atividade negósiu ilegál  hodi fa’an masin-midar saka 69 ba negosiante Indonézia iha fronteira terrestre, Postu Administrativu Maliana, Munisípiu Bobonaro.

Notísia Relevante : UPF kaptura ema na’in-10 halo negósiu ilegál iha fronteira terrestre

Portavós PNTL, Superintendente Xefe Arnaldo de Araújo, hateten, negosiante sira ne’ebé halo atividade negósiu ilegál, UPF kaptura iha loron 13 agostu  liubá no halo mós apreensaun ba masin-midar kilu 50, saku 49 no kilu 25, saku 20 ho total saku 69.

Daudaun ne’e, UPF aprezenta ona kazu ne’e ba Ministériu Públiku, Maliana, hodi prosesa autór tuir lei.

“Ami kaptura ita nia sidadaun sira balun inklui sasán sira hanesan masin-midar 69 agora entrega ona ba Ministériu Públiku hodi prosesa tuir lei,” informa Komandante Arnaldo de Araújo, ba jornalista iha Komandu Jerál PNTL, Caicoli, Dili, ohin.

UPF kaptura Timor-oan sira-ne’e, tanba daudaun ne’e situasaun Timor-Leste implementa hela Estadu Emerjénsia hodi bandu kuakér sidadaun atu halo movimentu negósiu no viajen tama ilegál iha liña fronteira terrestre entre Timor-Leste no Indonézia hodi evita propagasaun COVID-19.

Iha operasaun nia laran, UPF no F-FDTL iha semana kotuk liubá, kaptura  mós membru grupu Organizasaun Arte Marsiál (PSHT) joven na’in-hitu (7) kompostu husi feto na’in-ida (1) no mane na’in-neen (6), ne’ebé tenta halo atividade viajen ilegál atu tama ba área Atambua-Indonézia atu.

PNTL Eskuadra Atauro mós rejista kazu keixa husi komunidade kona-ba peskadór Atauro ida lakon durante hala’o atividade peska. Nune’e, parte PNTL no família sira sei kontinua buka tuir vítima ne’e.

Kona-ba mate isin sidadaun Timor-oan ida ho idade 60 ne’ebé populasaun sira hetan iha área Tibar-Liquiça nian, daudaun ne’e PNTL sei halo hela prosesu investigasaun no identifikasaun.

PNTL mós rejista durante semana ne’e mosu asidente tráfegu karreta Pajero privadu ida ho xapa 11.127   iha área Bucoli-Baucau, ne’ebé rezulta karreta na’in ka kondutór liman karuk tohar no nia kaben sofre kanek kaman bainhira ho karreta atu halo viajen mai Dili.

PNTL Baucau mós kaptura ona suspeitu sira ne’ebé envolve iha kazu sunu uma iha Nunira, Postu Administrativu  Laga, Munisípiu Baucau no  aprezenta ona ba Ministériu Públiku.

“Durante semana ida nia laran asidente tráfegu hirak ne’ebé akontese kauza husi fatór umanu 90%, fatór veíkulu 5% no fatór estrada 5%, hodi nune’e,  rezulta ema kanek no balun tenke lakon vida,” nia hatete.

Kazu violénsia doméstika 449

PNTL mós halo rekapitulasaun insidente ne’ebé rejistu hahú husi  fevereiru to’o jullu, tinan ne’e, hamutuk kazu 620. Husi númeru ne’ebé iha, tipu kazu ne’ebé maka akontese maka hanesan asaltu/integridade fízika simples, baku-malu no tuda-malu.

Arnaldo de Araújo hatutan, PNTL mós rejista kazu violasaun doméstika hamutuk 449 ne’ebé akontese iha territóriu Timor-Leste.

“Ami mós rejista kazu violénsia doméstika durante janeiru to’o jullu, tinan ne’e, hamutuk 449. Ne’e númeru ida ne’ebé aas tebes tanba PNTL liuhusi Polisiamentu Komunitária halo sosializasaun kona-ba Lei Violénsia Doméstika (VD) ba ita nia komunidade sira, uluk ita nia komunidade sira la hatene saida maka VD, tanba sira hatene de’it katak Violénsia Doméstika ne’e ba rezolve de’it iha nivel suku ou família,” nia hatete.

Nia hatutan, Lei Violénsia Doméstika agora sai ona Krime Públiku iha Lei Kódigu Penal, nune’e númeru VD  aas tanba servisu Polisiamentu Komunitária hodi habelar informasaun kona-ba Lei VD, ikus mai komunidade sira hatene ona katak VD ne’e krime públiku, entaun problema saida de’it mak mosu iha uma-laran halo keixa ba Polísia.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here