Primeiru-Ministru, Taur Matan Ruak hamutuk ho Membru Governu Sira partisipa iha Debate kona-ba pedido Autorizasaun ba Renovasaun Deklarasaun Estadu Emerjênsia husi Prezidente Repúblika, iha Sala Plenáriu PN, kinta (03/09). Imajen Tatoli/Egas Cristovão

DILI, 03 setembru 2020 (TATOLI)Primeiru-Ministru (PM), Taur Matan Ruak, defende iha nesesidade halo estensaun Estadu Emerjénsia (EE) ba dalimak hodi fó biban ba Governu atubele reunifika forsa no kapasidade hodi impede kontájiu surtu COVID-19 iha Timor-Leste.

“Governu deside husu dala-ida tan ba Prezidente Repúblika atu halo estesaun Estadu Emerjénsia ba dalimak, hafoin ramata Estadu Emerjénsia dahaat. Ita-nia objetivu atu deteta kazu importadu, kura, no impede kontájiu ba komunidade sira nia leet inklui salva povu-nia vida,” tenik Xefe Governu iha ámbitu diskusaun no votasaun ba renovasaun deklarasaun EE iha territóriu nasionál, iha sesaun plenária Parlamentu Nasionál (PN), kuarta ne’e.

Notísia Relevante: Governu propoin PR Lú Olo estende tan EE ba dalimak

EE dahaat sei ramata iha oras 23.59 loron 04 setembru 2020.

PM Taur dehan, Governu presiza kontinua rekorre ba EE hodi limita direitu no liiberdade sidadaun sira, liuliu atu asesu no halo movimentu iha fronteira sira, hodi ezerse maiór kontrolu iha fronteira no reforsa medida sanitária.

“Iha ita-nia rai iha kazu konfirmadu positivu 27, ne’ebé kazu 25 rekuperadu ona no atualmente iha rua mak ativu, tanba ne’e ita presiza iha kapasidade evita kontájiu iha komunidade sira nia leet, se ita konsege halo bele ajuda atu labele iha kazu mate tanba moras ne’e iha ita-nia rai,” nia akresenta.

Governu hato’o pedidu ba Prezidente Repúblika, Francisco Guterres ‘L­ú olo’ no reforsa hosi PN atu estende EE dalimak tanba iha nasaun 216 maka afetadu ona ho COVID-19, ne’ebé númeru afetadu ultrapasa ona millaun 25 no mate kuaze 900.000.

“Iha ita-nia rejiaun, liuliu nasaun viziñu ne’ebé besik liu ita, númeru kazu surtu COVID-19 kontinua aumenta no iha risku ba importasaun no kontájiu mai ita-nia rai,” nia fó hanoin.

Ho nune’e, Xefe Governu husu ba deputadu sira atu fó autorizasaun ba Xefe Estadu atubele dekreta EE.

Prezidente Repúblika husu pedidu autorizasaun ba PN bazeia ba alinea g konjuga ho artigu 25 Konstituisaun no artigu númeru 1,9, 10, 11, , 15 no 27 hosi Lei númeru 3/2008, 22 fevereiru kona-ba Rejime Estadu Sítiu no Estadu Emerjénsia, ho objetivu renova deklasaun EE iha territóriu nasionál tomak, ho razaun iha subsisténsia situasaun kalamidade públika ba períodu loron 30.

EE dalimak suspende direitu tolu

Tuir pedidu PR Lú Olo, renovasaun EE ho ninia durasaun hahú hosi oras 00:00 loron 05 setembru 2020 (sábadu) no termina iha oras 23.59 loron 04 outubru 2020 (domingu), iha territóriu nasionál tomak hodi suspende direitu balun ho parsialmente hanesan:

Dahuluk, ba sirkulasaun internasionál, sei estabele kontrolu sanitáriu iha portu, aeroportu ka postu fronteira terrestre atu impede moras ne’e tama mai territóriu nasionál ka kondisiona observánsia kondisaun nesesáriu hodi evita risku propagasaun epidemia, nune’e mós toma medida nesesária asegura sirkulasaun internasionál ba sasán no serbisu esensiál.

Daruak, liberdade sirkulasaun no fixasaun rezidénsia ba kualkér pontu iha territóriu nasionál, sei lidera hosi autoridade públika sira hodi bele redús risku kontájiu no ezekuta medida prevensaun no kombate epidemia, inklui konfinamentu kompulsivu domisíliu.

Ikus liu, direitu rezisténsia, kualkér aktu rezisténsia ativa ka pasiva hosi autoridade públika kona-ba ezekusaun EE.

Razaun prezidente Repúblika husu revonasaun deklarasaun EE tanba Timor-Leste geografikamente besik Repúblika Indonézia ne’ebé rejista ona 160.000-resin kazu kofirmadu COVID-19, ema na’in-7.000 mak mate hosi provínsia 34 iha territóriu Indonézia nian inklui provínsia viziña Timór Osidentál (Nusa Tenggara Timur- NTT).

Nune’e mós nasaun viziña Austrália ne’ebé rejista ona kazu 25.000 infesaun konfirmadu no ema na’in-600 resin mak mate ona.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here