Igreja Ave Maria Suai. Imajen/Esepsiál.

Ha’u sente hanesan la’o la’ós mesak ona. Ha’u la’o sai mai sai sai hosi portaun boot madre sira-nian ne’ebé ha’u estraga ona nia kadiadu hodi hakat ba igreja oin. Ha’u hakat nafatin ba igreja oin, ha’u tebe halimar fatuk sira be namkari iha dalan, derrepente ha’u tebe-kona kalsa Levis ida. Maibé kalsa Levis ne’e afinál ema-nia ain. Entaun, ha’u haree no fihir didi’ak, iha ema ne’ebé liman sorin laiha, ulun laiha, no ain laiha mak latan no butuk hamutuk iha igreja oin, bubu sa’e hanesan foho oan ida.

DILI, 06 setembru 2020 (TATOLI)—Masakre Setembru Negro, ohin, halo ona tinan 21 (06 setembru 1999-06 setembru 2020) maibé memória istória pasada ne’ebé kruel tebes ne’e sei grava-metin iha vítima no sobrevivente nia neon. Susar atu haluha. Mamória kruel ne’e sei metin iha vítima ida-idak nia neon ba ne’ebé sira la’o no iha ne’ebé sira hamriik ba. Hanesan fitar ida karik, memória ida-ne’e nunka atu lakon no mohu hosi jerasaun ida ba jerasaun ida seluk nia neon.

Notisia Relevante: Milísia ko’a-kanek ema-nia moen no kose halimar ho masin

Elizeu Gusmão “Sabelai”. Imejen/AFP.

Atu refleta hikas memória Masakre Setembru Negor ne’e, vítima Elizeu Gusmão “Sabelai”, haktuir ninia sasin ba jornalista Agência TATOLI, Cancio Ximenes, liuhosi entrevista ne’ebé hala’o liuhosi WhatsApp (WA), domingu (06 setembru 2020). Maski sente todan no sente hanesan hakanek fali kanak tuan ne’ebé fitar ona maibé vítima Elizeu Gusmão “Sabelai” haktuir nia sasin tuir saida mak nia sente no haree iha momentu ne’ebá;

Iha loron 04 fulan setembru tinan 1999, bainhira rona rezultadu Konsulta Populár, ami populasaun (sarani) sira ne’ebé refujia iha Igreja Ave Maria Suai sente kontente no hakuak malu hodi tanis tanba pro-indenpendénsia ona manan no Timor-Leste ukun rasik aan ona. Iha tempu hanesan mós ulun-boot BRTT, Rui Lopes, lori karreta avisu haleu Sidade Suai hamutuk ho lider pro-independénsia balun hanesan Furel Martinho Amaral (COBA) no Alipio Moniz Maia.

Maibé sira iha planu hodi lasu maun Sesurai atu nune’e hodi kaer Sesurai. Maibé la konsege kaer Sesurai tanba Sesurai sai ona ba foho. To’o dalan klaran, sira hamnasa malu hodi dehan, “Ini komandan mereka (Sesurai) tidak ada. Jadi kita bunuh juga sama saja.” Depois, tanba Sesurai laiha, entaun sira husik fila fali boot ukun aan nian na’in-rua ne’e.

Iha domingu loron 5 fulan setembru tinan 1999, ha’u komesa sai ladi’ak ona. Ha’u hahú buka dalan oinsá bele subar ho ha’u-nia ferik-oan, oan-mane, banin feto ho alin mane. Entaun, maizumenus iha tuku 20:00 kalan, ha’u sobu tiha kadiadu madre sira-nia odamatan nian hodi nune’e ha’u ho família bele subar iha jardin madre sira-nian. Tanba, iha loron ne’e kedas, milísi sira komesa sunu uma iha Suai laran tomak. Ami tein mós labele tanba situasaun manas tan de’it.

