Adjuntu Komisariu CAC ba Asuntu Prevensaun no Sensibilizasaun, Luis de Oliveira Sampaio. Imajen/Egas Cristovão

DILI, 07 setembru 2020 (TATOLI)-Komisaun Anti-Korrupsaun (CAC),ohin, submete ona relatóriu “problemátiku” iha prosesu implementasaun subsídiu fundu agregadu familiar ba Ministériu Prezidénsia Konsellu Ministru  (PCM) no husu Ministru Fidelis Magalhães Leite, atu tau konsiderasaun ba relatóriu ne’e.

Notísia Relevante : CAC aprezenta relatóriu deskobrimentu implementasaun fundu agregadu família ba MAE

Liuhusi enkontru iha Palaçio do Governu, ekipa CAC lidera husi Komisáriu Adjuntu ba asuntu Prevensaun no Sensibilizasaun, Luis de Oliveira Sampaio ne’ebé akompaña husi Diretór Jeral Prevensaun no Sensibilizasaun, Rosario de Araujo, Diretora Promosaun Valores Integridade Leonilda Lobato no Diretór Estudu Avaliasaun Risku, Cirilo Abi, entrega diretamente relatoriu ne’e ba Ministru PCM, Fidelis Magalhães Leite.

Nota komunikadu husi CAC ne’ebé Agência Tatoli asesu relata katak, Komisáriu Adjuntu CAC Luis Sampaio, lori CAC nia naran husu Ministru PCM ho ninian ekipa atu konsidera no hato’o rekomendasaun relatóriu deskobrimentu ekipa konjunta CAC, PDHJ, IGE no KFP nian kona-ba subsídiu agregadu familiar ne’e ba iha Primeiru-Ministru Taur Matan Ruak.

Iha sorumutuk ne’e Komisáriu Adjuntu CAC, Luis Sampaio, husu ba Ministru Fidelis Magalhães fó  hatene ba PM Taur Matan Ruak, kona-ba deskobrimentu sira ne’ebé deskreve ona iha relatóriu ne’e kona-ba baze-dadus problemátiku, lista benefisiáriu dobru, lista potensiál falsa sira (hanesan juventude), ema mate tiha ona sei tama lista benefisiáriu, benefisiáriu ho saláriu liu $500.

Luis Sampaio esplika mós ba Ministru PCM ho ninian ekipa kona-ba MSSI halo kontratu ho empreza privada ne’ebé fornese veíkulu ka transporte ninia perfíl ne’ebé la klaru  iha sira ninian lisensa negósiu nian no mós benefisiáriu sira ne’ebé rejistu hafoin 30 marsu 2020.

Biban ne’e Ministru Fidelis lori VIII Governu Konstitusionál hato’o apresiasaun aas ba deskobrimentu ida ne’e no promote sei hato’o iha reuniaun Konsellu Ministru nian hodi hamutuk hadi’a naksalak sira ne’ebé akontese.

Ministru Fidelis mós akresenta katak, atu asegura lei no regulamentu sira hatuur iha ninia-fatin no próteze Estadu ninian kredibilidade no integridade mak jestór sira ne’ebé envolve iha mal-jestaun ida ne’e tenke responsabiliza ninian aktu liu husi prosesu investigasaun hodi lori ba hatán iha Ministériu Públiku no tribunal.

Sorumutuk hanesan hala’o tiha ona ho Ministériu Administrasaun Estatál (MAE), MSSI no autoridade lokál Munisípiu Dili hodi diskute no aprezenta deskobrimentu sira ba implementasaun fundu agregadu familiar iha ámbitu prevensaun Covid-19 nian.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here