Refujiadu Timor-Leste ba Indonezia. Imajen/ Espesial.

Ha’u-nia aman haktuir, “Ha’u-nia kolega na’in-rua ne’e, ninia moen (kelamin, sasán lulik) ne’e, milísia sira ko’a-kanek ho lamiña hafoin kose halimar ho masin ba sira-nia moen. Ko’a ne’e ko’a nafatin. Kose ho masin ne’e kose ninian. Ha’u haree, hanesan naan-isin ne’ebé ema ko’a bosok iha leet sira-ne’e hafoin tempera ho masin no masako para atu lalar halimar iha ai-klaak nia leten. Terus. Ha’u-nia kolega na’in-rua ne’e terus boot. Sira hakilar no halerik maibé membru milísia sira-ne’e hetok ko’a-kanek sira-nia moen no kose halimar ho masin ba beibeik”.

DILI, 02 setembru 2020 (TATOLI)—Istória rohan-baluk ida-ne’e, nu’udar memória istória pasada ne’ebé aman ida haktuir ba oan ida-ne’ebé iha momentu ne’ebá (setembru 1999), labarik ne’e foin mak halo tinan hitu (7). Maske milísia LAKSAUR (Laksanakan Sapu Rata) sira mai ho brutalidade maibé labarik ne’e sei dudu roda halai ba-mai iha milísia sira-nia leet.

Dudu roda halai ba mai sai hanesan ai-knananuk ida ne’ebé bele lori milísia sira ne’e hakat tuir nia ain-le’ut hodi bele to’o iha ninia uma. To’o ikus, labarik ne’e kaer-toman ai-knananuk kmanek ida-ne’ebé milísia sira obriga ninia família sira hakat liu rai-ketan ba refujia iha Timor Osidentál, Indonézia.

Tuir dalan ba rai Indonézia, labarik be gosta dudu roda ne’e sai sasin-matan ida ne’ebé bele haree oinsá milisia sira-nia kruelidade no bele haree milísia sira tortura ema lahó fuan. Maski sente triste maibé ai-knananuk ne’e nia rai-metin iha nia laran to’o ohin loron. Iha komemorasaun loron Masakre Setembru Negro iha Igreja Ave Maria Suai ba dala-21 (06 setembru 1999-06 setembru 2020), labarik ho tinan hitu (7) be uluk gosta dudu roda ne’e, Elidio Agostu Guterres, haktuir ninia sasin ba Jornalista Agência TATOLI, Cancio Ximenes.

Elidio Agusto Guterres ho nia inan doben. Imajen/Espesial.

Sasin-matan (saksi mata) ne’ebé daudaun ne’e sai hanesan dosente Filozofia iha Universidade da Paz (UNPAZ) no Institutu Superiór Filozofia Teolojia (ISFIT) Dom Jaime Goulart, Fatumeta, Dili, Elidio Agusto Guterres, hananu ai-knananuk “Misteriu Dolorozu” be kruel tebes tuir rítmu labarik nian; 

Ai-knananuk antes 09 setemru 1999

Ha’u sei hanoin no sei rai-metin iha ha’u-nia memória ho di’ak molok tama ba 09 setembru 1999, milísia sira tiru malu ho FALINTIL sira iha ai laran, iha Mota ida naran Mau Nis. Iha mota ne’e, milísia nia komandante ne’ebé ema hanaran Bete Aloi hetan kanek iha nia ain no membru FALINTIL ida hetan tiru hosi milísia. Iha loron asaltu ka atake ida-ne’e mos, Amo Eduardo Monghe, CMF (matebian) ne’ebé sai Amo Pároku iha Parokia Fohorem (Suai) hala’o vizita pastorál mai iha ami-nia kapela iha Suku Taroman.

Tanba asaltu ida-ne’e, Amo Eduardo ne’ebé koñesidu ho naran Amo Edu, la konsege ba liu iha fatin pastorál. Amo ne’e toba ho nia sarani sira iha mota Mau Nis. Amo nia kuda kesi iha mota ninin. Bainhira toba, amo taka hena no kosok-oan be inan-feton ida kous ne’e nia neras balun halo sai “sumasu” hodi tula netik nia ulun atu toba.

