Adjuntu Komisariu CAC ba Asuntu Prevensaun no Sensibilizasaun, Luis de Oliveira Sampaio. Imajen/Egas Cristovão

DILI, 24 agostu 2020 (TATOLI)-Komisáriu Adjuntu Komisaun Anti-Korrupsaun  (CAC) ba asuntu Prevensaun no Sensibilizasaun, Luis de Oliveira Sampaio, hala’o sorumutuk ho Vise Ministru Administrasaun  Estatál,  Lino de Jesus Torresão  no dirijente tomak sira iha edifísiu Ministériu Estatál, Caicoli, Dili.

Notísia Relevante : Benefisiáriu 148 tenke devolve subsídiu agregadu familiár

Ekipa prevensaun aprezenta no diskute kona-ba relatóriu konjunta CAC, PDHJ, IGE no CFP relasiona ho deskobrimentu implementasaun fundu agregadu família ne’ebé implementa iha loron 09 to’o loron 30 juñu 2020 no loron 02 to’o loron 15 jullu 2020 iha Rejiaun Administrativu Oe-Cusse Ambeno (RAEOA).

Relatóriu konjunta ne’e aprezenta ona ba ministériu tutela sira hanesan Ministériu Administrasaun Estatál, Ministériu Solidariedade Sosiál no Inkluzaun, Ministériu Finansa no kopia ba Prezidente Parlamentu Nasional no Primeiru-Ministru (PM).

“Sorumutuk ne’e nu’udar asaun “follow up” ida husi CAC atu ezije resposta no medida apropriadu no relevante husi MAE relasiona  ho  baze-dadus agregadu família ne’ebé problemátiku, lista benefisiáriu dobru, falsifikasaun dadus  agregadu família  no funsionáriu sira ho saláriu superior $500.00 ba leten, ne’ebé naran mosu nu’udar benefisiáriu kuaze iha fatin hotu-hotu,” haktuir nota komunikadu CAC nian ne’ebé Agência Tatoli asesu, ohin.

Nota komunikadu ne’e relata katak sorumutuk ne’e iha  ámbitu servisu no natureza prevensaun nian tuir artigu 4 lei Nú.8/2009 kona-ba kriasaun CAC nian.

Durante sorumutuk ne’e, responsavel ka dirijente sira iha MAE apresia dadus no deskobrimentu hirak ne’e no rekoñese esforsu no intervensaun CAC nian hodi prevene no salva orsamentu Estadu nian hamutuk $385.400 ne’ebé sita iha relatóriu konjunta ne’e.

Dirijente no responsavel sira MAE nian, rekoñese katak iha duni problema sériu iha baze-dadus agregadu família nian no konfuzaun iha terrenu tanba presaun tempu no karakter urjénsia husi polítika apoiu subsídiu agregadu família ne’e. Maibé maioria problema ne’e, mai husi autoridade lokál sira, tanba sira mak koñese di’ak liu sira-nia ema sira iha komunidade no sira simu de’it lista naran husi autoridade lokál sira ne’ebé la inklui dokumentu komprovativu atu verifika.

Mézmu nune’e, MAE konsidera katak relatóriu ne’e importante no deskobrimentu sira-ne’e pertinente duni, no sira sei uza informasaun sira-ne’e hodi halo koordenasaun ho ministériu relevante sira.

Durante sorumutuk ne’e, CAC subliña no rekomenda ba MAE atu hadi’a sistema jestaun baze-dadus, komunika ho autoridade lokál sira no hola medida rigorozu ba sira ne’ebé la kumpre sira ninia devér no koordena ho Ministériu Finansa atu fó adverténsia ba funsionáriu públiku ho rendimentu $500-liu atu voluntáriamente devolve fali osan ba kofre Estadu.

CAC sei kontinua esforsu atu buka tuir informasaun sira relevante hodi prosesa sira ne’ebé la kumpre rekomendasaun sira ne’ebé diskute iha relatóriu ne’e.

Vise Ministru  Estatál, Lino de Jesus Torresão , iha nia-mensajen ikus, subliña katak, sira-nia parte sei buka-dalan atu hare-tuir fali no hola medida nesesária ba funsionáriu sira ne’ebé hatudu dezobediénsia no la kumpre nia devér nu’udar ajente Estadu nian durante Estadu iha situasaun difisil.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here