Governu realiza jornada orsamentál ba preparsaun OJE 2021, iha salaun Ministériu Finansa, Aitarak-Laran, tersa (04/08). Imajen/Florêncio Miranda Ximenes

DILI, 04 agostu 2020 (TATOLI)-VIII Governu Konstitusionál hahú diskute jornada orsamentál 2021 ho tema “orsamentu atu rekupera no hametin dezenvolvimentu” hodi define prioridade nasionál no determina tetu fiskál ba Orsamentu Jerál Estadu (OJE) 2021.

Primeiru-Ministru (PM), Taur Matan Ruak, informa iha tinan 2020 Estadu Timor-Leste hasoru dezafíu hanesan krize polítika ne’ebé obriga nasaun la’o ho orsamentu duodésimu, dezastre naturál no surtu COVID-19 . 

Nune’e, iha jornada orsamentál ne’e presiza define hamutuk prioridade nasionál no tetu orsamentál ba OJE 2021 hodi bele halo rekuperasaun no hametin dezenvolvimentu.

“Ita ultrapasa dezafíu hotu no kontente atu konsolida  ita-nia pasu sira ba faze seluk hanesan rekuperasaun no kresimentu ekonómika. Espera iha orsamentu 2021 ne’e ba faze rekuperasaun nian no la’ós estensaun ba faze kombate COVID-19 nian,” tenik PM Taur iha diskursu aberura jornada orsamentál 2021 iha edifísiu Ministériu Finansa (MF), Aitarak-Laran, tersa ne’e.

Xefe Governu nota katak presiza halo atendimentu ba medida rekuperasaun ekonómika ne’ebé hatudu realidade ne’ebé fó impkatu ba sidadaun nia moris. 

Governu liuhosi MF kria ona sesaun jornada orsamentál hodi buka konsensu posível no kria setór prioritáriu ne’ebé atu investe no hetan tetu orsamentál ida atubele reforsa implementasaun prioridade sira.

Iha diskusaun ne’e, PM Taur fó hanoin liña ministeriál sira halo planeamentu ho baze ba nesasidade urjente no importante atu deside prioridade nasionál no tetu fiskál.

“Ha’u espera ho aprezentasaun sira tuir mai bele fó idea ida ba ita hotu atu kontribui malu atu bele define prioridade no tetu orsamentál ba 2021,” nia realsa.

Jornada orsamentál hanesan reflesaun kompromisu Governu

Iha sorin seluk, Ministru Finansa, Fernando Hanjam, hateten jornada orsamentál hanesan reflesaun ba kompromisu Governu nian atu prepara OJE 2021  atu rekupera ekonomia no asegura kontinuasaun dezenvolvimentu servisu públiku ne’ebé di’ak ba povu Timor-Leste.

“Iha objetivu rua mak ita hakarak atinje iha jornada orsamentál ne’e, dahuluk atu define prioridade nasionál no atu determina tetu fiskál 2021 nian,” nia akresenta.

MF no Gabinete Primeiru-Minisstru (GPM) liuhosi Unidade Planu Monistorizasaun no Avaliasaun (UPMA), hamutuk ho Komisaun Rekuperasaun Ekónomika prepara ona materiál aprezentasaun atu tulun liña ministeriál sira liuhosi informasaun loos no komprensiva atu hala’o diskusaun di’ak no konstrutivu, no ikus mai deside  preiodade nasionál no tetu fiskál OJE 2021.

Sorumutuk ne’e sei halo iha loron ida de’it no materiál aprezentsaun sei fahe ba sesaun tolu, hanesan, aprezentasuan kona-ba  kuadru planeamentu  ne’ebé inklui visaun  no estratéjia dezenvolvimentu Timor-Leste ne’ebé ho baze ba Planu Estratejiku Dezenvolvimentu Nasionál (PEDN) 2011 to’o 2030.

Programa Governu ba tinan-lima nia liuhosi orietasaun PM Taur ba preparasaun OJE 2021 to’o 2023 ne’ebé estipula iha livru ne’ebé sei distribui iha sesaun datoluk.

Ekipa aprezenta estratéjia, programa  no meta sira ne’ebé sai referénsia  ba programa setór sosiál ba tinan 2021 no halo aprezentasaun ba dezepeñu setór sosiál, ekonómiku no fiskál  inklui reforma  fiskál  jestaun finansa públika no planu rekuperasaun ekonómika.

“Ita-nia sesaun daruak ne’e hanesan diagnóstika ba lala’ok dezenvolvimentu nasaun ne’ebé sei tulun ita hatene la’o to’o iha ne’ebé ona no saida de’it maka sai ita-nia forsa no dezafíu ba  jornada dezenvolvimentu Timor-Leste no tulun ita atu hetan kona-ba kapasidade finansa públika hodi rekupera ekónomia hosi impaktu surtu COVID-19 atu hametin dezenvolvimentu ekonomia, infraestutura no institusionál,” Ministru subliña.

Sesaun ikus liu, sei foku ba aprezentasaun senáriu  tetu fiskál, ne’ebé MF sei prepara senáriu haat hanesan kada senáriu iha tetu no sustetabilidade fiskál ne’ebé diferente.

“Ho koneksaun reseita doméstika ne’ebé relativamente ki’ik no senáriu tetu fiskál ne’ebé boot sei fó risku ba sustentabilidade fiskál, liuliu sustetabilidade fundu mina-rai nian,” nia afirma.

Ho nune’e, Governante ne’e espera iha jornada orsamentál ne’e sei hili senáriu fiskál ne’ebé sei la prejudika sustentabilidade fiskál no kompromísiu Governu nia atu rekupera no hametin dezenvolvimentu.

Jornada orsamentál ne’e partisipa direita husi Prezidente Parlamentu Nasionál, Prezidente Tribunál Rekursu, Xefe Kaza Sivíl, Membru Governu, Membru Deputadu iha Parlamentu Nasionál, inklui Diretór Jerál no Nasionál sira iha liña ministeriál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here