Estudante sira uza maskara no fase hela liman bainhira partisipa iha abertura prosesu aprendizajen iha eskola primária São José Operário Balide. Imajen António Goncalves

DILI, 03 setembru 2020 (TATOLI)— Deputadu husi Bankada Frente Revolusionária Timor-Leste Independente (FRETILIN), Silvino Adolfo Morais husu Ministériu Saúde (MS) atu kontinua fahe informasaun kona-ba oinsá prevene propagasaun surtu Covid-19 ba komunidade.

Plenaria Parlamentu Nasionál (PN). Imajen/ António Gonçalves

Deputadu Silvino Adolfo Morais hateten, estensaun Estadu Emerjénsia (EE) ne’e pertinente tebes maibé atividade ne’ebé maka presiza halo ne’e mak importante la’ós ko’alia kona-ba gastu osan, osan ne’e pertinente atu implementa programa maibé atividade atu prevene Covid-19 ne’e mak importante liu.

Tuir nia, atividade governu nian iha EE dahuluk la’o kapaas tanba MS ho nia parséria sira halo esplikasaun, halo sosializasaun kona-ba moras ida-ne’e.

“Ha’u la hatene komunidade agora ne’e komprende hotu ona moras ne’e ka lae, agora ha’u haree Ministériu Saúde para tiha ona nia sosializasaun mas fofoun la’o kapaas tebes tanba sai no tama suku hodi fahe informasaun,” reprezentante povu, Silvino Adolfo Morais dehan liuhosi diskusaun revonasaun deklarasaun EE iha plenária Parlamentu Nasionál, kinta ne’e.

Deputadu ne’e husu estensaun EE dalima ne’e tenke la’o hanesan ho EE dahuluk nune’e ema hotu tenke uza máskara, fase-liman beibeik ho sabaun no prátika distansiamentu iha ne’ebé de’it.

Tanba tuir nia, buat tolu ne’e mak familiár ona iha sosiedade timorense entaun moras ne’e la tama sosiedade.

“Agora ita foka ba situasaun uza máskara, distansiamentu sosiál maibé agora ne’e la la’o. Ita haree agora ne’e laiha liu; festa iha-ne’ebé de’it máskara ema la uza ona. Ha’u hanoin entensaun ida-ne’e intensionaliza fali atividade sira-ne’e ba iha komunidade,” Deputadu Bankada FRETILIN ne’e fó hanoin.

Enkuantu, Deputada Bankada CNRT, Deputada Bendita Magno hateten, atu halo prevensaun ba surtu Covid-19 ne’e la’ós liu de’it hosi EE maibé liuhosi atividade.

“Atividade sira mak importante liu, osan ne’ebé ita aprova ita seidauk hatene ninia ezekusaun loloos kona-ba fundu Covid-19, realidade ami hasoru iha terrenu la hanesan ho governu nia esplikasaun. Ita-boot sira atu husu estende EE ne’e ba dala-lima ona, fulan-rua de’it mós ita-boot sira la selu, otél de’it mós ita boot sira la selu. Ita kuandu orienta ema, ita tenke hatene mós ita-nia devér hodi haree ba situasaun sira-ne’e,” reprezentante povu ne’e  dehan.

Notísia relevante:PM Taur defende EE bele impede kontájiu COVID-19

Jornalista: Evaristo Soares Martins

Editór : Cancio Ximenes

HAKEREK NO HATÁN

Please enter your comment!
Please enter your name here