Logotipu JSMP

DILI, 05 agostu 2020 (TATOLI)-Organizasaun la’ós Governu nian, Programa Monitorizasaun Sistema Judisiál  (JSMP-sigla inglés),  foin lalais ne’e,  realiza treinamentu ba membru Konsellu Suku iha Suku Atabae, Postu Administrativu Atabae, Munisípiu Bobonaro.

Notísia Relevante : JSMP Kontinua Fó Formasaun Ba Estudante Fakuldade Direitu

Formasaun ne’e  kona-ba demokrasia no asesu ba justisa formál iha Timor-Leste, ne’ebé  hetan partisipasaun husi membru estrutura suku husi aldeia lima ho totál partisipante na’in-15 (feto-neen (6) no mane-sia (9)).

“Formasaun ne’e nu’udar atividade kontinuasaun husi programa JSMP nian durante ne’e no hanesan meiu ida atu bele habelar informasaun hodi hasa’e koñesimentu membru konsellu suku no komunidade sira kona-ba demokrasia no oinsá atu asesu ba justisa formál iha Timor-Leste,”  hateten Diretora Ezekutiva JSMP, Ana Paula Marçal, liuhusi komunikadu imprensa ne’ebé Agência Tatoli asesu, ohin.

Nia haktuir, formasaun ne’e bele dezempeña  konsellu suku sira-nia papél ho di’ak liután iha dezenvolvimentu nasionál liuhusi sira-nia suku rasik.

Durante treinamentu partisipante liuhosi interasaun sira husu kona-ba lei ne’ebé regula hodi limita harii partidu polítiku iha Timor-Leste. Nune’e mós  oinsá halo prosesu ba kazu abandona labarik, oinsá kazamentu ne’ebé legál no aplikasaun suspensaun ba pena prizaun sira ne’ebé dala barak halo komunidade sira konsidera lei la aplika ho di’ak.

Hatán ba kestaun ligadu ho partidu polítiku ne’ebé mosu barak, Ana Paula Marçal esplika katak, Timor-Leste adota sistema demokrasia ne’ebé rekoñese sistema multipartidáriu regula iha Artigu 7 Konstituisaun RDTL, tanba ne’e mak fó liberdade ba sidadaun no grupu se de’it bele harii partidu polítiku. Mezmu nune’e, iha nia rekizitu sira ne’ebé tenke kumpri regula iha Lei Nú. 02/2016 primeira alterasaun ba lei nú. 3/2004 kona-ba Partidu Polítiku sira.

 Enkuantu kona-ba prosesu kazu abandona labarik nian, JSMP esplika katak estadu tau as interese labarik sira-nian no ba kazu sira-ne’e nia prosesu liuhusi dalan sivíl iha artigu ida ne’ebé define kona-ba regulasaun podér paternal no bainhira inan-aman la kumpre sira nia devér atu fó alimentasaun ba nia oan sira mak bele prosesu tuir dalan krime nian katak inan-aman la halo tuir obrigasaun alimentár.

Kestaun kona-ba rekoñesimentu ba kazamentu ne’ebé legál, JSMP esplika tipu kazamentu oin tolu ne’ebé define iha Kódigu Sivíl hanesan kazamentu iha igreja, rejistu sivíl no kultura ka adat ka barlakeadu. Lei sivíl ne’e mós konsidera de’it kazamentu monogámiku tanba ne’e bandu ema iha feen ka la’en liu ida.

Kona-ba tribunál aplika suspensaun ba pena prizaun, JSMP esplika katak tuir Lei Kódigu Penál Artigu 68 haktuir katak tribunál bele suspende pena prizaun aplikada ne’ebé la aas-liu tinan 3 nia ezekusaun, durante tinan 1 to’o tinan 5, hahú iha desizaun tránzitu iha julgadu.

Ida ne’e signifika katak pena prizaun ne’ebé menus husi tinan 3 mai kraik, tribunál sei suspende tiha pena prizaun, la aplika pena prizaun efetivu. Bainhira tribunál aplika pena prizaun efetivu ka ezekusaun pena prizaun ba kazu ne’ebé pena prizaun menus husi tinan-tolu (3), tribunál tenke fundamenta nia desizaun ne’ebé la suspende ezekusaun kuandu pena aplikada fo-fatin ba suspensaun ne’e.

Iha intervensaun Xefe Suku Paulino Mali Bere konsidera  katak informasaun ne’ebé JSMP fahe foin primeira vés hala’o iha nia suku no nia apresia tebes ho JSMP nia prezensa atu fahe informasaun kona-ba demokrasia no asesu ba justisa formál iha Timor-Leste ne’ebé durante ne’e sira nunka hetan asesu ba informasaun hirak ne’e.

 Xefe suku mós husu ba estrutura suku sira atu kontinua fahe tutan informasaun hirak ne’ebé hetan ona husi JSMP ba komunidade sira ne’ebé sira pertense ba hodi nune’e komunidade sira bele hatene no kompriende di’ak liután Timor-Leste nia sistema demokrasia no justisa.

Jornalista   : Nelson de Sousa

Editór         : Francisco Simões

HAKEREK NO HATÁN

Please enter your comment!
Please enter your name here