Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (26/08). Imajen Tatoli/Egas Cristovão

DILI, 26 agostu 2020 (TATOLI)-Liuhosi reuniaun Konsellu Ministru (KM), Governu delibera ona atu propoin ba Prezidente Repúblika (PR), Francisco Guterres Lú Olo, atu estende tan Estadu Emerjénsia (EE) dalimak ba loron 30.

“Haree ba evolusaun situasaun epidemiolójika no proliferasaun kazu kontájiu COVID-19 nian ne’ebé rejista ona, hamosu preokupasaun maka’as tantu iha nível rejionál no mós mundiál, no ho hanoin atu evita no neutraliza risku hada’et nian hosi COVID-19, nune’e bele proteje saúde públika no kapasidade resposta husi sistema nasionál saúde nian”, relata Ministru Prezidénsia Konsellu Ministru, Fidelis Manuel Leite Magalhães, hafoin ramata reuniaun KM iha Palásiu Governu, kuarta ne’e.

Nia hatutan, intensaun Governu propoin ba Xefe Estadu estende EE hodi permite suspensaun ka restrisaaun ba direitu atu halo sirkulasaun internasionál, direitu atu halo sirkulasaun no direitu ba fiksasaun rezidénsia no mós direitu rezisténsia nian.

EE dahaat hahú hosi oras 00.00 iha loron 06 agostu 2020 to’o oras 23.59 iha loron 4 setembru 2020 durante loron 30 ba zona iha fronteira, aeroportu no portu.

Xefe Estadu dekreta EE faze dahuluk ba loron-30, ne’ebé hahú entra ein vigór iha 28 marsu hahú oras 00:00 to’o 26 abríl 2020 oras 23:59, atu fó dalan ba Governu implementa médida espesífiku sira hodi prevene propagasaun COVID-19.

Haree ba nesesidade atu estende, Xefe Estadu promulga estensaun EE períodu daruak ho durasaun loron-30 tuir pedidu Govenu.

Nune’e, iha loron 27 abríl, Prezidente Repúblika liuhosi Dekretu Prezidensiál númeru 32/2020 promulga estensaun EE períodu daruak ho durasaun loron-30, hahú husi oras 00.00 loron 28 abríl to’o oras 23:59 27 maiu 2020.

Ikus liu, EE ba períodu datoluk implementa iha oras 00:00 loron 28 maiu to’o oras 23:59 loron 26 juñu 2020.

Jornalista: Antónia Gusmão

Editora:  Julia Chatarina

HAKEREK NO HATÁN

Please enter your comment!
Please enter your name here