Kapa dokumentu planu rekuparasaun ekonómika. Imajen/Espesiál

DILI, 31 agostu 2020 (TATOLI)-Iha fulan jullu to’o dezembru 2020, Governu hahú implementa medida ekonómika faze dahuluk ba kurtu prazu ho forma imediatu pós-pandemia hanesan medida temporária ba metigasaun impaktu krize, ne’ebé orienta intervensaun ba rekuperasaun ekonomia nasionál.

Medida hirak ne’e tuir rekomensaun Komisaun Elabora Planu Rekuperasaun Ekonómika ne’ebé ensera ona mandatu iha 18 agostu 2020, ho durasaun serbisu loron 60.

Ba kurtu prazu hanaran mitigasaun impaktu ekonómiku no sosiál ba krize COVID-19, Governu implementa medida haat ho kustu totál millaun $113,4, ho objetivu esensiál atu haree ba postu traballu ezistente antes krize no rekupera rendimentu família liuhosi hadi’a empregu no apoiu direitu sidadaun no empreza iha merkadu inklui normaliza hikas atividade ekonómika.

Notísia Relevante: Komisaun planu rekuperasaun ekonómika rekomenda medida 71 hosi sub-setór ualu

Tuir nota ofisiál ne’ebé Agência Tatoli asesu iha segunda ne’e, medida haat ne’e foku ba rekuperasaun konsumu nesesidade bázika no produsaun, ne’ebé sei apoia ba normalizasaun atividade empreza no apoia espesifikamente ba setór afetadu liu, inklui setór turizmu no setór informál.

Medida dahuluk maka cesta bázika ba família, ne’ebé sei implementa iha fulan novembru no dezembru ho totál kustu millaun $71,5 (valór bele iha mudansa), ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Apoiu ne’e sei entrega ho forma voucher, kompozisaun ai-han ijiene no moos ho baze per kapita dimensaun família ho preferénsia produtu nasionál iha merkadu lokál.

Medida daruak maka subsídiu retoma, ne’ebé implementa iha fulan agostu to’o dezembru ho totál kustu millaun $35 (bele iha mudansa), ho objetivu atu fó apoia ba entidade empregadór no emprezáriu individuál atu normaliza atividade ekonómika, apoia espesífikamente ba setór turizmu ne’ebé afetadu ba krize, no fortifika entidade benefisiária.

Apoiu ne’e ho kondisaun ba empreza sira ne’ebé atu normaliza hikas atividade maibé eseptu ba setór turizmu, entidade benefisiáriu tenke rejista iha seguransa sosiál iha sistema fiskál no obrigatóriamente laiha despedimentu ba traballadór sira.

Medida ho forma subsídiu ne’e kalkula ho baze ponderasaun ba fatór hanesan lakon volume negósiu no númeru traballadór, lakon volume negósiu kompara ho fulan-juñu, no benefisiáriu sira bele uza subsídiu atu halo despeza nesesária.

Medida datoluk maka despeza kontributiva ne’ebé implementa iha fulan jullu to’o dezembru ho totál kustu millaun $3,6, ho ninia objetivu, destinasaun no kondisaun hanesan medida subsídiu ba retoma, maibé ninia espesifikasaun maka atu dispensa kontributiva hosi entidade empregadora ho porsentu 6 no dispensa kontributiva ne’e sei ho parsiál.

Ikus liu maka apoiu espesiál  ba traballadór informál ne’ebé sei implementa iha fulan outubru to’o dezembru ho totál kustu ba medida ne’e maka millaun $3,3 (bele iha musansa) no sei aplika ba traballadór ho kontra própriu iha setór informál, ho objetivu atu fó apoiu ba traballadór ne’ebé enfrenta situasaun desprotesaun sosiál no insentiva formalizasaun.

Benefisiáriu ba medida ne’e tenke rejistu iha seguransa sosiál iha agostu ka setembru 2020 no obrigatoriamente hadi’a kontribuisaun durante durante fulan-neen.

Subsídiu fixu ho montante porsentu 60 hosi valór insidénsia hosi eskalaun dahuluk hanesan $36 = porsentu 60 x $60 no taxa kontributiva porsentu 4 iha fulan ne’ebé vigora medida, porsentu 10 iha fulan-tolu tuirmai.

Entretantu, medida kurtu prazu ne’e atu asegura medida ezistente iha períodu pré-COVID-19, hanesan fatór esensiál ne’ebé la redús nível moris populasaun no metigasaun ba impaktu resesaun ekonómika.

Medida ne’e mosu tanba iha tempu lakon empregu no rendimentu, obriga atu buka apoiu hanesan objetivu diretu ba ema no empreza sira atu halo rekuperasaun ekonomia família iha tempu krize surtu COVID-19.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here