Iha segunda loron 6 fulan setembru 1999, ha’u ho ha’u-nia família subar iha jardin madre sira-nian ne’e, la han etu no la hemu bee. Só ha’u-nia oan mak han de’it nia SUN (hahan nutritivu labarik nian) ne’ebé UNICEF fahe ba ami. Ami na’in-tolu (3) la han tanba tein ladi’ak. Iha tempu ne’e kedas, maizumenus tuku 10:00 dadeersan, milísia ho naran Olivio Tato mai no husu ba madre sira atu lori refujiadu sira ba KODIM 1635 Suai. Maibé, madre hatán atu foti sira ba ko’alia ho amo Hilario Madeira. Depois ida-ne’e, sira fila.

Maibé, sira mai nafatin. Iha maizumenus tuku 12:00 loron manas, husu tan madre no madre mós hatán dehan, ba de’it amo Hilario tanba ha’u lahatene. Entaun, sira ba amo Hilario no husu amo dehan, “Amo, ami atu lori refujiadu feto no mane, labarik ka ferik, atu ba iha KODIM 1635 Suai.” Maibe, amo Hilario hatán deit nune’e, “Ha’u sei la fó ha’u-nia sarani sira tanba ami hamutuk mate ka moris, ami tenke hamutuk iha igreja.” Entaun, sira hirus loos hodi dehan, “Loos ona amo, ami fila ona.”

Hafoin sira fila, liu tiha maizumenus tuku 14:30, sira mai ho kilat no milisi kahor ho militár (Tentara Nasional Indonesia, TNI). Milísi MAHIDI no LAKSAUR mai hamutuk hodi asaltu Igreja Ave Maria Suai, harahun, sunu no oho sarani sira ne’ebé refujia iha igreja laran. Maibé, iha tempu ne’e, ha’u haree ahi mós sa’e makaas. Kilat tarutu hanesan ema sona batar musan.

Entaun, ha’u fahe malu ho ha’u-nia ferik-oan, oan-mane, banin feto no alin mane. Ha’u dehan ba ha’u-nia ferik-oan, “Ema la oho imi.” Nune’e, ho matan-been, sira ho ha’u fahe malu. Sira ba madre sira-nia asrama (kolejiu). Ha’u subar iha hudi-laran hodi hafuhu milísi sira la’o ba-mai iha igreja Ave Maria Suai nia oin.

Iha tempu ne’e, ha’u haree uluk amo Dewanto sai hosi igreja laran, langsung milísi ida hatais kamijola MAHIDI tá-hasoru amo Dewanto. Milísia balun iha kotuk hakilar hodi dehan, “Itu jangan bunuh. Itu orang kita.”  Maibé, ema-ne’e tá hotu tiha Amo Dewanto hosi ulun, kbaas no amo Dewanto monu tun ba rai. Depois, milísia hanesan haree mós polisia PAMONPRAJA ida ho naran Joaquim dos Reis ne’ebé subar iha igreja sorin, iha traktor aat nia laran sai mai, milísia langsung hasoru nia hodi dehan ho lian bunak, “Aaaa joaquin na ota baiii gip los ain.” Entaun, Joaquim hatán nune’e, “Ai Maromak! Ha’u sá la sala.” Maibé, milísia ne’e foti katana tá kedas iha Joaquim nia ulun no Joaquim monu ba rai.

Lakleur, ha’u haree Igidio Manek mós sai hosi igreja laran, kaer hela labarik feto ida-nia liman. Maibé, ha’u lahatene labarik feto ne’e sé? Depois, nia ba igreja sorin hodi haree amo Hilario Madeira, nia haruka nia membru Horan Muti ema sorin balun—hosi Nusa Tenggara Timur (NTT) hodi dehan, “Muti… Muti, oho de’it Hilario mak ne’ebá.” Entaun, Muti karega kilat hodi tiru ba amo Hilario Madeira. Bainhira amo Hilario Madeira monu tun ba rai, ha’u mós hakfodak komesa halai tun ba moru-hun madre sira-nian hodi subar iha ne’ebá. No, baonhira ha’u subar iha moru-hun ne’e, milísia LAKSAUR, Alipio Mau, komesa manda nia membru sira hodi dehan, “Imi ba foti ema mate iha kraik ne’e barak loos.” Entaun, Alipio Mau mós komesa tiru igreja iha moru liur, moru ne’ebé ha’u subar ba ne’e.

