Monumentu Masakre Negro 1999. Imajen/Espesiál.

Dadeer de’it maizumenus tuku 07:00, amo Hilario Madeira fó ameasa kedas ba komandante KODIM 1635 hodi dehan, “Ha’u-nia sarani sira ne’ebé imi culik (foti-na’uk) horikalan ne’e tenke hasai no fó fila mai ha’u agora kedas.” Entaun, komandante KODIM ne’e mós entrega ami na’in-neen (6) ba amo Hilario Madeira no amo lori ami ba igreja Suai.

DILI, 06 setembru 2020 (TATOLI)—Komemorasaun loron Masakre Setembru Negro 1999 iha Suai-Covalima familiár no foku liu ba loron 06 setembru maibé dalabarak haluha tiha Masakre Setembru Negro nia hun ne’e mai hosi ne’ebé, tanbasá mak populasaun sira ne’e refujia iha igreja Ave Maria Suai.

Notísia Relevante: Setembru Negro, mate-isin butuk iha igreja oin hanesan foho oan ida

Elizeu Gusmão “Sabelai”. Imejen/AFP.

Vítima ida hosi vítima wa’in hosi Masakre Setembru Negro iha Suai, Elizeu Gusmão “Sabelae”, haktuir katak Masakre Setembru Negro iha Suai tinan 1999 ne’e ninia hun maihosi milísia no DANRAMIL Suai (Sugito) foti-na’uk (culik) juventuude Suai-oan na’in-hitu (7) hosi nia uma, ne’ebé karreta Hino núemru 64 lori tula ba KORAMIL iha Salele atu tortura no oho iha 26 fevereiru 1999. Liuhosi entrevista via WhatsApp (WA), vítima Elizeu Gusmão “Sabelae” haktuir ninia sasin ba jornalista Agência TATOLI, Cancio Ximenes, domingu (06 setembru 2020).  Elizeu Gusmão “Sabelai” hananu hikas ai-knananuk kruel ne’e;

Iha loron 04 fulan fevereiru tinan 1999 bainhira ha’u fila hosi Fohorem maizumenus tuku 10:00 dadeersan, iha tempu ne’ebá hanesan Administradór Postu Administrativu (camat)  Tilomar, Mouzinho Caetano Moniz (Azino), Caetano Moniz nia oan no Carmelita Caetano Moniz nia maun, hala’o hela enkontro ho povu iha Aldeia Koitau, derrepente hetan ha’u no bolu no husu ha’u.

“Ita-boot hosi ne’ebé?”

“Ha’u hosi Fohorem.”

”Oh, ne’e ka? Ita mak naran Elizeu Gosmão.”

“Loos! Ha’u rasik.”

“Ita mak komandante boot iha Suai ne’ebé kontaktu beibeik ho GPK ka ema ai-laran.”

“Ha’u lahatene ema ai-laran no mós saida mak GPK ne’e.”

“Entaun, loos ona. Ita lahatene hotu maibé karik buat ruma akontese ba ita-boot, labele hakfodak,” dehan Azino ho oin mean no haruka ha’u fila ba uma.

Liu tiha loron 22, iha sesta loron 26 fulan fevereiru tinan 1999, milísia ne’ebé komanda hosi Olivio Moruk ho nia alin Egidio Manek hamutuk ho membru milísia maizumenus ema na’in-10 resin karreta boot ida no motor 10 resin halo pawai iha ha’u-nia uma oin. Sira ne’e mai hosi Salele. To’o tiha iha uma oin, sira hetan ha’u tuur hela iha uma oin, sira komesa hakilar ha’u hodi dehan, “Ó mak Elizeu ne’ebé komandante boot Gerakan pengacau Kemanan (GPK). Ó-nia nia ulun, ami sei tesi kotu tiha lori ba halo festa”.

Iha tempu ne’ebá, ha’u nonook hodi halai tama ba uma laran hodi hateten ba ha’u-nia ferik-oan, di’ak liu ita ba foho de’it ona. Maibé ha’u-nia ferik-oan hatán katak ita la sala ne’e tidak mungking ema estraga ita. Liu tiha ida-ne’e, milísia sira mós kontinua halo pawai ba liu ba Tafara.

Iha lorokraik maizumenus tuku 17.00, intelijen na’in-rua (2) ho naran Yosep Bau hanesan mós Sekretáriu Suku Casabauk ho nia maun Sebastião Mendonça nu’udar mós Xefe Suku Casabauk finji mai tan ha’u-nia uma. Sira dehan ba ha’u, kalan labele naran sai no iha uma de’i. Ha’u mós hatan dehan ha’u la sai ba-mai, iha uma de’it. Maibé afinál sira iha ona planu atu culik (foti-nauk) ha’u.

Depois iha kalan maizumenus iha tuku 19:00, intelijen na’in-rua (2) mai tan. Ida naran Malae Joaquim no membru polísia ida naran Nyoman, mai iha ha’u-nia uma dehan mai ha’u nune’e, “Mantri, ha’u-nia maluk polísia ne’e nia manu Loriku lakon no semo mai iha ita- nia uma sorin ne’e. Tan ne’e mk ami rua buka.”

