Xefe Kaza Sivíl Prezidénsia Repúblika, Francisco Maria de Vasconcelos. Imajen/Mídia PR

DILI, 01 setembru 2020 (TATOLI)—Rezultadu reuniaun, ohin, Konsellu Superiór Defeza no Seguransa (KSDS) konkorda estensaun Estadu Emerjénsia bazea ba pedidu hosi Governu atu halo renovasaun ba Estadu Emerjénsia.

Notísia Relevante: KE rekomenda ba Xefe Estadu haruka pedidu renovasaun EE ba PN

“Konsellu Superiór Defeza no Seguransa konkorda halo estensaun Estadu Emerjénsia. Ohin dadeer Konsellu Superiór Defeza no Seguransa rekomenda ba Prezidente Repúblika atu hato’o pedidu Governu nian ba Parlamentu Nasionál hodi diskute depois aprova,”  dehan Casa Civil, Francisco Maria de Vasconcelos, liuhosi Konferénsia Imprensa, iha Palásiu Prezidensiál, Bairru Pité, segunda ne’e.

Xefe Casa Civil ne’e fó-sai katak, bainhira Parlamentu Nasionál aprova pedidu Governu nian hafoin Xefe Estadu bele dekreta.

“Lalais liu ohin, lae aban, Prezidente Repúblika sei enkamiña pedidu Governu nian ba Parlamentu Nasionál,” nia dehan. 

Xefe Casa Civil hateten pedidu Governu nian kona-ba estensaun Estadu Emerjénsia ne’e hanesan mós aplikasaun EE daudaun ne’e.

“Estensaun ida-ne’e hanesan mós ida foin liubá ba ne’e mak hanesan fronteira, aeroportu no portu para evita transmisaun moras ne’e iha sosiedade Timorense,” esplika Konsellu Superiór Defeza no Seguransa.

Razaun membru Konsellu Superiór Defeza no Seguransa husu estensaun tanba númeru pozitivu surtu COVID-19 iha Indonézia aumenta maka’as.

Membru  sira-ne’ebé halo parte iha Konsellu Superiór Defeza no Seguransa mak: Prezidente Repúblika Francisco Guterres Lú Olo, Primeiru-Ministru no Ministru Interiór Taur Matan Ruak, Ministra Negósiu Estranjeiru no Kooperasaun Maria Adalzija Magno, Ministru Defeza Filomeno Paixão,   Ministru Justisa Manuel Cárceres, Xefe Estadu Maiór Jenerál F-FDTL Lere Anan Timur, Komisáriu PNTL Faustino da Costa no Diretór Jerál Servisu Nasionál Intelijénsia Manuel Serrano.

Nune’e mós halo parte iha Konsellu ne’e,  membru sira nomeadu hosi Parlamentu Nasionál hanesan Adérito Hugo da Costa, David Dias Ximenes, Abel Pires da Silva. Membru sira nomeadu hosi Prezidente Repúblika mak José Manuel Fernandes ‘Nakfilak’ no Cristina da Silva.

 Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here