Iha dadeersan, bainhira loromatan sa’e daudaun, Amo Edu, CMF, to’o iha ami-nia uma. Amo lakohi han. Amo hemu deit bee-mutin malirin no sa’e nia kuda la’o liu ba Parokia Fohorem ho distánsia ne’ebé dook. Ha’u-nia aman ho nia motor Honda Win 100 halai uluk hodi haree dalan no kontrola sitausaun ne’e seguru atu hala’o viajen ka lae.

Ha’u-nia tiu Jacinto no ha’u-nia aman boot Mau Sinas (Matebian) la’o-ain akompaña Amo Edu liuhosi Aldeia Aitoun (parte hosi suku Fatululik). Iha dalan no tuir dalan sira-ne’e, sira haree milisia ho nia emar sira hein Amo Edu iha rai fuik laran ne’ebe ema hanaran Horak. Tuir informasaun katak, kilat ne’ebé milísia sira uza hodi tiru Amo Edu ne’e la tarutu. Amo tun hosi nia kuda hodi hasoru milísia sira-ne’e depois la’o liu ba Parokia Fohorem.

Hafoin akontesimentu ida-ne’e, realidade ida-ne’ebe ha’u sei hanoin no nunka atu haluha mak bainhira milisia kaer ha’u-nia aman Juvinal Mau, iha Eskola Primaria Beidasi no lori nia ba Suia-Covalima hodi julga no kastigu. Loron ida milísia kaer ha’u-nia aman, Frater Claretiano na’in-rua (2) mai iha ami nia aldeia hala’o nia apostoladu. Frater na’in-rua ne’e, hela iha ha’u-nia uma. Kalan ami sempre reza hamutuk ho frater no hafoin sira na’in-rua (2) ba hasoru ha’u-nia aman. Bainhira reza, reza, ami reza nafatin, ha’u-nia inan nia matan-been monu hela de’it.

Durante semana ida-resin milísia sira julga no kastigu ha’u-nia aman Juvinal Mau hamutuk ho nia kolega balun iha Suai. Milísia sira baku ha’u-nia aman. Maibé, agradese ba Maromak, milísia husik livre fali ha’u-nia aman hosi kastigu ne’e. Razaun sira kaer ha’u-nia aman ne’e tanba ha’u-nia aman serbisu hamutuk ho Igreja (Amo Eduardo Monghe no Frater sira sempre toba iha uma) no sira deskonfia ha’u-nia aman hala’o klandestina no subar FALINTIL iha ami-nia uma.

Realidade mak ne’e duni. Ha’u sei hanoin no hanoin hetan hela. Ha’u-nia aman nia naran kódigu klandestina nia ka naran revolusionáriu ne’e hanaran “Malia” no “Mataroman” sai nu’udár ha’u-nia inan nia naran klandestina ninian. No, ha’u sei hanoin hetan bainhira ha’u-nia tiu Alipio da Cruz lori membru FALINTIL sira mai toba iha uma no milísia ho TNI haruka nia intelijen sira mai hafuhu no hale’u uma.

Nu’udar labarik ne’ebe sei kiik ho idade tinan hitu (7), haree realidade hirak ne’e hanesan realidade baibain ne’ebé la fó impaktu ba moris no la tauk mate tanba seidauk hatene loloos saida mak funu. Sempre rona istoria hosi abó sira, inan no aman sira kona-ba funu iha tempu okupasaun Indonézia iha 1975. Ha’u rona beibeik istória kona-ba ha’u-nia Abó Jacinto de Carvalho ne’ebé inimigu sira hakoi moris de’it no ha’u-nia Tiu Jenari ne’ebé lakon to’o agora nunka atu fila-fali mai.

Ha’u rona no rona beibeik istória funu ho terus no susar oin-oin maibé istória hirak ne’e, ha’u rona hanesan ai-knanoik murak ida. Tanba ne’e, laiha tauk iha ha’u-nia laran bainhira haree membru milísia sira la’o ba-mai, hakilar tun-sa’e iha estrada laran. Bainhira milísia sira-nia kilat tarutu, ami kuriozu la’o hakbesik hodi hakarak haree. Sente tauk la rani iha ami-nia laran. Nu’udar labarik ne’ebe sei kiik, ida-ne’e hanesan tempu di’ak ida mai ha’u atu haree saida mak akontese no hatene oinsá atu moris.