No, ha’u-nia fuan ne’e komesa nakdedar. Tanba, iha tempu hanesan intelijen na’in-haat (4) mak mai kedas ha’u-nia uma. Entaun, ha’u hateten ba ferik-oan, ita haree de’it dala ruma ema mai buka ha’u karik. Maibé ha’u-nia ferik-oan nafatin ho prinsípiu katak ita la sala ne’e Maromak mós la aseita.

Maibé iha de’it oras balun, maizumenus tuku 10:000 liu, DANRAMIL Suai ho naran Sugito mai ho milísia lubuk ida lori karreta Hino núemru 64, milísia sira naran Americo Mali, Andreas Koli, Alipio Mau, no seluk tan ha’u la hatene, asalta ha’u-nia uma. Sira tá ha’u no baku tan ha’u-nia oan mane Eric ne’ebé foin tinan rua (2) fulan 10, to’o nia oin sira-ne’e bubu hotu. Sira atu sona tan ha’u-nia ferik-oan maibé la konsege tanba ha’u-nia ferik-oan hakilar. Bainhira sira tá ha’u hotu, ha’u monu ba rai no sira rasta ha’u sai mai estrada boot. Sira tula ha’u iha karreta Hino númeru 64 nia laran ho kolega na’in-hitu (7). Na’in-rua (2) seluk sira husik fali tanba idade sei kiik no ami na’in-hitu mak lori ba KORAMIL Salele atu oho ami iha tasi Salele nian.

Maibé, to’o iha dalan klaran, milísia sira-ne’e soe tiha ema na’in-ida (1) tanba sira hanoin mate ona, atu nune’e sira lori de’it ha’u ho kolega na’in-lima (5) seluk mak ba Salele hodi  aprezenta ba KORAMIL Salele. Nune’e, sira lori ami na’in-neen (6) atu ba oho iha tasi Salele maibé sira la konsege oho ami no lori fila mai Suai. To’o iha dalan klaran, besik Suku Casabauk, sira lori ami ba fali tasi Casabauk atu oho maibe la konsege nafatin.

Entaun, fila-fali lori ami mai Suai. Nune’e mós to’o tiha SMA Negeri Satu (1) Serankotek, lori fali ami ba tasi Akar Laran parte Suai Loro nian maibé la konsege nafatin. Entaun, lori ami mai fali iha KORAMIL Suai, DANRAMIL Sugito nia fatin. Sira foti tiha enxada ho skop (kanuru-boot), lori ami ba iha tasi Suai Loro besik Komarka Tuan Japaun nia sorin.

Bainhira, membru milísia sira ne’e ke’e tiha rai atu hakoi ha’u mak derrepente intelijen ida seluk naran Cornelis Noronha dehan ba Sugito nune’e, “Pak DANRAMIL, kita mau kubur orang ini tapi kita tidak punya surat penangkapan, ini bagaimana.” Entaun, DANRAMIL Sugito mós hanoin ida-ne’e no deside lori ami na’in-neen (6) fila ba KODIM 1635 Suai. Antes ba KODIM 1635 Suai, lori uluk ami ba POLRES Suai depois mak ba iha KODIM 1635 Suai.

To’o tiha iha KODIM mak sira dada ha’u-nia ain, rasta no soe tun hosi karreta Hino númeru 64 ne’e nia laran. Iha ne’e mak ha’u foin sadar (hatene tuir aan). Maibé, ha’u haree ladi’ak tanba ha’u-nia oin no matan ne’e bubu, ain kanek, ho kotuk laran ne’e kanek hotu. Tanba, iha dalan klaran, Danyon Olivio Moruk tuur tan ha’u-nia leten mak tebe ha’u  no sona hosi ha’u-nia kotuk laran ne’e.

Antes sira atu hatama ami ba sela nakukun (kamar gelap) ho medida 1×1 m2, sira rega uluk bee halo nakonu mak haruka ami tama ba nakukun laran. Iha kalan ne’e kedas, amo na’in-tolu (3) liuliu Amo Hilario Madeira no Francisco Soares preokupa loos. Tanba, ema hasai ona ami entaun Amo Francisco Soares mai iha KODIM 1635 Suai, Amo Hilario Madeira aranka kedas ba ha’u-nia uma iha uma Mura Casabauk Salele. Maibé, la konsege tanba intelijen balun ne’ebé servisu hamutuk ho ita, fó informasaun katak amo lalika ba Salele tanba milísi nakonu, Se amo obriga ba, entaun sira bele oho amo. Maibé, amo Hilario Madeira nafatin ba to’o Asumaten, sarani sira palang tiha amo Hilario, halo amo Hilario fila de’it mai iha igreja Suai.

