CEPAD husu deputadu sira tenke kumpre lei MPCC
DILI, 09 setembru 2020 (TATOLI)—Diretór Ezekutivu Sentru Estudu ba Pás no Dezenvolvimentu (CEPAD-sigla portugés), João Boavida, hateten deputadu sira-ne’ebé halo konsensu hodi halo aprovasaun ba lei Medida Prevensaun no Kombate Korrupsaun (MPCC-sigla portugés) iha Parlamentu Nasionál tenke kumpre mós lei refere tanba deputadu sira goza hela imunidade.
Notísia Relevante: CEPAD husu Governu tradús lei MPCC ba dalen tetun
Diretór CEPAD ne’e hatutan, bainhira lei ne’e kompleta ona loron 180 (fulan-neen) no hakat ba implementasaun ne’e ema hotu tenke kumprende lei atu nune’e serbisu tomak hosi Comissão Antí Corrupção (CAC) tenke la’o ho di’ak.
Iha implementasaun di’ak, nia dehan, se deputadu 65 iha Parlamentu Nasionál ne’ebé aprova lei MPCC ne’e iha mandatu sira-nian tuir mai sira sei kolabora ho justisa, liuliu Comissão Antí Corrupção (CAC), bainhira ikus mai buat ruma hasoru deputadu sira.
“Maibé sira mak aprova tiha, depois buat ruma hasoru fali sira mak sira la kolabora, ha’u hanoin laiha sentidu ba sira-nia aprovasaun ba fó lei ne’e. Tanba deputadu sira iha imunidade, ida-ne’e dalabarak sira proteje-aan hosi imunidade, sira kuandu hetan kazu ruma liuliu kazu korrupsaun nian,” dehan Diretór Ezekutivu Sentru Estudu ba Pás no Dezenvolvimentu (CEPAD-sigla portugés), João Boavida, ba jornalista sira iha nia knaar-fatin, Bidau, Dili, kuarta ne’e.
Diretór Ezekutivu CEPAD ne’e preokupa, ohin loron hasoru injustisa sosiál iha sosiedade tanba konstitusaun hateten direitu hanesan maibé kuandu hakat liu ba protesaun oportunidade laiha oportunidade no tratamentu hanesan.
“Lei ne’e di’ak atu labele hamosu diskriminasaun. Sé de’it mak komete korrupsaun tenke hatán ba lei tanba lei ne’e di’ak tebes. Tantu atu setór públiku fali no setór privadu sira, igreja inklui organizasaun sosiedade sivil hanoin direitu sidadaun hotu hanesan. Entaun, ita-nia protesaun mós hanesan hotu. Atu protesaun hanesan ita mós tenke iha tratamentu hanesan,” Diretór Ezekutivu CEPAD ne’e hateten.
Diretór CEPAD ne’e fó hanoin ba Parlamentu Nasionál, liuliu Komisaun A (Justisa no Konstitusionál) tenke halo akompañamentu di’ak ba prosesu implementasaun lei MPCC nune’e implementasaun lei ne’e la’o ho di’ak.
Jornalista: Evaristo Soares Martins
Editór: Cancio Ximenes