Ai-knananuk 09 setembru 1999

Iha loron 06 setembru 1999, bainhira rona milísia asaltu igereja Ave Maria Suai hodi oho sarani lubun no oho Amo Hilario Madeira, Amo Fransisco Soares no Amo Dewanto, SJ,  ha’u-nia inan komesa halo’ot no hakoi-subar sasán importante (rezisténsia) nian balun iha rai-ko’ak laran. Amo sira-nia mate hatudu momoos ona ba sira katak funu mak ne’e ona. Nu’udar labarik ne’ebe sei kiik, lahatene katak la kleur tan sei halai husik uma hodi hakat liu rai-ketan ba ema rain nu’udar refujiadu iha rai foun ida.

Refujiadu timoroan 1999.

Iha loron 09 setembru 1999, milísia na’in-rua tama-sai uma iha Knua Taroman hodi duni sai uma na’in sira iha ida-idak nia uma laran. Membru milísia na’in rua ne’e tara kilat iha sira-nia kbaas. Kesi bandeira (Indonézia) Merah Putih iha sira-nia reen-to’os bá. Sira-nia ulun ne’e hanesan fali ai-riin tutun be bandeira kesi netik bá. Ha’u dudu-roda halimar, ha’u husik ha’u-nia roda ne’e, halai ba hasoru ha’u inan-doben iha uma laran. Milísia na’in-rua ne’e, la’o tuir ha’u to’o iha ha’u-nia uma nia varanda.

Milísia na’in-rua ne’e hakilar be hakilar. Sira hanesan asulear liurai ida-nian be lori lia-tatoli mai mai. Sira hakilar no dehan, ema hotu tenke sai hosi uma laran, haloot sasán no lalin hotu ba Indonézia. Nu’udar labarik, laran ne’e ta’uk be tauk. Neon ne’e tanis. Ha’u lakohi sai no la’o husik ha’u-nia uma ne’ebé sai fatin ba ha’u moris no boot ba ne’e. Ha’u lakohi la’o husik uma ne’ebé habali ami moris. Ha’u-nia inan-doben tanis. Ha’u-nia aman fadigadu haloot sasán. Ha’u-nia biin suru etu iha sanan tau ba “kohe” etu-fatin atu lori no ha’u ha’u bele han tutuir dalan bainhira hamlaha.

Liu tiha minutu sanulu, populasaun sira hosi aldeia Macous, Fatuloro, la’o sa’e mai husik sira uma no sasán balun hodi halai ba Indonézia. Maluk sira hosi suku leten ne’ebé ami hanaran Beidasi mós halai tun mai ona. Ha’u hamriik. Haree ema sira-ne’e, ha’u tanis hanesan kosok-oan ne’ebé buka nia inan atu susu inan nia susun.

Ha’u-nia matan haree ema barak la’o nadodon iha estrada hanesan nehek-metan ne’ebé lolo sai iha nia fatin buka hahan. Ha’u haree balu lori kuda tula sasán. Balu hulan nia inan ne’ebé moras la’o ladi’ak. Balu ko’us nia oan ne’ebé karik foin moris hodi kalan. Balu lori roupa no sasán seluk ne’ebé tau iha pasta no sena iha karon laran. Balu la’o hodi tanis tan lakon inan, lakon aman, lakon maun alin.

Ha’u husik matan ne’e haree no fihir ba ema hirak ne’ebé la’o nakonu estrada laran ne’e. Ha’u haree no hateke-nauk ba ha’u-nia aman-doben. Ha’u aman doben tula pasta iha motor leten. Ha’u inan doben xave metin odamatan kioske (kios) nian no odamatan sira seluk. Depois ha’u aman doben entrega xave ne’e ba milísia no fó osan ba sira. Fó hela sasán ba sira hodi bali netik no haree uma tanba estátua Nain Feto no Jesus, hatuur hela iha oratóriu iha uma laran. Ami laiha kbiit atu lori halai ba Indonézia. Hanoon ida de’it, ami fiar katak milísia sei la estraga ami-nia sasán sira iha uma laran ne’e no ami sei fila fali mai iha ami-nia knua no laiha hanoin atu ba fali tan iha Indonézia.

