CAC halo sorumutuk ho Ministru PCM, Fidelis Magalhães Leite iha Palaçio do Governo, Dili, 08 setembru 2020. Imajen/CAC

DILI, 09 setembru 2020 (TATOLI)-Komisaun Anti-Korrupsaun (CAC) sei halo investigasaun kriminál ba benefisiáriu  la elejivel simu subsídiu fundu agregadu familiar iha ámbitu COVID-19.

Notísia Relevante : CAC submete relatóriu “problemátiku” iha pagamentu agregadu familiar ba PCM

Komisáriu Adjuntu ba Asuntu Prevensaun no Sensibilizasaun CAC, Luis de Oliveira Sampaio, apela ba  benefisiáriu ne’ebé simu ona subsídiu agregadu familiar ne’ebé la elejivel tuir lei  atu devolve fali osan ($200) ba Estadu.

Sira ne’ebé la elejivel sumu subsídiu mak hanesan lista naran dobru, lista potensiál falsa (hanesan juventude), benefisiáriu ho saláriu liu $500.

“CAC apela atu ema sira la elejivel ba programa subsídiu fundu agregadu familiar iha ámbitu COVID-19 ho valor $200 kada família atu voluntáriamente fó fila osan povu nian. Se la devolve osan Estadu nian, CAC sei kontinua ho asaun represivu ba pesoál des-onestu sira,” hateten Komisáriu Adjuntu CAC, Luis de Oliveira Sampaio, liuhusi komunikadu CAC ne’ebé Agência Tatoli asesu, ohin.

Iha loron   07 setembru 2020, Komisáriu Adjuntu CAC, Luis Sampaio hala’o ona sorumutuk hodi aprezenta relatóriu deskobrimentu implementasaun subsídiu fundu agregadu familiar  ba Ministru Prezidénsia Konsellu Ministru, Fidelis Magalhães Leite. Nune’e, Ministru PCM atu koordena no apela hela ba ministériu tutela sira hanesan Ministériu Solidariedade Sosiál no Inkluzaun (MSSI) ho Ministériu Administrasaun Estatál (MAE) atu bele halo prevensaun, hodi nune’e, osan sira ema la elejivel simu bele devolve fali ho voluntáriamente.

Nia hatutan, CAC tuir loloos hala’o ona investigasaun kriminál ba ema des-onestu no la iha integridade hirak ne’e, maibé lei mós permite CAC atu halo koordenasaun servisu iha ámbitu prevensaun korrupsaun.

“Se ami (CAC) mak hakarak investiga! investiga de’it ,mais ami husu tiha ona ba sira (benefisiáriu la elejivel) hakarak kolabora. Sira rasik lori fila osan Estadu mai ho sira ninian karta no identidade,” nia tenik.

Mekanizmu atu devolve fali osan ne’e, CAC sei  diskute hela ho MSSI ho MAE hodi rezolve indivíduu sira ne’ebé nafatin iha vontade atu ajuda Estadu iha prosesu ida ne’e.

“Balun dezafia fali ami (CAC), maibé ami sei tolera ho situasaun sira hanesan ne’e no CAC husu atu kolabora di’ak liu atu devolve fali osan Estadu nian ka simu asaun represivu tuir lei haraik mai CAC,” Komisáriu Adjuntu CAC, Luis de Oliveira  Sampaio afirma tan.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here