Logotipu JSMP

DILI, 04 setembru 2020 (TATOLI)-Organizasaun la’ós Governu nian, Programa Monitorizasaun Sistema Judisiál (JSMP-sigla ingles) kontinua fó formasaun kona-ba demokrasia no asesu ba justisa formál iha Timor-Leste  ba membru konsellu suku iha Suku Kairui, Postu Administrativu Laleia, Munisípiu Manatuto.

Notísia Relevante : JSMP fó formasaun demokrasia no asesu ba justisa formal ba Konsellu Suku Atabae

Formasaun ne’e hala’o iha Suku Kairui  ne’ebé partisipante sira kompostu husi membru estrutura suku ne’ebé mai husi aldeia lima ho totál ema na’in-16 (feto 6 no mane 10).

“Formasaun ne’e nu’udar meiu ida atu bele habelar informasaun no hasa’e koñesimentu membru konsellu suku sira nian ligadu ho demokrasia no oinsá atu asesu ba justisa formál iha Timor-Leste,” informa Diretora Ezekutiva JSMP, Ana Paula Marçal, liuhusi komunikadu imprensa ne’ebé  Tatoli asesu, ohin, iha Dili.

Ho formasaun ne’e, JSMP espera membru konsellu suku sira bele dezempeña sira-nia kna’ar ho di’ak iha komunidade no tulun komunidade atu rezolve sira-nia problema tuir dalan ne’ebé loos no apropriadu tuir lei.

Iha treinamentu ne’e, partisipante sira husu kona-ba hatún Prezidente Repúblika liuhusi dalan demonstrasaun ne’e legál ka lae, entre lei formál ho kultura ida ne’ebé mak vale liu, sé mak tenke garantia direitu sidadaun sira-nian, kazu ne’ebé rezolve iha suku ho konsentimentu husi parte rua bele simu malu ne’e viola lei ka lae.

Hatán ba kestaun kona-ba demonstrasaun hodi hatún Prezidente Repúblika ne’e tuir lei ka la’e, iha esplikasaun JSMP haktuir katak Timor-Leste nu’udar Estadu direitu demokrátiku ida ne’ebé iha garantia ba direitu fundamentál sira liu-liu liga ho liberdade ba reuniaun no manifestasaun sira hanesan prevee ona iha artigu 40 no 42 konstituisaun RDTL no artigu 19 no 21 konvensaun internasionál kona-ba direitu sivíl no polítika (ICCPR) ne’ebé Timor-Leste ratifika.

Aleinde ne’e, iha ona lei própria ne’ebé regula kona-ba reuniaun no manifestasaun mak lei nú.1/2006 kona-ba liberdade Reuniaun no manifestasaun sira.

JSMP mós esplika katak ultima desizaun atu hasai Prezidente Repúblika tuir dalan legál mak tenke prienxe artigu 79 alínea 2 konstituisaun RDTL ne’ebé haktuir katak Prezidente halo violasaun grave ba konstituisaun no sei hasai nia imunidade husi Parlamentu Nasionál hodi submete ba prosesu iha Tribunál Supremu Justisa no kuandu hetan kondenasaun efetiva, automatikamente nia sei lakon nia kargu nu’udar Prezidente Repúblika.

Enkuantu kona-ba lei formál ho lei informál ka kultura, ida ne’ebé mak vale liu, JSMP haktuir katak lei ka norma rua ne’e vale hotu, maibé bainhira haree tuir ierarkia, lei formál mak aas liu tanba regula ema hotu ne’ebé hela iha territóriu nasionál, enkuantu lei informál ka kultura regula de’it iha komunidade lokál, no norma ida ne’e la hanesan ka keta-ketak iha fatin ida ho fatin seluk, nune’e komunidade ne’ebé ketak la iha obrigasaun atu halo tuir.

Kestaun sé mak tenke garantia direitu umanu sidadaun nian, JSMP esplika katak ne’e devér ka obrigasaun Estadu nian tuir alínea b artigu 6 konstituisaun RDTL nian ne’ebé haktuir katak Estadu sei garantia no promove direitu sidadaun sira nian, liberdade fundamentál no respeitu Estadu nia prinsípiu sira kona-ba direitu demokrátiku.

 Iha parte ida kona-ba kazu ne’ebé suku rezolve ona iha nivel suku nian, JSMP esplika katak lei fó dalan atu bele halo konsiliasaun ba kazu sira ho natureza krime semi públiku, maibé iha kazu krime públiku sira tenke submete ba iha prosesu tuir lei formál, maske rezolve ona iha suku.

 Iha sesaun ikus husi treinamentu ne’e, membru estrutura suku sira konsidera treinamentu loron ida de’it ne’e la sufisiente ba sira atu bele kompriende ho di’ak matéria sira ne’ebé JSMP hato’o. Nune’e husu atu JSMP bele kontinua halo treinamentu ba sira nia suku tanba matéria sira ne’e importante tebes ba sira.

xefe suku, Roberto Ximenes, agradese tebes ba prezensa JSMP hodi realiza treinamentu iha sira nia suku no konsidera matéria ne’ebé JSMP aprezenta importante tebes no sei util tebes ba konsellu suku sira iha sira-nia serbisu nu’udar servidór komunidade atu serbisu tuir lei sira no rona ema hotu nu’udar regra demokrátiku hanesan meu importante atu fó solusaun ba problema sira iha komunidade.

 Xefe suku ne’e apresia ho partisipasaun konsellu suku sira no husu ba sira atu kontinua fahe informasaun hirak ne’e ba komunidade no estrutura suku sira ne’ebé la partisipa iha treinamentu ne’e.

Programa ne’e hetan apoiu hosi Governu liuhusi gabinete apoiu sosiedade sivíl, gabinete Primeiru-Ministru.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here