Iha dadeersan tuku 11:00, rai Taroman hanesan semitériu luan ida be nakonu ho rate mesak moris tuan tantanan de’it. Asu sira tuur iha uma hun sira ne’e tanis no balun tanis iha rate santa nia leten tanba sira-nia na’in sira halai husik hela sira-nia uma. Kilat tarutu. Milísia hakilar no hakilar hata’uk povu maubere. Ami tenke ba duni, Lakmaras-Indonezia, sai hanesan fatin ida-ne’ebé ami sei no tenke ba duni. Mota Tafara ami hakur ho tanis. Ain todan atu la’o husik rai Timor-Leste, rai moris fatin nia murak. Foho lolon sa’e la biban. Maibé obriga aan tenke hakur no sa’e. 

Ia biban ne’e, iha loron 09 Setembru, villa Taroman, Subdistritu Fatululik mamuk. Laiha povu hela iha nia uma. Milísia ho kilat no kro’at duni povu sala laek. Lorokraik, bainhira rai hun mean besik falun lalehan, ami la’o to’o iha foho Lolon Lobo nia tutun. Ami deskansa uitoan. Haree hikas fali ba rai Taroman nia murak ne’ebé ami husik, laran ne’e susar tebes. Haree hikas foho Taroman (Beilelok) nia aas ne’ebé kalohan falun metin ho laran triste.

Matan-been suli hanesan bee, habokon hasan to’o roupa sira be belit iha ha’u-nia isin-lolon ne’e mós book be bokon. Triste tan susar no susar tan funu. Haree malu lahatene atu dehan saida no atu halo saida. Uma sira iha Knua Taroman, lia-na’in, lakan no manas hanesan ahi infernu. Ahi suar sai hanesan kalohan ne’ebé taka metin foho Taroman nia tutun. Kilat tarutu. Milísia oho estraga povu nia animál. Sira sai na’in no liurai iha rai Taroman nia moris no rai Timor nia vida.

Rai Lakmaras-Abis, Indonézia nakonu ho povu maubere, povu Timor, ne’ebé mai hosi Fatululik tomak. Iha fatin fuik ne’e, bee-moos de’it mós laiha. Ai-han mós laek. Laiha baraka ruma ne’ebé ami atu helik netik ami ulun no isin. Iha de’it mak baraka mukit (kiik) ida be sai hanesan Sede Suku nian mak hatuur netik iha ami oin. Sede suku ne’e mak to’o ikus sai ami povu Fatululik (Timor-Leste) nia kakuluk hodi ami bele horik ba.

Iha ne’e, iha fatin ida-ne’e, ami hela iha ne’e besik semana ida ona, rai Lakmaras sai ami-nia knua foun no ami-nia hela fatin foun. Tanba sente dook, povu maubere balun husu lisensa ba milísia atu foti hahan iha ami rain moris fatin Fatululik ne’ebá ne’e. Husu be husu, barak mak milísia la fó lisensa atu fila ba knua moris fatin. Kuitadu..!! Atu dehan saida no katak saida. Ami hotu laiha kbiit atu hasoru milísia sira-ne’e.

Ha’u sente sorte tanba karik iha dalan ba ha’u aman doben, atu bele fila ba uma hodi foti hahan para ami bele han netik. Agradese ba Nai Aman Lalehan iha leten no aas. Sorte tanba ha’u-nia aman lori netik osan wa’in iha ninia kohe laran, entaun ha’u aman lori osan ne’e hodi selu ba milísia no milísia fó lisensa ba ha’u aman atu baa mi knua.

Maibé, ha’u-nia aman husu lisensa ba milísia hodi dehan, ha’u aman atu foti estátua boot ita Nain Feto no Nain Jesus ne’ebé sei tau hela iha uma laran, iha uma Fatululik ne’ebé ne’e. Maski triste no tauk maibé ha’u aman ba tebes duni no konsege lori hikas estátua rua refere hodi tula iha karreta Kijang metan milísia nian ida. Sente haksolok maibé triste tanba referendu (funu) nia hahalok ami bele refujia iha rai Lakmaras-Abis iha Timor Osidentál.

Dadeer ida mai, lorokraik ida lori rai loron ne’e ba fali kalan no kalan nakdulas aan ba hikas dadeersan ida. Laran ne’e sempre tanis halerik haree ha’u rai moris fatin hosi Foho Lakmaras nia tutun. Sente atu halai fila ba uma no dudu halimar ha’u-nia roda ne’ebé ha’u soe hela iha uma bainhira milísia na’in-rua haruka ami halai no tenke sai hodi husik hela ha’u-nia uman. Ha’u laran tanis bainhira haree Indonézia oan sira troka halo kabeer hodi hakat ba eskola.

