Primeiru-Ministru, Taur Matan Ruak hamutuk ho Membru Governu Sira partisipa iha Debate kona-ba pedido Autorizasaun ba Renovasaun Deklarasaun Estadu Emerjênsia husi Prezidente Repúblika, iha Sala Plenáriu PN, kinta (03/09). Imajen Tatoli/Egas Cristovão

DILI, 03 setembru 2020 (TATOLI)-Primeiru-Ministru, Taur Matan Ruak, fó hanoin ba ema sira ne’ebé falsifika dokumentu hodi aproveita oportunidade simu subsídiu ba kada uma-kain $200, atu entrega fali hodi evita prosesu kriminál iha tempu oin mai.

Antes ne’e, iha prosesu avaliasaun ba reklamasaun subsídiu, Ministériu Solidaridade Sosiál no Inkluzaun (MSSI) envolve mós parte relevante sira hanesan Comissão Antí Corrupção (CAC) no Provedoria Direitu Umanu no Justisa (PDHJ, sigla portugés), Inspetor Geral Estadu (IGE) no Comissão Função Pública (CFP).

“Ami simu dokumentu hosi CAC, PDHJ, IGE no CFP, ami estuda seriamente no hakarak hateten ema ne’ebé falsifika dadus no aproveita oportunidade hetan benefísiu, sei prosesadu tuir dadus ne’ebé iha. Hanesan Primeiru-Ministru, ha’u hakarak apela ba sira ne’ebé simu ho forma oportunistikamente hetan benefísiu, halo favór entrega filafali osan ou entaun ba para iha kadeia,” apela Xefe Estadu iha plenáriu Parlamentu Nasionál (PN), kinta ne’e.

Notísia Relevante: Benefisiáriu 148 tenke devolve subsídiu agregadu familiár

Xefe Governu hato’o kestaun ne’e hodi hatán ba preokupasaun deputadu sira kona-ba subsídiu $200 ba kada família ne’ebé ho rendimentu $500 mai kraik kada fulan to’o agora balun seidauk hetan.

Xefe Ezekutivu garante, kona-ba uma-kain reklamante sira, desde prienxe rekezitu sei la lakon direitu.

“Kona-ba subsídiu uma-kain, ita sei iha 15.000 reklamante, tanba ne’e MSSI halo esforsu atu konfirma dadus no konsege haree ona uma-kain 4.000 maka seidauk hetan, maibé ha’u garante sira ne’ebé seidauk simu desde dadus loos sei hetan maski tarde. Sira ne’ebé la reuni kritériu naturalmente sei la hetan,” nia informa.

Antes ne’e, liuhosi rezultadu monitorizasaun no akompañamentu ekipa konjunta iha ámbitu ezekusaun subsídiu uma-kain iha territóriu nasionál, deskobre katak benefisiáriu na’in-148 ne’ebé korresponde ho totál pagamentu $29.600, la prienxe rekizitu no iha obrigasaun tuir lei tenke entrega filafali osan ba Estadu.

Hosi serbisu monitorizasaun no akompañamentu ne’e, ekipa konjunta konsege trava benefisiáriu ne’ebé asesu ba subsídiu uma-kain hamutuk 1.927, korresponde ho totál osan Estadu estimativa $385.400.

Jornalista: Florêncio Miranda ximenes
Editora: Julia Chatarina

1 KOMENTÁRIU

  1. Ema hamutuk 148 la prinxe rekezitus entaun Governu/Minsteriu/parte kompetente fo sai naran husi suku nebe nunee sira bele intrega fali. Karik.nia funsionariu bele koa nia salariu. Laos iha situasaun difisil nua laran tan deit osan $200 lori nia povu ba kadeia. Nee lalos. Satan osan nee Governu rasik mak hakarak fo laos povu mak obriga Governu. Sala hadia laos lori ba kadeia. Tanba nee laos krimi boot.

HAKEREK NO HATÁN

Please enter your comment!
Please enter your name here