Maizumenus iha tuku 19:00 kalan, ha’u mós komesa sai mai liur. Tanba, ha’u rona, ema mós laiha ona. Rai hakmatek. Só ahi mak sei lakan makaas iha igreja nian maibé ema ida-nia lian mós ha’u la rona kois. Só ha’u rona de’it mak feto ida mak hakilar iha igreja kotuk. Ha’u lahatene, too ikus feto ne’e mak amo Sancho nia bin boot (Mana Maria). Depois ida ne’e, ha’u fila fali ba subar fatin to’o maizumenus tuku 22:00 kalan, ha’u sai fila-fali hosi subar fatin hodi buka bee atu hemu. Tanba loron rua ona, ha’u la han etu no la hemu bee. Aat liután mak ha’u soe foer boot iha plastiku laran tiha mak soe ba liur.

Entaun, ha’u sa’e ba madre sira-nia asrama hodi sa’e aidila hun ne’ebé besik tanki bee madre sira-nian, maibé labele sa’e ba leten tanba forsa laiha (fraku no namlele). Entaun, ha’u fila-fali ba subar fatin hodi sadere iha moru-hun ho ransel ne’e, sadere to’o dukur tiha. Derrepente, ha’u mehi haree makina dulas batar nian ida atu habit ha’u, ha’u mós hakfodak no hanoin. Ha’u haree ba relojiu, falta minutu 16 halo ona tuku 11:00 kalan. Ha’u komesa sai fila-fali hosi fatin ne’e no buka bee atu hemu. Iha madre sira-nia fatin, ha’u ba liu iha hariis-fatin, hodi kuru bee iha tanki ne’e ho gayung haris nian no hemu bee direta hosi gayung rua ne’e to’o ramata, tanba senti atu mate de’it ona. Hotu tiha ida-ne’e, ha’u-nia tauk mós laiha hotu ona.

Memorial for the many people killed during the massacre in the Suai church during the calamities September 1999. Suai, East Timor – 14 February 2001 | Photo © Basil Rolandsen (http://media.bouvet.org)

Ha’u sente hanesan la’o la’ós mesak ona. Ha’u la’o sai mai iha madre sira-nia asrama oin, sai hosi portaun boot madre sira-nian ne’ebé ha’u estraga ona nia kadiadu hodi hakat ba igreja oin. Ha’u haree ba sorin, hetan uluk mak kareta Kijang mean, amo Hilario nian ne’ebé uluk nia subriñu Akian mak lori. Ha’u hakat nafatin ba igreja oin hodi tebe halimar fatuk sira be namkari iha dalan, derrepente ha’u tebe-kona kalsa Levis ida maibé kalsa ne’e afinál ema-nia ain. Entaun ha’u haree didi’ak ba ema ne’ebé liman sorin laiha, ulun laiha, no ain laiha ne’ebé latan no butuk hamutuk iha igreja oin hanesan foho oan ida.

Depois ida-ne’e, ha’u hasa’e de’it orasaun hodi reza ba sira hotu ne’ebé mate sala laek ne’e. Ha’u hakat tutan hodi hakat ba iha eskola SMAK nian, iha igreja sorin. Ha’u tama ba sala laran, raan ne’e nalihun nakunu hanesan ema oho karau nia raan. Ha’u mós kontinua hakat ba andar leten iha eskola SMAK nian. To’o iha ne’ebá, ha’u komesa tauk fila-fali tanba haree Yusnapung nia uma iha igreja foun nia oin, iha kruzamentu merkadu Suai nian ne’e. Entaun, ha’u fila oin ba fali madre sira-nia asrama. Ha’u hakat ba Akian nia kuartu ne’ebé besik madre sira-nia asrama. Ha’u haree odamatan kuak hotu no raan iha odamatan ne’e nakonu. Entaun, ha’u mós hanoin katak Akian mate ona.

