Portavós PNTL, Superintendente Xefe Arnaldo de Araújo. Imajen Tatoli/Dok

DILI, 09 setembru 2020 (TATOLI)– Konfrontu entre grupu juventude iha área Suku Tirilolo, Postu Baucau vila, Munisípiu Baucau, foin lalais ne’e, rezulta ema na’in-lima sofre kanek kaman no uma komunidade nian-lima hetan estragus.

Notísia Relevante : UPF, EUP ho F-FDTL detein membru PSHT na’in-43

Portavós PNTL, Superintendente Xefe Arnaldo de Araújo, hateten, konfrontu ne’e akontese tanba problema joven sira hemu tua no lanu maka mosu provokasaun baku malu.

Hafoin konfrontu liu minutu balun, Komandante PNTL Baucau, Superintendente Xefe  Armando  Monteiro, orienta ekipa PNTL too kedas fatin hodi kaptura suspeitu na’in-tolu.

“Asaltu malu iha Baucau-Tirilolo rezulta ema na’in-lima sai vítima no suspeitu na’in-tolu oras ne’e daudaun detein hela iha sela polísia Baucau. Problema ne’e estraga komunidade nia uma-lima hanesan janela no odamatan rahun,” informa  portavós PNTL,  Arnaldo  de Araújo ba jornalista liuhusi konferénsia imprensa, ohin,  iha Komandu Jerál PNTL, Caicoli, Dili.

Iha tempu besik, Komandu PNTL Baucau sei aprezenta kazu ne’e ba Ministériu Públiku Baucau hodi prosesa ba Tribunál.

Iha parte seluk, Komandu Polísia Munisipiu Ermera rejista mós kazu asalta malu entre oknum membru Grupu Organizasaun Arte Marsiál (GAM) iha área Lisapat Postu Administrativu Hatulia, Munisípiu Ermera.

Iha parte seluk, PNTL Munisipiu Dili mós kaptura juventude na’in-rua ne’ebé provoka konfrontu asaltu malu iha Sentru Konvensaun Dili (CCD) nia oin, foin lalais ne’e.

Mezmu mosu konflitu ki’ik, maibé tuir analiza PNTL haree situasaun seguransa kontinua kontroladu iha territóriu nasionál.

Jornalista   : Eugénio Pereira

Editór         : Francisco Simões

HAKEREK NO HATÁN

Please enter your comment!
Please enter your name here