Dadeer de’it maizumenus tuku 07:00, amo Hilario Madeira fó ameasa kedas ba komandante KODIM 1635 hodi dehan, “Ha’u-nia sarani sira ne’ebé imi culik (foti-na’uk) horikalan ne’e tenke hasai no fó fila mai ha’u agora kedas.” Entaun, KODIM mós entrega ami na’in-neen (6) ba amo Hilario Madeira no amo lori ami ba igreja Suai. Tanba situasaun komesa ladi’ak, Amo Huilario haruka ha’u ba halo tratamentu iha Hospital Audian Suai.

Iha ne’ebá, tentara (militár) no milísia mós buka ha’u beibeik. Iha tempu ne’e mós, Rui Lopes mós mai ho nia maluk ida, ha’u lahatene nia naran. Rui Lopes dehan ba ha’u, “Di’ak liu Elizeu tama Barisan Rakyat Timor Timur (BRTT) de’it ona.” Maibé, ha’u nonook tanba ko’alia la di’ak. Rui Lopes dehan tan ba ha’u, “Ema ne’ebé tá ita-boot ne’e, nia katana la kro’at karik. Ne’e mak tá la tama ne’e.” Maibé ha’u nonook de’it hodi la hatán nia. Depois nia mós fila ho nia kolega.

Hafoin akontesimentu iha uma Mura Salele iha fulan abril 1999, ha’u kontinua halai ba foho. Ha’u-nia ferik-oan ho oan mai subar hotu iha igreja Ave Maria Suai hamutuk ho sarani sira seluk hanesan refujiadau (pengunsi) to’o Konsulta Populár 30 agostu 1999.

Iha loron 12 fulan maiu tinan 1999, bainhira ha’u tun mai iha área Matai nian atu hasoru ha’u-nia ferik-oan ho ha’u-nia oan. Maibé, ha’u la hasoru tanba intelijen balun hatene ona ha’u atu tun mai vila. Milísia ne’e kontaktu ba milísia ho naran Junior (baibain Akademia Dangdut haksoit mate-aan iha studio-5 Indosiar), agora daudauk sei iha Jakarta-Indonézia lori kilat kompletu ho pistol, granada, hein ha’u iha Kampung Kunain, tanba ha’u-nia oan ho ferik oan iha hela ne’ebá, iha ha’u-nia alin nia uma. Entaun, Junior subar hela iha intelijen ho naran Eugenio, funsonáriu KODIM 1635 Suai, hodi hafuhu ha’u.

Bainhira ha’u to’o iha uma, Junior ho kilat karega kedas no ha’u tauk halai tama ba du’ut laran. Junior komesa hateten mai ha’u, “Maun Elizeu, keta halai, se lae ha’u tiru.” Entaun, ha’u mós la halai. Iha momentu ne’e, ha’u-nia ain mós kanek, tanba samurai monu tan ba leten. Depois Junior lori ha’u ba entrega iha Dangki Lino Barreto iha Zumalai durante semana tolu (3). Depois lori ha’u ba tan hasoru Danion Cancio Lopes hodi asina deklarasaun atu apoiu autonomia. Hotu tiha, lori ha’u ba hasoru tan Duta Besar Keliling Insdonesia nian, Francisco Lopez, iha Ainaro.

Sira detein ha’u iha Ainaro durante semana rua iha Kepala Pos dan Giro (Xefe Correio) Ainaro, Deonizio de Araójo (agora iha hela Dili sai ona Diretór Correo Dili). Depois semana rua Danki Lino Barreto foti ha’u lori ba Same atu hasoru Danion Abalai (grupu milisia nia naran). Maibé, to’o iha dalan ha’u finji kabun moras no tee-been. Entaun, sira husik ha’u baixa iha PUSKESMAS (Pusat Kesehatan Masyarakat) Hatu-Udo.

Tanba iha ne’ebá, ha’u hasoru loos ha’u-nia kolega eskola hamutuk iha SPK (Sekolah Perawat Kesehatan) Dili ho naran Essy hanesan parteira, entaun ami an’in-rua (2) kompak (konkorda ba malu) ho lia ida. Ha’u hateten ba partreira Essy atu hateten ba sira katak ha’u labele ba liu Same tanba ha’u-nia raan menus loos, se ha’u ba Same, bele mate iha dalan klaran. Entaun Dangki Lino Barreto mós fiar no husik ha’u baixa iha PUSKESMAS ne’e too lorokraik mak fila mai Zumalai.

Depois iha dadeersan, ha’u husu lisensa ba Dangki Lino Barreto atu ba Suai ho razaun katak ha’u-nia oan moras. Nune’e, Lino barreto mós fó ha’u ba Suai. Iha ne’e kedas ha’u ba liu iha Igreja Sve Maria Suai hodi hasoru maun Sesurai. Maun Sesurai dehan ba ha’u, “Ó hakarak fila ba Zumalai kaa lae.” Ha’u hatán, “Lae!”. Entaun, ha’u mós sai refujiadu ho ha’u-nia oan ho ferik-oan to’o loron Konsulta Populár 30 agostu hodi tuir votasaun.

Jornalista: Cancio Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here