Hotu tiha, ha’u hakat liu kedas ba iha estrada boot hodi ultra pasa ba sorin, hodi liu ba iha Foho Matai nian. Maizumenus iha tuku 05:00 madrugada, iha ne’ebé tanba ha’u kolen demais, ha’u sadere de’it iha ai-kamii hun hodi dukur uitoan tanba ha’u haree hela ema-nia lampu uma-nian lakan hela. Maibé, afinál sira-ne’e, mana Maria Nunes, Polisi Domingos Maia nia ferik-oan.

Dadeersan ha’u hasoru ha’u-nia alin. Ha’u haruka nia lori ha’u-nia oan no ferikoan nia roupa iha pasta kiik oan ida ho SUN ne’ebé ha’u han la hotu fó ba sira iha KODIM 1635 Suai. Atu nune’e, ha’u-nia ferik-oan hatene katak ha’u sei moris. Iha momentu ne’ebá, ha’u-nia ferik-oan mós hameno ba ha’u-nia alin katak sira iha KODIM 1635 Suai ne’e sai ladi’ak, ba hateten hela ba maun.

Hafoin ida-ne’e, dadeersan ha’u liu kedas ba Foho Holbelis. Iha dalan klaran ha’u hasoru ema na’in-haat (4) tanba ami hasoru malu iha ailaran idak-idak halai namkari. Ami hela iha Foho Holbelis semana rua no hakat ba liu iha Tatar parte Foho Labarai nian, ne’ebé besik Lolotoe. Iha ne’ebá, ami hela semana ida resin.

INTERFET Tama Suai

To’o tiha 12 outobru 1999, ha’u tun ba vila laran tanba INTERFET tun no tama ona iha Suai-Covalima. Ha’u ho ha’u-nia banin mane ne’ebé iha Laktos buka ha’u to’o iha Tatar, ha’u mai iha vila laran hasoru uluk INTERFET iha monumentu Eroi Integrasaun Tome Mendonca nian ne’e. Iha tempu ne’ebá, ha’u uza armas hanesan katana ka samurai, entaun INTERFET atu kaptura ka dezarma ha’u. Ha’u dehan, “I am pro-independence.”  Entaun, Entau INTERFET husik ha’u la’o liu de’it ba igreja. To’o iha igreja, ha’u ho ha’u nia banin mane ba liu ha’u-nia fatin subar iha jardin madre sira-nian. Iha ne’abá, ha’u haree ha’u-nia pasta laiha ona.

Ne’e hatudu katak ha’u-nia pasta ne’e ha’u-nia ferik-oan mak foti tiha ona. Depois ami rua ha’u-nia banin ba kedas amo Hilario nia rezidénsia. Iha amo Hilario nia rezidénsia, ha’u haree no hetan de’it mak kadeli-mean amo Hilario nian no oklu ne’ebé aat ona. No, ha’u mai haree fali fatin igreja oin ne’ebé mate-isin sira ne’ebé ha’u haree latan iha igreja oin maibé mate-isin sira-ne’e laiha ona. Só iha de’it ahuk-desan ho ema-nia ruin sira hanesan ruin timir-okos (rahan bawah) mak hau haree, hodi nune’e ha’u tau sinál iha igreja oin no agora muda fali ba ospitál oin. Loloos ne’e iha igreja oin, la’ós iha ospitál oin.

Bainhira jornalista estranjeiru ida mai halo entrevista ho ha’u, ha’u fó kedas amo Hilario Madeira nia kadeli-mean ne’e ba iha jornalista Joõo ho Candida Pinto hosi Portugal atu bele fó ba amo bispu Dom Carlos Filipe Ximenes Belo, SDB, maibé to’o agora laiha informasaun. Iha momentu ne’ebá ha’u mós lahatene jornalista Max Sthal no ida seluk Lindal Barre hosi Australia.

Jornalista: Cancio Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here