Hanoin, ha’u hanoin atu fila lalais ba ha’u-nia rain Fatululik no ha’u mós bele eskola hanesan ema rai-nain sira ne’e. Ha’u sente futuru ne’e atu lakon no lakon leet de’it ho situasaun ida, ba ha’u, hanesan la’o-rai ida ne’ebé la’o ho objetivu laek. Ha’u sente moris ne’e laiha kberan. Ha’u sente moris ne’e hanesan manu-fuik no asu-fuik sira iha ai-laran ne’ebé laiha fatin loloos atu rani no toba.

Iha lorokraik ida, bainhira ami fila hosi foho Lakmaras nia tutun, ami hasoru kaereta truk (kamioneta) rua (2) ne’ebé tula nakonu ho sasán. Ta’uk, ha’u tauk. Ha’u laran moras. Laran ne’e triste be triste. Tanba, ha’u haree milísia ho nia família sira tuur iha karreta nia leten ho hamnasa no hakilar; “Hidup Indonesia. Hidup Laksaur. Rata bak. Kita Bawah rata bak.” Rona ida-ne’e, laran ne’e sente hetok triste be triste. Maibé, atu dehan saida no halo said aba sira. Ami halai fila lalais ba uma ne’ebé ami hela bá. Ha’u konta tuir saida mak ha’u haree iha minute balun liu daudaun ne’e ho matan-been (tanis).

Ai-knananuk Hafoin Setembru 1999

Fulan ida hela iha Lakmaras, milísia ho nia ema sira buka ha’u-nia aman atu kaer. Besik semana ida, ha’u-nia subar atu sira labele kaptura. Milísia ida mai buka ha’u-nia aman iha uma no buka beibeik to’o ameasa atu oho ha’u ho ha’u-nia alin na’in-rua (2), bainhira ha’u-nia aman la hatudu aan no la entrega-aan ba milísia nia liman.

Rona ida-ne’e, ha’u aman be subar iha uma laran, hakat sai mai liur hodi entrega aan ba milísia. Mate ka moris, hau aman entrega aan tanba salva ami oan sira hosi mate. Mate ka moris ukun arsik-aan maibé agora ne’e ha’u aman kala mate tebes duni ona no laiha biban atu uku rasik aan duni. Ha’u-nia aman hateke ami no milísia sira lori ha’u aman ba markas Tentara Nasional Indonesia (TNI) nian ida ne’eb’e hatuur iha foho ida-nia leten.

Hau sei hanoin hetan, iha loron ne’e, ha’u la’o no halai tuir ha’u-nia aman ba iha TNI nia fatin. Maibé, iha dalan klaran, ha’u-nia aman haruka ha’u fila fali ba uma. Hau aman dehan nune’e ba ha’u, “Oan-deoben, ó sei labarik. Ohin, ó labele ba hamutuk ho ha’u. Labarik kiik labele haree. Ó tenke fila ba uma haree ó-nia inan no alin sira ne’e lai. Aban, ha’u sei fila fali ba ita-nia uma”.

Ho matan-been, ha’u fila ba iha uma ne’ebé ami hela. La’o tuir dalan fila ba uma, ha’u hanoin de’it ha’u-nia aman. Mate ka moris? Moris ka mate? Ha’u-nia inan no abó sira hatene no hein de’it informasaun katak loron ohin hanesan loron ikus ba ha’u-nia aman. Sira tanis no tanis. Tuur mós tanis. Hamriik mós tanis. Toba mós tanis. Maibé ha’u lahatene katak sira tanis ba ha’u-nia aman.

Iha lorokraik, kala besik tuku haat (16:00), ha’u-nia aman mosu fali iha uma. Sorte boot! Ha’u-nia aman, milísia no TNI sira la oho. Hosi ne’e, ha’u aman konta ba ha’u katak nia kkolega na’in-rua (2) ne’ebe milisia kaer, ne’ebé sira kastigu hamutuk, ema kastigu na’in-rua besik atu mate. Baku, baku beibeik. Tuku, tuku la para rai. Basa, bas aba nafatin.

