Primeiru-Ministru, Taur Matan Ruak prezide reuniaun Konsellu Ministru estraordinária, iha Palásiu Governu, sexta (04/09), Imajen Tatoli/Egas Cristovão

DILI, 04 setembru 2020 (TATOLI)-Primeiru-Ministru (PM), Taur Matan Ruak, aprezenta projetu dekretu Governu, kona-ba medida ezekusaun ba deklarasaun Estadu Emerjénsia (EE) dalimak, ne’ebé fó-sai hosi Dekretu Prezidente Repúblika númeru 59/2020, loron 03 setembru, hodi hatán ba pandemia COVID-19.

Diploma ne’ebé aprezenta iha reuniaun estraordinária Konsellu Ministru (KM) no hetan aprovasaun.

“Estadu Emerjénsia ne’e abranje territóriu nasionál tomak no vigora hahú hosi oras 00:00 loron 05 setembru to’o oras 23:59 loron 04 outubru 2020,” relata Ministru Prezidénsia Konsellu Ministru, Fidelis Manuel Leite Magalhães, hafoin reuniaun ezekutivu iha Palásiu Governu, sesta ne’e.

Notísia Relevante: Prezidente Repúblika dekreta ona EE dalimak

Dekretu Governu ne’e determina katak ema hotu ne’ebé hakarak tama ka sai hosi territóriu nasionál, tenke sujeita ba kontrolu saúde no izolamentu profilátiku (kuarentena) ho durasaun mínima loron-14.

“Prazu ne’e la aplika ba membru tripulasaun sira hosi aviaun ne’ebé tula pasajeiru no merkadoria entre nasaun, motorista ne’ebé lori kareta boot sira hodi tula merkadoria entre nasaun liuhosi rai-maran,” nia akresenta.

Medida ne’e mós, ba ema sira ne’ebé hatudu kualkér sintoma hanesan temperatura isin-lolon nian to’o 37,50 sélsiu ba leten, me’ar, kakorok moras, inus-been no fani, no susar atu dada iis, exetu iha kazu evakuasaun médika nian, bandu sa’e bus (auto-karru), ró no aviaun.

Dekretu Governu ne’e, obriga mós atu halo teste ba ema sé de’it maka tama mai territóriu nasionál no aprezenta sintoma hanesan moras COVID-19 no karik iha teste ne’e hatudu katak iha moras COVID-19, tenke tama iha izolamentu terapéutiku.

“Hela iha konfinamentu obrigatóriu durante loron 14 ka to’o alta hosi médiku iha estabelesimentu saúde, iha uma rasik ka sentru izolamentu Estadu nian, ba ema infetadu COVID-19 ne’ebé tama iha territóriu nasionál maihosi rai-li’ur ka ema ne’ebé autoridade saúde sira halo hela vijilánsia ba sira,” nia esplika.

Prazu ba kofinamentu obrigatóriu la aplika ba membru tripulasaun aviaun ne’ebé tula pasajeiru no merkadoria entre nasaun.

Nune’e mós, motorista ne’ebé maka lori kareta boot hodi tula merkadoria entre nasaun liuhosi fronteira terrestre, ne’ebé sujeita ba períodu konfinamentu obrigatóriu no koñese ho tempu permanénsia hosi ema hirak ne’e iha territóriu nasionál, la konta ho tempu tripulasaun veíkulu nian.

“Regra kona-ba konfinamentu obrigatóriu ba sidadaun hirak ne’e aprova ho diploma ministeriál hosi Ministériu Saúde,” Ministru subliña.

Iha kazu exesionál, justifika ho razaun saúde no seguransa populasaun sira-nian, Ministru Interiór bele determina atu taka temporáriu ka hamenus oráriu atendimentu ba públika iha postu fronteira terrestre sira.

Durante períodu vijénsia EE nian, lisensa, autorizasaun no administrativu ba dokumentu sira hotu válidu nafatin, la haree ba durasaun hosi ninia prazu validade nian.

Fiskalizasaun ba kumprimentu ba dispozisaun sira iha diploma ne’e kompete ba forsa no servisu seguransa sira no ba ekipa vijilánsia epidemiolójika no sanitária.

“Tanba ne’e, ema labele kontra ho forma saida de’it ativa ka pasiva hasoru orden sira ne’ebé fó sai ona husi autoridade públika kompetente sira, iha ezekusaun ba deklarasaun Estadu Emerjénsia,” governante ne’e afirma.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here