Ha’u-nia aman haktuir, “Ha’u-nia kolega na’in-rua ne’e, ninia moen (kelamin, sasán lulik) ne’e, milísia sira kua-kanek ho lamiña hafoin kose halimar ho masin ba sira-nia moen. Ha’u haree, hanesan naan-isin ne’ebé ema kua bosok iha leet sira-ne’e hafoin tempera ho masin no masako para atu lalar halimar iha ai-klaak nia leten. Terus, ha’u-nia kolega na’in-rua ne’e terus boot. Sira hakilar no halerik maibé membru milísia sira-ne’e hetok kua kanek ba beibeik no kose halimar ho masin ne’e ba sira-nia moen ba nafatin”.

La’ós ne’e de’it. Torturasaun la’o nafatin. To’o nervozu liu ona, kolega na’in-rua (2) ne’e ninia ain-kukun no liman-kukun sira-ne’e, membru milísia sira ne’e fokit sai hotu alkate hosi nia nia hun. Lori alkate, habit metin ain no liman-kukun sira ne’e hodi fokit sai hotu hosi nia hun. Maski ema hakilar ba hakilar, hetok sira fokit sai ain no liman-kukun sira-ne’e ho alkate to’o buat kukun sira-ne’e fokit mohu.

Agradese ba Maromak! Ha’u-nia aman ema la kastigu no halo torturasaun hanesan nia kolega na’in-rua. Tanba, sorte boot, membru TNI ida ne’ebé baibain uza ha’u-nia aman nia motor lori ba Atambua ne’e, ajuda hasai ha’u-nia aman hosi milísi sira-nia brutalidade. Ami hotu tanis bainhira bainhira ha’u aman fila-fali mai uma no konta tuir saida mak akontese ba nia no ba nia kolega na’in-rua (2) ne’e.

Hafoin semana rua hosi akontesimentu ida-ne’e, ami tenke sees aan hodi hakat liu ba Atambua hodi buka netik moris atu hamoris moirs. Iha tempu ida-ne’e mak ami haketak malu ho família. Abó-mane Jose Bere (matebian) hamutuk ka tuir fali ha’u-nia tiun Jacinto no Abó-feto feto Filomena la’o hamutuk ho ami ba liu Atambua. Ami ba hela iha fatin ida naran Nenuk-Buitonis (Atambua). Iha ne’ebá, iha uma kiik ida-ne’ebé didin ho bebak mak sai ami-nia hela fatin. No, iha fatin simples ida-ne’e, ami hahú moris no bele kontinua ami-nia moris ho dezafius oin-oin.

Agradese ba Maromak! Liu tiha fulan ida, ha’u aman hahú fali hanorin iha Eskola Primaria Debubot no ha’u ho ha’u-nia biin Ajinda (matebian) kontinua eskola iha eskola refere. La konsege ramata eskola, ha’u-nia biin husik hela ami família tomak tanba sofre moras. Iha momentu ne’e, ha’u-nia aman serbisu hamutuk mós ho UNICEF ne’ebé fó apoiu materiál no hahan sira ba maluk refujiadu sira tomak ne’ebe hela iha Atambua. Nune’e mós servisu hamutuk ho Igereja halo sensibilizasaun ba maluk timoroan sira ne’ebé hakarak fila-fali ba rai doben Timor-Leste. Iha tempu ida-ne’e mak milísia ho nia emar sira buka ha’u-nia aman atu oho.

Haree ba situasaun ne’ebé aumenta defisil, iha tinan 2001, ami tuir eleisaun iha Nenuk-Rai Ikun (Atambua) no hili atu fila ba rai doben Timor-Leste. Iha tempu ida-ne’e mak milísia sira ameasa ha’u-nia aman no tenta atu kaer no oho hotu ami sira-ne’e. Maibé, agradese Maromak! Tanba osan laek, ha’u-nia aman bele selu komandante milísia ne’e ho manu-aman (fanu-futu) ida-ne’ebé ami kesi iha uma.

To’o iha ne’e, ha’u bele dehan katak ami-nia vida hetan ameasadu maibé ho manu-aman ka manu-futu ida, ami bele futu fali sira entre milísia no ami salva ami-nia noris ho seguru. To’o ikus, iha fulan dezembru 2001, ami fila-fali mai iha ami-nia knua moris fatin Fatululik, Suai-Covalima, Timor-Leste. No, ha’u-nia ai-knananuk mós ninin ba-ne’e rohan ba-ne’e.

Jornalista: Cancio Xiemens

Editór: Agapito dos Santos

HAKEREK NO HATÁN

Please enter your comment!
Please enter your name here